JEREMIA 43 - AMÜSA BAIBEL (BSI)

Jeremia Ijip lang Nowücho

¹ Ihnü arüh te Abüdongba arüh Tsingrang-nü arüh te yonung Ih müthehcho yu apüm yokhangcho.

² Hütsüde Hoshaia tsurü Azaria, Karea tsurü Johanan ko kükhingrü nyitsarüti apümnü Ite yocho, “Nüh arahkheh chore. Abüdongba Ihsa Tsingrang-nü ihrü te Ijip lang alinung tüwü pü yonung nüh mümütheh.

³ Ta Babylon-rü khyang ihrü kohsohnung ko ihrü kyüseh mahkhang Babylon lang ihrü notsisohnung, ihrü nyüm Neria tsurü Baruk-nü nüh thsümüsuko.”

⁴ Hütsünü Johanan mahkhang rothsarü adirüti mahkhang müyurü sünüsü Juda la linung Abüdongba yocho münyinung.

⁵ Hütsüta Johanan ko rothsarü anüchirütinü Juda la nying liba ko tsisho liba yuchoti lanü thalirüti apüm:

⁶ adhrerü, khingkurü, azarü ko yangthsaba tsularüti nüpü Ijip lang tsicho. Arühnü anüchiba Nebuzaradan-nü Gedalia khyang dhingyehsohrü, Baruk Ihjü mii zeh notsicho.

⁷ Arühnü yuzeng thsangnyang Tapanes yangdi chii Ijip lang wücho.

⁸ Hütsüla Abüdongba-nü Ite yocho,

⁹ “Lung amülülah khürü hiro Farao kulang züduba trahtri la lungtpahnü khyangba langla thsang pohki rangpüng; ko hütsüta nguchiba tsü Israelrü khürü khyang ngusohng.

¹⁰ Ih, Akohba Abüdongba Israel Tsingrang-nü hiba müdümla I dikehrü Babylon yangthsaba Nebukadnezar noronung ko hiri lung michah abinü yangthsaba pümji külüpnung ko hütsüri michah yangthsaba shükuh müdongnung arüh te young.

¹¹ Nebukadnezar ronung ko Ijip mahchehnung. Sürü dhsaranü sünung thricho arüh dhsaranü sünung, sürü kümtsinung thricho arüh kümtsinung ko sürü chitala sünung mülangjücho arüh chitala sünung.

¹² Ihnü Ijip tsingrangti amübükuh la michang thsürangjünung ko Babylon yangthsabanü arüh tsingrang trüp-pehjünung mahkhang hitsinung. San nyahrünü arüh jengki lanü axah rangpehcho kyo, Babylon yangthsabanü Ijip lih lanü arüh rangchehnung ko akoh ngu tsinung.

¹³ Abinü Ijip la Heliopolis la amüsa nengthsalung thsangnyangjünung ko Ijiprü tsingrangti amübükuhti trüp-pehjünung.”