JEREMIA 7 - AMÜSA BAIBEL (BSI)

Jeremia-nü Amübükuh la Thsingyucho

¹ Abüdongba-nü Judarü mübünung züduba Amübükuh trahtri yang Ih müthehcho.

² Abinü Ite hütsüla yapü arüh te Akohba Abüdongba, Israel Tsingrang-nü yonung liba yu tsü müdhesohnung yocho:

³ “Nührü liba akang ko saying müliching, ko Ihnü nührü hila mütozah lisohnung.

⁴ Ihsa khümcho lile! Hi Abüdongba Amübükuh, hi Abüdongba amübükuh, hi Abüdongba Amübükuh pü akihyochüba yu hiri chah adelü tüyudsi!”

⁵ Nührü liba akang ko saying müliching. Khüdunü khüdu te athsalangnü bichieng.

⁶ Shuparü, mürürü ko chomilarü khyanglangnü thsatsa tükhyü. Hiba lih la achomükehrü adelü tümüpseh. Adelü apa tsingrangti tümübü, tunüo hütsünü nüh changjünung.

⁷ Nührünü mülichikhang, Ihnü nührü jümürü khyang arühtoh jüba lih la tsü lede nührü lisohnung.

⁸ “Dhing, nührünü kihyochüba yula longlangcho.

⁹ Nührünü führe, müpsehre, nahtrahnaxengre, yuchümnü arahkheh chore, Baal khyang kangmübü mübüre ko nührünü mümüdhe licho tsingrangti mübüre.

¹⁰ Ihnü thrünyiba nguchi nührünü nguchire, hütsüpü ro I jingte, Ipu Amübükuh la ronü, ‘Ihrü khümcho lile’ pü yore.

¹¹ I Amübükuh tsü fühkhohrü kumünyi chah-epü nührünü lümrü mah-o? Nührü nguchi Ihnü nguko.

¹² Akhudiba Amübükuh thsanung Ihnü throchehcho Shiloh lang wüng ko I müyurü Israel münyi ngang hütsüla Ihnü tu nguchicho dhing.

¹³ Nührünü amünyi hiri apüm shitpahko, ko Ihnü loli loli nührü te chotanye, nührünü mühnyi. Ihnü dside nührünü mülaling.

¹⁴ Hütsünü, nührünü longlangba I Amübükuh hichah Ihnü Shiloh la tu nguchicho hütsü roh-i tsü Ihnü nguchinung. Ade Ihnü nührü jümürü ko nührü khyang jüba lih hila, Shiloh chah Ihnü nguchicho akyokyo nguchinung.

¹⁵ Ihnü nührü jünirü Israelrü iipehcho kyo, I nah tenü nührü iipehnung. Ih, Abüdongba-nü choko.”

Müyurü Yocho Münyicho

¹⁶ Abüdongba-nü yocho, “Jeremia, nyitsarü hiri nengdang tükihchi. Arüh nengdang tüzüde mahkhang tüdangkhidangnang; Ite tükihchi, tunüo Ihnü nüte mühnyinung.

¹⁷ Arühnü Juda yangditila ko Jerusalem yanglongla tu nguchiro hütsü nühnü münguo?

¹⁸ Azarünü sing müzangre, azirünü michang thsare ko khingkurünü Ning Yangthsalatpü pü dsiba tsingranglatpü khyang hümdhse tangnung hüm müxühre. I rihlong chürosohnung arühnü apa tsingrangti khyang mii yongkha tungzire.

¹⁹ Ta arühnü rihlong chürosohba tsü yuje Ih mah-o? Mah, arühnü arühbürü rihlong chürore ko arühbürü yang ashah hirore.

²⁰ Hütsü khu, Ih, Abüdongba-nü hiba Amübükuh chah I rihlong mükhakehnung. Ihnü hütsü nyitsarü ko kanglungrü apüm chah mükhakehjünung ko, singdonglidong ko tsahmarü chah mii küdusohnung. I rihlong tsü sünüsü mümehchehsohba michang kyo linung.”

²¹ “I müyurüti, kangmübü khürü nührünü bholu chah tsü apüm trüpnung ko khürü nührü khyang tsunung mülako. Ta, Ih, Abüdongba-nü yoba tsü, nührünü hütsüri apüm tsunung kohle.

²² Ihnü nührü jümürü Ijip lanü nüchehde, trüp mübü mahkhang kangmübü nengdang Ihnü tu yuzeng müjü.

²³ Ta Ih arüh Tsingrang thsanung, ko arüh I müyurü thsanung Ihnü arüh te Iyu nyinung yuzeng jüko. Ko arüh tsa linung shulüm Ihnü mülacho kyo linung arüh te yoko.

²⁴ Ta arühnü mübichi mahkhang mühnyi. Hütsü mülih, arühnü hongzi ko amünyi lümcho du nguchicho ko arüh alaa amütsaba kangcho.

²⁵ Nührü jümürü Ijip lanü chüroba nyümong lanü chünye yingcheh, Ihnü nührü yang I dikehrü, azikehrü mütheh du rore.

²⁶ Ta sünüsü mühnyi mahkhang müci müjü. Hütsü mülih, nührü jümürü tenü nührü alaa ahongzi ko anyüm-u kangko.

²⁷ “Hütsüeko Jeremia, nühnü yu hiri apüm I müyurü te young, ta arühnü nüte mühnyinung; nühnü arüh dsinung, ta arühnü mülalingnung.

²⁸ Nühnü arüh te arüh yuchonü Ih, Abüdongba, arüh Tsingrang yocho mühnyire mahkhang arüh akhingchi lanü mühnyichorepü yonung. Yuje choba tsü süko. Hütsü achochi mii müchochire.

Hinnom Ngah la Amünyi Nguchi

²⁹ “Meshüng, Jerusalemrü; nührü kuva müjüpm ko pehng. Akhangchah tsü meshü khi thsaang, tunüo, Ih, Abüdongba zichürore ko I müyurü thrüchahchüpehko.

³⁰ “Judarünü amünyi khüdu nguchiko. Arühnü Ihnü thrünyiba kyothri I Amübükuh la yohpüko ko hütsü münyijüko.

³¹ Arühnü michang la arüh tsurü ko tsularü kangmübü jünung nengdang, Hinnom ngah la Tofet pü dsi, bholu khüdu külüpko. Ihnü hütsüta nguchinung yuzeng müjü, I lüm la alüm mii mülüm.

³² Hütsüpü, hütsüte Tofet pü müdsinung mahkhang Hinnom ngah pü müdsinung, ta Kingthrüm Ngah pü dsinung bekhyah ronung. Arühnü müyurü tsü hütsüla dhrürangnung, tunüo arüh dhrürangnungthsa apalang khüdesü mülinung.

³³ Me tsü uzati ko kanglungrü tsang thsanung, ko arüh iipehnung süsü mülinung.

³⁴ Limih tsü lipilih kangnung. Juda yangditi ko Jerusalem yanglongla Ihnü akünyang yuva ko akünyang kukangba thsüti yuva yatijünung.