JOB 1 - AMÜSA BAIBEL (BSI)

Job Thsadsücho

¹ Uz limih la nyüh khüdu anengnü Job licho; abinü Tsingrangba mübücho ko abi dee yuje cho licho. Abi amünyi lanü za liba nyitsarü atsa khüdu licho.

² Abi tsurü adhrerü dhünyeh ko khingkurü asang licho,

³ ko san hajar dhünyeh, ut hajar asang, misü hajar khüdu ko gadu thsih münga licho. Abi yo kulirüsü khütang licho ko nyüchürolang abi alibong thsacho.

⁴ Job tsurütinü arüh mülihta thsüti tüpcho, hütsüla aparüsü apüm ro zehcho ko arühnü arüh nilarü arüh asangsü lede dsiyohcho.

⁵ Thsüti tüp-pü nyangnyü khüu müipi, Job-nü mütoh suropü atsurüti müsachehjünung arüh müipi nengdang kangmübü mübücho. Abinü lede hütsüta nguchicho, tunüo mümüdhepü arüh khüdunülü Tsingrangba mükhimüngupü linungkopü abinü lümcho.

⁶ Khode ninglangrünü Abüdongba te shirütanung nyümong chihcho, arüh yola satan-sü zehcho.

⁷ Abüdongba-nü abi te tsingdhingcho, “Nüh khüdenü rocho?” Satan-nü lalingcho, “Wüli-roli ko tuwüli-jüroliba limih lanü rocho.”

⁸ Abüdongba-nü tsingdhingcho, “Nühnü I dikehrü Job münguo? Limih la abi kyo yuje chorü ko atsa süsü mühle. Abinü Ih mübüre ko amünyi tusü münguchinung müzahre.”

⁹ Satan-nü lalingcho, “Hütsü khu abinü tusü müngukhang, Job-nü Nüh mübünung do?

¹⁰ Nühnü lede abi ko abi kukhi ko abi licho lüpcho tsungtire. Abi nguchicho lüpchola Nühnü müwajüre ko Nühnü abi khyang alihnü müzu kanglungrü jüko.

¹¹ Ta ade abi licho lüpcho Nühnü hitsijürelang, abinü Nüpu betenü chokehcholanung.”

¹² Abüdongba-nü Satan te yocho, “Dhing, abi licho lüpcho nü kheh la zehle, ta nühnü Job apu du tsü tüthsakehjü.” Achotsü Satan-nü hütsülanü tsicho.

Job Tsuzarü ko Kuthsi Changcho

¹³ Nyümong khüdu Job-rü tsuzarüti arüh amung aziba kuh la thsüti tsu lide,

¹⁴ yuhirü khüdu Job yanglang shangro yocho, “Ihrü misüpung nüpü luh xüyacho ko gaduti tsü hütsü shündhün zanulih la tsuyong licho.

¹⁵ Dhrongyengnü Sabea-rünü ro mahcho ko hütsüri apüm hitsiko. Arühnü nü kulirü apüm kyüsehko. Ih du nüte yu hi yonung tsicheh rore.”

¹⁶ Abi yu müchokae, kulirü apa khüdu ro abi te yocho, “Tsingchinü santi ko anyahrüti apüm chisehko. Ih du nüte hi yonung tsicheh rore.”

¹⁷ Abi yu müchokae, kulirü apa khüdu ro abi te yocho, “Khaldearü mülung asang ro ihrü mahko, ut-ti hitsiko ko nü kulirü apüm kyüsehko. Ih du nüte yu hi yonung tsicheh rore.”

¹⁸ Abi yu müchokae, kulirü apa khüdu ro abi te yocho, “Nü tsuzarüti arüh amung aziba kuh la thsüti tsu pümcho,

¹⁹ ko lipilih langnü tsingxinyübong fo rocho. Hütsünü kuh tsü fütsucho ko arüh atümung müpsehcho. Ih du nüte yu hi yonung tsicheh rore.”

²⁰ Hütsüde Job shemüsu yacho ko awahchonü ajengki rehnahcho. Abinü athah hehpehcho ko alih la müp thsütsucho.

²¹ Abinü yocho, “Ih tbhüdeng surocho ko tbhüdeng sünung. Abüdongba-nü jücho ko ade abinü hitsiko. Abi seing.”

²² Hütsütoi tikehnye, Job-nü Tsingrangba nyüm amünyi müshitpahcho.