JEREMIA 6 - AMÜSA BAIBEL (BSI)

Arorühnü Jerusalem Mükangticho

¹ Benjaminrü, tsichehnung shang! Jerusalem lanü tsicheh tsieng! Tekoa la rühti tsü mehng ko Beth Hakerem la amüdhethsa mikhu phung. Kihku lahpinü asüba ko achangba ronung thsale.

² Zion yangdi tsü atsah atsa, ta hütsü changnung;

³ hütsüla yangthsarütinü arüh rothsarü nüpü müdongnung. Arühnü yangdi mükang shükuh thsanung ko arüh müipi arüh linyüchola linung.

⁴ Arühnü yonung, “Jerusalem mahnung küdang! Rungnüm! Ihsanü nyüthungla mahnung!” Ta hütsüde arühnü yonung, “Münurako, manung thsale ko nyüzeh nyüjing tehchahchüle.

⁵ Ihsanü aromang mahnung; Ihsanü yangdi roshengvi thsangnyangjünung.”

⁶ Akohba Abüdongba-nü yangthsarü hirite singdongti renü Jerusalem mahnung alih müjung sühnung yocho. Abinü yocho, “Ihnü hiba yangdi hi khingchinung tunüo hi sehchi bichibanü jeng lile.

⁷ Kihkongnü kih müdhsengchehcho kyo, Jerusalem amünyinü müdhsengchehre. Ihnü yangdila tsü shühkhatoh ko athsangnyang du yuchire; füdhsa ko aiha du Ihnü ngure.

⁸ Jerusalemrü, nührü nengdang achongcha hiri amüdhethsa khüdu kangsohng, Ihnü nührü thrüchahchüpehnung; Ihnü nührü yangdi tsü süsü mülichehba lipilih kangsohnung.”

Anyümrü Israel

⁹ Akohba Abüdongba-nü Ite yocho, “Shükusih dongchah asih riri laakhangcho kyo, Israel tbhüdeng kangsohnung. Hütsüeko bekhyah lidenü nührü kohcho khümchoung.”

¹⁰ Ihnü lalingcho, “Ihnü arüh te müzahsoh chokhang sünü I yochonyinung? Arühnü hongzi Nüyu mii mühnyire; Nühnü I khyang yosohbala tsü arühnü münyodhingre.

¹¹ Arüh nyüm Nü rihlong tsü I chah mii trüpre, Abüdongba, ko adelü Ihnü mürangchore.” Hütsüde Abüdongba-nü Ite yocho, “I rihlong tsü yanglongla azarü chah ko kunu shibülungcho la thohkehjünung. Anii ko anitpüti notsinung ko ashirü mii müpehjünung.

¹² Arüh kuh tsü bürü khyang jünung, ko hütsüta arüh luh ko arüh nitpürüti bürü khyang jünung.

¹³ Azikyahrü ko amülahrü atümungnü yuje mücho thsi külüpnyüre; azikehrü ko bebürünü mii müyurü kihyochüre.

¹⁴ Arühnü I müyurü madhsa atangnung kyangjüre. Yangtsa mülipü arühnü, ‘yangtsa, yangtsa’ pü chore.

¹⁵ Hiri rahmütsa nguchi nengdang arühnü shahrü mah-o? Mah, arühnü seh müshah; arühnü ashah tsü tunang mümüdhe. Hütsü khu, aparü kyo arühsü khülunung; khode Ihnü arüh khingchinang, arüh nengdang hütsü achangka thsanung. Ih, Abüdongba-nü choko.”

Israelrünü Tsingrangba lang Dhsonglicho

¹⁶ Abüdongba-nü amüyurü te yocho, “Langtpah la tsü yaang ko dhing. Jümü langrüh atsauba tsü khüde lirünang tsingdhing. Hütsüla tsehng, ko nüh yangtsa la linung.” Ta arühnü yocho, “Imoh, ihrünü mütsehnung!”

¹⁷ Hütsüde Abüdongba-nü rose rühti nyisohnung roshengrü throchehcho. Ta arühnü yocho, “Ihrünü mühnyinung.”

¹⁸ Achotsü Abüdongba-nü yocho, “Nyidhing, yuchoti ko I müyurüti chah tu tikehnungnang nyichoung.

¹⁹ Nyieng, alih! Arühnü külüpcho lümchung apüm khingchinung hiri müyurü chah Ihnü athsangnyang hirore, tunüo Ihnü docho arühnü mükhyücho ko Iyu mühnyi.

²⁰ Sheba lanü I khyang müchiji hiroba, mahkhang ashulanü I khyang axümlichi hiroba nengdang Ihnü mükhichire. Ihnü arüh amübü mükhyüchonung mahkhang arüh kangmübüla mükünyangre.

²¹ Hütsünü Ihnü hiri nyitsarü jing müthi ngahsehsohnung. Au ko atsurüti ko arüh shangrüti ko kurümrüti apüm sünung.”

Kihku Lahpinü Mahcho

²² Abüdongba-nü yore, “Kihku lahpi yanglih khüdu lanü nyitsarüti role; ashula liba akurah yucho khüdunü mongchiinung küdangle.

²³ Arühnü arüh singthsalu ko nohsheng müzuko; arüh akurah ko yanglih mükehrüti. Arüh kurichah pümpü roba yuva tsü kihdi rengcho kyole. Arühnü Jerusalem nyüm khatanung küdangpü lile.”

²⁴ “Yusi tsü ihrünü yuchiko” pü Jerusalemrünü yore, “ko ihrü kheh hingkehpehko; khingkurü mikhungde kyo ihrü alongri ko adhsanü jengko.

²⁵ Ihrünü rangmülang mahkhang langla mürachichehre, tunüo ihrü rorünü thsunohrü bipü ihrü mükang lile.”

²⁶ Abüdongba-nü amüyurü te yore, “Müyahshü müpieng ko asongsongla chichieng. Atsurü amüthsümrü süde tracho kyo nühnü nahshükih sho traang, tunüo nüh changjünung roba tsünü nüh dhrongyengnü mahnung.

²⁷ Jeremia, nühnü idhse müchehdhingcho kyo, I müyurü thsadsüdhing.

²⁸ Arüh apüm hongzi nyümrüti, imüyeng ko idhse kyo azi lile. Arüh apüm amütsarüti, nengchü yu cho rachire.

²⁹ Michang tsü dee zi trüpre, ta iichüh tsü müshenah. I müyurü mülucheh wünung tu adhsütah mühle, tunüo amütsarü tsü mükhyüchehpeh.

³⁰ Arüh te akhyüchah müliba iichüh pü dsinung, tunüo Ih, Abüdongba-nü arüh mükhyücho.”