JEREMIA 5 - AMÜSA BAIBEL (BSI)

Jerusalem Münyi

¹ Jerusalemrü, nührü yanglong tung shang! Dhingmükang! Dhingkyaang. Shihthsachah yangching! Athsalang nguchirü ko yuje chorü khüdu dusü nühnü ngunung do? Nührünü ngukhang, Abüdongba-nü Jerusalem khyang mülangpehjünung.

² Nührünü Abüdongba mübürenye, nührünü chocho kyo münguchire.

³ Yutsatsa Abüdongba-nü yuje chorü yangchire. Abinü nührü lahcho, ta nührünü müdhsa; abinü nührü nyehcho, ta nührünü mühnyichonyücho. Nührü hongzicho ko müximülacho.

⁴ Hütsüde Ihnü lümcho, “Hiri hi ailümrü ko amümüdherü du lile. Arühnü amüsithsa nguchire; arüh Tsingrang-nü tu dhsütahro, arüh khyang tu nguchisohnyüro hütsü arühnü mümüdhe.

⁵ Ihnü müyurü yang zii la wünung ko arüh te chotanung. Yutsatsa arüh Tsingrang-nü tu dhsütahro, ko arüh khyang tu nguchisohnyüro hütsü arühnü mümüdhe.” Ta arüh apümnü Abüdongba tase mükhyücho ko Abi yu mühnyi.

⁶ Hütsü khu mürong lanü kihkhünyingnü arüh mükahsehnung; lipilih lanü rangfünü arüh rehzangzangnung ko yanglongla müroh khünyingnü arüh nyihnung. Sü dongkhu chüdunang, abi anyüh kang rehnahnung, tunüo arüh münyi mükhilong ko shikhe müipi arühnü Tsingrangba tenü ximüla tsiko.

⁷ Abüdongba-nü yocho, “Tuepü Ihnü müyurü mülangpehjünung? Arühnü Ih thrüchahchüpehpü aparü arahkheh tsingrangti mübücho. Ihnü müyurü arüh mi jeng kangcho, ta arühnü nahtrahnaxengcho ko mabomashilarü te arüh bekhyah pehcho.

⁸ Arüh atüpchehcho majüh-kuri kyo, apümnü arüh kurümrü nitpürü mükhyahcho.

⁹ Hiri nengdang Ihnü arüh mükhingchipü ko hitari yucho te rüh müyangnung ang?

¹⁰ I müyurü shükusih thrümsohnung Ihnü arorüh müthehnung, ta ririlü müchangsohnung, Ajengzati lepehsohnung Ihnü yonung, tunüo hütsüri ajengzati Iyo mah.

¹¹ Israelrü ko Judarünü Ih dee mütsa kihyochüko. Ih, Abüdongba-nü choko.”

Abüdongba -nü Israelrü Mükhyüchocho

¹² Abüdongba müyurünü Abi mükhyücho yocho, “Abinü tu münguchichehnung. Ihsa müchongchanung; Ihsa khata mahkhang yangkong mümütohnung.”

¹³ Arühnü azikehrüti hi tu mah, adengepü ko Abüdongba chahnü arüh tu yusi mühlepü yore.

¹⁴ Abüdongba Akohba Tsingrang-nü Ite yocho, “Jeremia, hiri nyitsarünü hiroh-i chocho ngang, Ihnü nü bela Iyu tsü michang kyo kangsohnung. Müyurü tsü sing kangsohnung ko michangnü arüh trüp-pehnung.”

¹⁵ Israelrü, Abüdongba-nü nührü mahsohnung ashulanü yucho khüdu norole. Hütsü yucho ahi ko re azeh lile, nührünü arüh yu mümüdheba yucho khüdu lile.

¹⁶ Arüh rothsarü tsü achomang müli kyüsehrüti lile.

¹⁷ Arühnü nührü tsahma ko fürü tsukhangjünung; arühnü nührü tsurü ko tsularüti müpsehnung. Arühnü nührü kanglungrü müpsehjünung ko nührü shükusih ko ngurüsih changjünung. Nührünü longlangba atbüticho yangdi tsü arüh rothsarütinü thsangnyangjünung.

¹⁸ Abüdongba-nü yore, “Ta hütsüri nyümongla mii Ihnü I müyurü ririlü müchangjünung.

¹⁹ Tuepü Ihnü hütsü roh-i nguchicho ko arühnü tsingdhingkhang, arühnü arüh lih la I tenü za wü yangpirü tsingrangti dikehcho kyo, bürü lih la arühnü shirü dikehsohnungepü arüh te young, Jeremia.”

Tsingrangba-nü Müzahsohcho

²⁰ Abüdongba-nü yore, “Jakob trah te young, Judarü te young:

²¹ Nyieng, nührü amüsithsa ko adohrüti, nah kehnye münguba, nangku kehnye müyuchibarüti.

²² Ih Abüdongba; tuepü Ih müdrüro? Tuepü I jingte müdhridhriro? Kihdi khu mütingcheh tsinung lurü thsanung Ihnü lihpi yohpüjücho. Kihloh khong ronye hütsü khu mütsichehnung.

²³ Ta nührü! Nührü ahongzi ko anyümrü; nührünü I tenü ximüla Ih pehtsicho.

²⁴ Ihnü maxamaki tsing ko chisi kyang tsing rosoh kang müthe tsa yangyosohnye, nührünü khodesü Ih dhichinung mülümcheh.

²⁵ Hütsü mülih, nührü münyinü nührü tenü hiri atsati yatire.

²⁶ “I müyurü yola amütsarü zehle; arühnü arahkheh cho uza thsacho kyo, zeng thsapüpü yingre, ta arüh zeng tsü arühbürü xohnung du thsare.

²⁷ Uzanü püp jengcho kyo, arohchocho kohronü arüh kuh jengre. Hütsü khu arüh tase zeh ko alirü thsare,

²⁸ ko arüh tsunyire. Arüh amütsa nguchi tu akihzah mühle. Arühnü mürürü khyang arüh athsalang müjüre mahkhang suromüchürü athsalang mükhümre.

²⁹ “Ta Ih, Abüdongba-nü hiri nengdang arüh khingchinung; hiba yucho michah Ihnü rühyangnung.

³⁰ Hiba lih la adrünung ko anehnung nguchi tikehko:

³¹ azikehrütinü arahkheh du chore; bebürütinü azikehrünü mülacho du nguchire ko müyurünü tu adhsongliba müjüre. Ta hiri apüm achangka khüdu chii rode arühnü tu nguchinung?”