JEREMIA 44 - AMÜSA BAIBEL (BSI)

Ijip la Israel yang Abüdongba Yusi

¹ Abüdongba-nü Ijip la lirü Israelrü, Migdol, Tapanes ko Memfis yangditila lirü ko kihjing lahpi lirü nengdang Ite chotacho.

² Akohba Abüdongba, Israel Tsingrang-nü yore, “Jerusalem la ko Juda la yangditi chah Ihnü achangba hirocho nührübürünü nguko. Ade yingcheh hütsüri thsangnyang lile, ko hütsürila lirü süsü mühle,

³ tunüo arüh nyitsarünü amünyi nguchicho ko Ih rihlong chürosohcho. Arühnü apa tsingrangti khyang kangmübü mübücho ko arühnü nührü ko nührü jümürünü mii mümübücho tsingrang dikehcho.

⁴ Ihnü nührü yang I dikehrü azikehrüti mütozah rosohcho, arühnü nührü te Ihnü thrünyiba adrünung nguchiti münguchinung yocho.

⁵ Ta nührünü mühnyi mahkhang münguchi. Nührünü aparü tsingrangti khyang amünyi yangthsa kangmübü jüba müpehcho.

⁶ Hütsü khu Juda yangditi ko Jerusalem yanglongla I zii ko rihlong mükhakehjücho ko Ihnü arüh chah michang thsürangjücho. Arüh thsangnyang pehjücho ko chünye yingcheh adrünung kang lile.

⁷ “Hütsünü Ih, Akohba Abüdongba, Israel Tsingrang-nü tuepü nührübürü chah amünyi nguchiropü ade tsingdhingre. Nührü nyitsarü süsü nying mülinungthsa nührü adhrerü, khingkurü, azarü ko akhungarüti chah achangba hirosohnyürü mah-o?

⁸ Nührü linung roba Ijip hila kyothri mübü ko apa tsingrang khyang kangmübü jo tuepü nührünü Ih rihlong chürosohcho? Limih la yucho apümnü nührü münyüjo ko nührü neng chokehchola thsa bichisoh nührübürü changsohnung hi nührünü nguchirü do?

⁹ Nührü jümürü, Juda yangthsarü ko arüh nitpürü, nührü ko nührü nitpürünü Juda yangditila ko Jerusalem yanglongla amünyi nguchi nguchicho nührünü nbüchü pehcho do?

¹⁰ Ta chünye yingcheh nührünü longlüm mükangre. Nührünü Ih müdrüre mahkhang Ihnü nührü ko nührü jümürü khyang jüba yuzeng la müli.

¹¹ “Hütsünü, Ih, Akohba Abüdongba, Israel Tsingrang-nü nührü nyümnung ko Juda apüm changjünung.

¹² Anyingrü Judarü ko Ijip la wü linung dhrongchehrü nengdang tsü, Ihnü arüh apüm changsohnung. Arüh aikyah ko amülahrü apüm, chitalanye ko yangkongnünye Ijip la sünung. Arüh tsü adrünung kangnung; nyitsarünü arüh münyüjo ko arüh neng chokehchola kang bichinung.

¹³ Ihnü Jerusalem chita, yangkong ko dhsaranü khingchicho roh-i, Ijip la lirüti Ihnü khingchinung.

¹⁴ Judarü Ijip lang ronü lirüti süsü akang mütsichehnung. Arühnü thali wü linyüba Juda lang arüh khüdusü müthalinung. Atsichirü azikyah chah khu süsü müthalinung.”

¹⁵ Hütsüde arüh nitpürünü apa tsingrangti khyang kangmübü jükopü müdheba adhrerü atümungnü ko hütsüla yarü khingkurü atümung, Ijip kihjinglang lirü Israelrü, amülung arangchehnü Ite yocho,

¹⁶ “Nühnü Abüdongba nengla yocho ihrünü mühnyinung.

¹⁷ Ihrünü nguchinung nyengchocho lüpcho ihrünü nguchinung. Ihrü ko ihrü jümürü, ihrü yangthsaba ko ihrü langnürütinü Juda yangditila ko Jerusalem yanglongla nguchicho kyo, ihrünü Ning yangthsalatpü khyang kangmübü jünung ko abükyü chah ihrü yongkha tungkeh amübü jünung. Hütsüde ihrü tsuyongnung thangchi licho, ihrü müwa licho ko tu dhsangthsi mülicho.

¹⁸ Ta ning tsingranglatpü khyang kangmübü ko yongkha mübü müjütinü, ihrü iilümre ko ihrü müyurü chitala ko akongchonü sükhangre.”

¹⁹ Ko khingkurünü lahkeh yocho, “Ihrünü tsingranglarü tsah kyo hümdhse külüpde, abükyü khyang kangmübü jüde, ko yongkha mübü tungkehjü jüde, ihrünü nguchiba tsü ihrü niirünü khyüchore.”

²⁰ Hütsüde Ite hiroh-i lalingrü khingkurü adhrerü apüm te yocho,

²¹ “Nührü ko nührü jümürü, nührü yangthsaba ko langnürüti ko müyurünü Juda yangditi ko Jerusalem yanglongla mübüba kangmübü nengdang tsü, Abüdongba-nü hütsüri mümüdhe mahkhang nbüchükopü lümrü do?

²² Chünye nyümong nührü lih thsangnyang lile ko hütsüla süsü mülire. Hütsü adrünung kangko ko nyitsarünü abi neng tsü chokehchola kang bichire, tunüo nührü münyi nguchi adelü Abüdongba-nü mürangchore.

²³ Ade chihba achangba hi nührünü apa tsingrangti khyang kangmübü jo ko Abüdongba yuzeng apüm mübichipü Abi nyüm amünyi shitpahcho ngang lile.”

²⁴ Ihnü nyitsarü apüm te, Akohba Abüdongba, Israel Tsingrang-nü Ijip la liyarü Israelrü te tu yoro, hütsü alathsa khingkurü te yocho:

²⁵ “Nührü ko nührü nitpürünü Ning yangthsalatpü te yuchüm nyengchoko. Abükyü khyang kangmübü jünung, abükyü chah yongkha mübü tungkehjü jünung nyengchoko ko hütsü nührünü yohpüko. Dee tsale, nührü nyengchocho tsü yohpüng! Nührü yuchüm yohpüng!

²⁶ Ta ade, Ih Abüdongba-nü Ih Akohba nengla nührü Ijip la lirü Israelrü te külüpba yuchüm hi nyieng: Akang liba Tsingrang nengla yuchümrepü khodesü I nengla yuchümnung Ihnü mümülanung.

²⁷ Nührü mümüwajünung ta changjünung. Nührü apüm chitala mahkhang dhsaranü sünung.

²⁸ Ta nührü khürü asü lanü tsicheh Ijip lanü Juda lang thali ronung. Hütsüde nying lirütinü sü yu yuje tikehchonang müdhenung.

²⁹ Ihnü nührü hiba müdümla khingchinung ko nührü chah achangba rosohnung yoba tsü tikehsohnung. Ih, Abüdongba-nü yuzi jünung.

³⁰ Ihnü Juda yangthsaba Zedekia abi rorüh Babylon yangthsaba Nebukadnezar kheh la jücho kyo, Ijip yangthsaba Hofra abi rorüh kheh la jünung.”