JEREMIA 9 - AMÜSA BAIBEL (BSI)

¹ Akyühsehcho I müyurü nengdang ama atsingse Ihnü tranungthsa, I thah tsü kihkong ko I nahtse tsü nahshükih yongna thsasohnyüle.

² I müyurü tenü shehmüi linungthsa, lipilih la tsü I kuh mülipü o! Arüh atümung yuje müchorü ko akihyochürü mülung.

³ Arühnü lede arahkheh chonyü du lile; limih tsü yujenü yangthsanung mülih, yuje mücho dunü yangthsale. Abüdongba-nü yore, “I müyurünü amünyi khüdu khanglang khüdu nguchire, ko Ih arüh Tsingrang roh-i mükhyüchore.”

⁴ Shangrü amütsa mürieng; nü jünirü chah long tülang. Tunüo jünirü apüm akihyochürü, ko shangrü apüm amükhimüngurü.

⁵ Shangrünü shangrü kihyochüre, ko sünüsü yuje müchore. Arühnü nanathsa arahkheh chore, ko mütozah amünyi shitpahre.

⁶ Arühnü khüdu khanglang khüdu ashüh khatohre, ko akihyochüba khüdu khanglang khüdu nguchire. Abi müyurünü Abi mükhyüchorepü Abüdongba-nü yore.

⁷ Hütsü khu Akohba Abüdongba-nü yore, “Ihnü idhse kyo I müyurü müluchinung ko arüh müchehdhingnung. I müyurünü amünyi nguchiko, Ihnü arüh te apa tu nguchinung?

⁸ Arüh müle tsü asüba tbüdeng kyole; arühnü lede arahkheh chore. Apümnü kurümrü te yu tsa chotare, ta hütsü abi khyang zeng khyangpüjüre.

⁹ Hiri nengdang arüh mükhingchinung ang? Hitari yucho te rüh müyangnung ang? Ih, Abüdongba-nü choko.”

¹⁰ Ihnü yocho, “Azong nengdang meshünung ko zanulih nengdang tranung, tunüo arüh tsü kungpehko ko süsü hütsüla mülahkhure. Adelü misü khongcho müyuchire; uzati ko rangmü kanglungrüti drü tsipehko.”

¹¹ Abüdongba-nü yore, “Ihnü Jerusalem tsü trümnah bhümcho kangsohnung, ko rangfü liji kangsohnung; Juda yangditi lihpi kangsohnung, süsü müliba müdüm khüdu.”

¹² Ihnü tsingdhingcho, “Abüdongba, tuepü alih hi süsü mülahkhunungthsa apehcho ko lihpi kang kungchehsohcho? Hi nyichehnungthsa amüdherü sü liro? Aparü te yonungthsa nühnü süte changnah yocho?”

¹³ Abüdongba-nü lalingcho, “I müyurünü Ihnü arüh khyang jücho adoba thrüchahchü pehcho khu hi tikehcho. Arühnü Iyu mühnyi mahkhang Ihnü yocho münguchi.

¹⁴ Ta arühnü hongzicho ko arüh tpurünü thülacho Baal tsingrang kyothri mübücho.

¹⁵ Hütsüeko, Ih, Abüdongba, Israel Tsingrang-nü tu nguchinungnang dhing: Ihnü I müyurüti khyang atsunung rangva akha ko ayongnung müyüh jünung.

¹⁶ Arühnü mahkhang arüh jümürünü mii müyuchidhingcho yuchotila arüh tsishosohnung, ko arüh kingka müchangkade Ihnü arüh nyüm arorüh müthehnung.”

Jerusalemrünü Arüku Ching Züdecho

¹⁷ Akohba Abüdongba-nü yocho, “Tu tikeh yaro hütsü lümdhing! Meshürüti dsibülung, meshü khi thsarü khingkurüti.”

¹⁸ Müyurünü yocho, “Arüh te zah ro ihrü nengdang meshü khi khüdu thsanung young, nahshükihnü ihrü nah müjengde, ko atrachonü nahküp mübümde.”

¹⁹ Zion la trakhitrayo yuva nyidhing, “Ihrü changko! Ihrü dee ashah khyüko! Ihrünü ihrü lih pehjübae; ihrü kuh tphünah pehko.”

²⁰ Ihnü yocho, “Abüdongba te nyieng, khingkurüti, Abi yu tsidsa nyieng. Nührü tsularü te meshünung young, nührü shangrü te meshü khi thsanung young,

²¹ Nyübongkhi khu asüba ihrü yangthsaba kuh la züroko; hütsünü yanglongla azarüti ko shithsachah dhrezarüti süsohcho.

²² Me tsü apümlang shupishuzako, luh la alihsu müjung bhümpücho, maxarünü mabhüm bhümcho kyo, sünüsü mükhyübülung. Hi Abüdongba-nü I khyang chosohcho.”

²³ Abüdongba-nü yore, “Amüdherünü arüh lümlong nengdang, mahkhang rezehrünü arüh re la, mahkhang alirünü arüh kuthsi la tümüthseh.

²⁴ Khürünü müthsehnyükhang, abinü Ih müdhecho ko nyichehcho khyanglang müthsehsohng; tunüo I amüi müthrehre ko Ihnü athsalang du nguchire. Hitarinü Ih künyangsohre. Ih, Abüdongba-nü choko.”

²⁵ Abüdongba-nü yore, “Ihnü Ijip, Juda, Edom, Amon, Moabrüti ko lipilih la liba kuva akhikhi müjüprüti khingchinung becho chihle.

²⁶ Hiri nyitsarü apüm müjüp-pehko, ta hütsü adüzü anyengchotabalü müyohbü. Hiri nyitsarü ko Israelrü sünüsü Ite azengchotaba müyohbü.”