JEREMIA 46 - AMÜSA BAIBEL (BSI)

Karkemish la Ijip Kohchehcho

¹ Abüdongba-nü Ite yuchoti nengdang,

² Ijip chahnü dikeh yocho. Babylon yangthsaba Nebukadnezar-nü Eufrates yongkhi shündhün Karkemish la, Juda yangthsaba Jehoiakim yangthsacho kang müyüula kohchehba Ijip yangthsaba Neko rothsarü nengdang abinü hi yore:

³ “Ijiprü adirünü züdecho, ‘Nührü tsung rungnüm ko khatalang shemüsung!

⁴ Nührü kuri rungnüm ko küdu püm! Achung la yang ko kuthri thrieng! Nührü thsuh sehng! Nührü thsunohrü yohng.’

⁵ “Ta Ihnü tu nguro? Abüdongba-nü tsingdhingcho. “Arüh drü thali role. Arüh rothsarüti mükoh thalire, adrüchonü thungnah shangre ko ximüla müdhing.

⁶ Thungnah shangnye mütsicheh; Rothsarütinü mütsicheh. Kihku lang Eufrates te, arüh jingmüthi khülure.

⁷ Nile kyo yamüsuba hi süo? Yongkhi bekhüm kihmülümcho kyo.

⁸ Nile kyo yamüsuba tsü Ijip, yongkhi bekhüm kihmülümcho kyo. Ijip-nü yocho, ‘Ih yamüsunung ko lihküp phatinung; Ihnü yangditi changjünung ko hütsüla lirü süsohnung.

⁹ Kuri tsü tsisohng ko kuri akhüluba tsü shangsohng! Rothsarüti müthehng; Ethiopia ko Libya lanü tsung bipü, ko Lydia lanü asithsa singthsalu birü.’”

¹⁰ Hiba hi Akohba Abüdongba nyümong; chünye Abinü rühyangnung; chünye Abinü arorüh khingchinung. Anohshengnü arüh thrüm münyünung, ko longmüxode arüh shüh yongnung. Chünye kihku lang, Eufrates te Akohbongnü Abi rorüh kangmübü jünung.

¹¹ Ijiprü, Gilead lang wüng ko moi yangching! Nü moi apüm adeng kangko; tunüsü nüh mükyangcheh.

¹² Yuchotinü nü ashah yuchiko; nü tracho apümnü yuchiko. Rothsarü khüdu michah khüdu ngarita, anyüding alih la khülure.

Nebukadnezar Rocho

¹³ Khode Babylon yangthsaba Nebukadnezar-nü Ijip mahnung rocho, Abüdongba-nü Ite chotacho. Abinü yocho:

¹⁴ “Ijip, Migdol, Memfis ko Tapanes yangditila hütsü sobhoung: ‘Nührübürü khümchonung rungnüm; nührü licho apüm khatala changnung!

¹⁵ Khütapü nührü akohba tsingrang Apis khülucho? Abüdongba-nü abi khülusohcho!’

¹⁶ Nü rothsarüti müthikeh khüluko; khüdunü khüdu te yore, ‘Dhsüdhsang! Ihsanü Ihsa nyitsarü yang kulang wünung, ko arorüh noh-ha lanü tsichehnung!’

¹⁷ “Ijip yangthsaba khyang aneng asi jüng, ‘Kyabüra, abi bekhyah atsa khuko.’

¹⁸ Ih, Akohba Abüdongba Yangthsaba lile. Ih akang liba Tsingrang. Tabor rangrangkuh azongti khakhucho kyo, ko Karmel zong kihdi tenü athsengu kyo, nührü mahba tashi tsü hütsüroh-i linung.

¹⁹ Arangyohrü kang wünung rungnüm, nührü Ijiprü! Memfis tsü lihpi kangnung, süsü müliba achangcho.

²⁰ Ijip tsü ashüsheh misü kyole, kihku langnü bhifünü becho.

²¹ Abükyünü mülihcho rothsarüti tsü akhyüchah müliba misüza kyole. Arühnü yapü mükhata; arüh apüm ximüla shang tsicho. Arüh changnung nyümong chihko, arüh khingchinung shikhe.

²² Ijip-nü mürü kyo khong rang tsire, arorüh rothsarüti chii rode. Arühnü püh bipü khatare, nyitsarünü sing recho kyo;

²³ ko mürong amarürah changjücho kyo. Arüh nyitsarü mükhilong; arüh rothsarü khengqu tenü adrongu.

²⁴ Ijiprü ashah khyüsohre; arüh kihku lang nyitsarünü kohre. Ih, Abüdongba-nü choko.”

²⁵ Akohba Abüdongba, Israel Tsingrang-nü yore, “Ihnü Thebes tsingrang Amon yola Ijip, abi tsingrangti ko yangthsarü zeh khingchinung.

²⁶ Ihnü Ijip yangthsaba ko abi chah longlangrü apüm khyünung ko arüh rorüh Babylon yangthsaba Nebukadnezar kheh la jünung. Ta akhanglang, papade kyo, müyurünü thali Ijip la linung. Ih, Abüdongba-nü choko.”

Abüdongba -nü Amüyurü Khümchonung

²⁷ “I müyurü, tüdrü, Israelrü, tüneh. Ihnü nührü ashu lih lanü khümchonung, nührü rangyoh liba lih lanü. Nührü kulang thali ronung ko yangtsa la linung; nührü khümcho linung, sünüsü nührü müdrüsohnung.

²⁸ Ih nührü yang ronung ko nührü khümchonung. Nührü tsisho lisohba yuchoti apüm Ihnü changjünung, ta nührülü müchangjünung. Ihnü nührü mükhingchipü müpehjünung; ta Ihnü khingchide, Ihnü tsa bichinung. Ih, Abüdongba-nü choko.”