JEREMIA 48 - AMÜSA BAIBEL (BSI)

Moab Changcho

¹ Moab nengdang Akohba Abüdongba-nü hita yore: “Neborü müi-o arüh yangdi changko! Kiriathaim kohcheh, abi roshengvi khüluko, ko abi nyitsarü ashah khyüsohko;

² Moab ahechi tsiko. Arorühnü Heshbon mahchehko ko Moab yanglih changjünung rah külüpko. Madmen yangdi naying kangnung; rothsarünü hütsü nyüm wünung.

³ Horonaim-rünü züdenung, ‘Shühkhatoh! Achangba!’”

⁴ “Moab changjüko; azarüti tracho nyidhing.

⁵ Luhith lang ayung arüh longri tracho yuva tsü nyidhing, Horonaim jowüba langla tsü.

⁶ Arühnü yore, ‘Dhsüdhsang, nührü akang nengdang!’ ‘Rangmü gadu kyo shang!’”

⁷ “Moab, nühnü nü re ko kuthsi chah longlangcho, ta ade nüh mii kohchehnung; nührü tsingrang Khemosh mii yangthsarü ko bebürü yola yangtsilang wünung.

⁸ Changbala tsünü yangdi khüdu mii mütsichehnung; angah ko yongshü anyüding changnung. Ih Abüdongba-nü choko.

⁹ Moab nengdang lung khyüm; tunyah mülipü hütsü changnung. Yangditi thsangnyang jonung, hütsüla süsü thali mülinung.”

¹⁰ Sünü Abüdongba nguchi abi lasih apümnü münguchiro, abi chokehcholang! Sünü shühtpheh mükyüsehrünang abi chokehcholang!

Moab Yangditi Changcho

¹¹ Abüdongba-nü yocho, “Moab tsü lede khümcho li rore ko khodesü yangtsilang müwodhing. Moab tsü khodesü füh khüdu lanü apa khüdula mütungmülatadhingba ajümkehcho yongkha kyole. Axümlichi mümünangdhing, ko anyiyah tsü abübü.”

¹² “Hütsünü ade, yongkha kyo Moab tungpehnung Ihnü nyitsarü müthehnung. Arühnü yongkha füh tsü dengchehnung ko zangzang müpnahnung.

¹³ Israelrünü arühnü longlangba Bethel tsingrang te shahcho kyo Moabrünü arüh tsingrang Khemosh te shahnung.

¹⁴ “Moab-rü, tuepü nührünü khatala xangchehcho athrungrü ko akurahrüepü yoro?

¹⁵ Moab ko abi yangditi changpehko; abi dhrezarüti kingthrümko. Ih, Akohba Abüdongba Yangthsaba, ko Ihnü choko.

¹⁶ Moab changnung chihko, abi thsangnyangnung chihko.”

¹⁷ “Nührü shündhün liba yucho nengdang meshüng, abi nengse müdherü nührü apüm. ‘Abi tase tsü thsangnyangko; adelü abi ahechi ko re mühle.’

¹⁸ Nührü Dibon la lirüti, nührü ahechi pümji lanü jürung ko lihwü la püm; Moab changjürü hila lile, ko roshengvi thsangnyang yohpüjüle.

¹⁹ Nührü Aroer la lirüti, langte ying yang, drü tsirü te atikehcho tsingdhing.

²⁰ Arühnü lalingnung, ‘Moab khüluko’ ‘hütsü nengdang traang; abi wah lile. Moab tsü changkako pü Arnon yongkhi tung züdeing.’

²¹ “Akhangngah la liba yangditi: Holon, Jaza, Mefat,

²² Dibon, Nebo, Beth Diblathaim,

²³ Kiriathaim, Bethgamul, Bethmeon,

²⁴ Kerioth ko Bozra michah yukhaba roko. Moab yangditi ashu ko amünyehla liba apüm chah yukhaba roko.

²⁵ Moab re thsangnyangjüko; abi tase changjüko. Ih, Abüdongba-nü choko.”

Moab Jowüsohnung

²⁶ Abüdongba-nü yocho, “Moab müchasohng, tunüo abinü Ih nyümko. Moab tsü abükyü mülühchola chichinung ko bürünü münyodhingnung.

