JOB 10 - AMÜSA BAIBEL (BSI)

¹ Akang lichonü Ih müthohko. I longmüsü amütsa hi nyijüng.

² Ih tümülangjü, Tsingrangba. Ite young, tu ngang Ih nyümro?

³ Nüh hitoh-i kurahnung athsalang mah-o? Nüpunü thricho mükhimüngunung ang? Ko amütsarü lümchung la mitbhü münyünung ang?

⁴ Ihrünü nguchicho müngurü do?

⁵ Nü kang ihrü kyo akhikyah do?

⁶ Khang tuepü I münyi hitoi bhuro? Ko I mülang apüm yangchiro?

⁷ Ih achomükeh ta Nü chahnü Ih khümchonung süsü mülepü Nühnü müdhele.

⁸ Nüpu khehnü I trüp thricho, ko ade hütsüba kheh tsünü Ih thsangnyangjüre.

⁹ Nühnü Ih lihshehnü külüpcho lümchehng; hütsü thali asongsong kangsohnung do?

¹⁰ Nühnü Iu khyang Ih nümüsusohnung re jücho; Nühnü Itpa mila Ih zisohcho.

¹¹ Nühnü Ifü la arüh ko shutsa thricho, ko arüh tsü shutsa ko aküpnü müyühtijücho.

¹² Nühnü I khyang akang ko müthrehba amüi jücho, ko Nü axükümbanü I kang lisohcho.

¹³ Ta bekhyah hütsütoi tsü Nühnü Ih dhsakehjünung du chungkopü Ihnü ade müdhere.

¹⁴ Ih amünyi shitpahnung du dhingyeh liko, Nühnü I mülang müpehjünung nengdang.

¹⁵ Ih amünyi shitpahyeng, Ih Nüte dhsangthsila lile, ta Ihnü athsalang nguchide, Ih tu nengse mühle. Ih chongchale ko ashahnü jengko.

¹⁶ Ihnü akoh ngukhang, kihkhünying kyo Nühnü Ih iichire; Ih dhsakehjünung Nühnü thsayahiya mii nguchire.

¹⁷ Ih nyüm lede Nü yuzi khürü lile; Ite Nü rihlong zidu zire; lede Ih pehnung lümchung asi külüpre.

¹⁸ Tsingrangba, tuepü Ih surosohcho? Sünüsü müngude Ih sopehba thsako.

¹⁹ Milanü müchongkhüti konglang wünung tsü, müsurocho atsauba thsako.

²⁰ I kang hi atsirü mahrü do? Ih yah pehjüng! Anyingcho bekhyahla Ih künyang linung.

²¹ Ih zah tsinung ko khodesü müthalinung; amarürah ko anyahthrüm limih lang,

²² amarürah, nbükhüm ko lümdhama limih, hütsüla atsingse tsü mii amarürah lile.