²⁷ Moab, nühnü Israelrü khüta münyodhingcho lümchehng? Arüh fühkhohrü yola rangcho kyo nühnü arüh bichicho.

²⁸ “Nührü Moab la lirüti, nührü yangditi pehjüng! Wüng ko lungdhong la lieng! Lungdhong bekhümla arüh süp shüba mümüdhrü kyo lieng.

²⁹ Moab dee müthsehle! Arüh khüta amüthseh, ahongzi, ko künyangküshiro, ko arühbürü nengdang khütoi lümro, hiri apüm Ihnü müdhele.

³⁰ Ih, Abüdongba-nü arüh kükhingcho müdhele. Arüh tüzümükhümba tsü tu mükangnung, ko arühnü nguchiba tsü anyahli mülinung.

³¹ Hütsüta Ihnü Moab ko Kir Heres la lirü apüm nengdang tranung.

³² Ihnü Jazer-rü nengdang tracho tenü alaa Sibma-rü nengdang tranung. Sibma yangdi, nüh Asü Kihdi khu wüba ko Jezer chii wüba shükusih jengza kyole. Ta ade nührü müyü singsih ko shükusih thsangnyangpehko.

³³ Asu lih Moab lanü akünyang ko alongphi hitsiko. Ihnü shükusih nyehji lanü cikih külüp künyangtanung süsü mühle.

³⁴ “Heshbon-rü ko Elealeh-rünü züdere ko arüh yuva tsü Jahaz lanü mii yuchire; Zoar-rünüsü yuchinung kohre ko hütsü Horonaim ko Eglath Shelishiya lanü mii yuchire. Nimrim kihnatungsü kungpehko.

³⁵ Moabrünü amübükuh la trüp mübüba ko arüh tsingrangti khyang kangmübü mübüba apüm yatinung. Ih, Abüdongba-nü choko.

³⁶ “Hütsünü, khürünü bongphelu lanü meshü khi thsacho kyo, I lasihnü Moab-rü ko Kir Heres-rü nengdang longrire, tunüo arüh licho lüpcho changko.

³⁷ Arüh apüm arüh thah ko arüh benbüh hehko. Arüh atümung arüh kheh tsehnahko ko müyahshü müpire.

³⁸ Moab-rü kukhi apüm ko yanglong apüm la metraba chah khu apa mühle, tunüo sünü mükhyünyüba füh khüdu kyo Ihnü Moab müpnajüko.

³⁹ Moab shühnahko! Züdeing! Moab ashah khyüsohko. Hütsü chang lile ko mükangmüshü liba yucho apümnü hütsü münyodhingre. Ih, Abüdongba-nü choko.”

Moab Tsichehnung Mühle

⁴⁰ Müdi aqo lohpü jürocho kyo, yucho khüdunü Moab chah thsücho jüronung,

⁴¹ ko yangditi ko roshengviti kohchehnung Abüdongba-nü nyengchoko. Hütsü nyümong Moab rothsarüti tsü khingkurü mikhungde nehcho kyo linung.

⁴² Moab changnung ko hütsü adelü yucho khüdu müthsanung, tunüo abinü Ih nyüm yako.

⁴³ Moab-rü nengdang adrüba, mütrüm ko uzathsanü yingyale. Abüdongba-nü choko.

⁴⁴ Sünü adrübala tsünü tsichehtsinung müküpnang mütrüm la longyohnung, ko mütrüm la tsünü sünü tsinang abi uzathsala tsü xohnung, tunüo Abüdongba-nü Moab changnung akyang khüdu yohpüjücho.

⁴⁵ Atsichirü tsünü yangthsaba Sihon-nü khüdupi yangthsathsaba Heshbon yangdila tsikehnyücho, ta hütsü mihmüle la licho. Michangnü lurü apüm ko khata mürurü Moab azong tsü trüp-pehcho.

⁴⁶ Moab-rü müi-o! Khemosh mübürü tsü changko, ko arüh tsuzarüti arangyohlang notsiko.

⁴⁷ Ta aronungla Abüdongba-nü thali Moab pungrohirosohnung. Hiri apüm tsü Abüdongba-nü Moab chah tikehnung yocho lile.