JEREMIA 42 - AMÜSA BAIBEL (BSI)

Müyurünü Jeremia te Dangkhidangnangjüngpü Kihchicho

¹ Hütsüde rothsarü langnürü apüm ko Karea tsurü Johanan ko Heshaia tsurü Azaria yola hung apüm lanü nyitsarüti zeh ro Ite yocho,

² “Ihrünü nüte kihchicho nühnü nguchijüng! Ihsa Tsingrang te ihrü nengdang kihchijüng. Ihrü nying lirü apüm nengdang dangkhidangnangjüng. Khüdupi ihrü adrong licho ta ade nühnü müdhe ihrü azikyah du nying lile.

³ Ihrü khüde wünung ko tu nguchinung hütsü ihrü te ngusohngpü Ihsa Tsingrang Abüdongba te dangkhidangnangjüng.”

⁴ Ihnü lalingcho, “Dee tsale, nührünü tsingdhingcho kyo Ihnü Ihsa Tsingrang Abüdongba te kihchijünung ko abinü tu yonang Ihnü nührü te yonung. Ihnü tusü rang müyohpünung.”

⁵ Hütsüde arühnü Ite yocho, “Ihsa Tsingrang Abüdongba-nü ihrü nengdang nüte yocho amülaba apüm mübichikhang, ihrü nyüm Abüdongba tsü yuje ko longlangchehba yuzithsasohng.

⁶ Hütsünü ihrü künyangsohnye mükünyangsohnye, nüte ihrü nengdang kihchijünung yoba Abüdongba Ihsa Tsingrang te ihrünü yochonyinung. Ihrünü abi yocho nyikhang ihrü nengdang lüpcho tsa linung.”

Jeremia Dangkhidangnang Lalingcho

⁷ Nyümong dhüre lipü Abüdongba-nü Ite chotacho;

⁸ achotsü Ihnü Johanan, rothsarü anüchirü ko aparü müyurü apüm dsibülungcho.

⁹ Ihnü arüh te yocho, “Abüdongba, Israel Tsingrang sü yang nührünü Ih müthehcho Abinü yore,

¹⁰ ‘Nührünü hiba lih la mütozah linyükhang, Ihnü nührü mükhülusohnung ta khamüsunung; Ihnü nührü mürohchehnung ta khyümnung. Ihnü nührü chah tikehsohba achangba khunü dee wahsohre.

¹¹ Babylon yangthsaba drüba zahng. Ih nührü te lile, ko abi tase lanü Ihnü nührü khümchonung.

¹² Ih yanglilüm kehchonü, abi khyang nührü müi lümsohnung ko nührü kulang thali müthehsohnung. Ih, Abüdongba-nü choko.’

^13-15 “Ta nührü Juda la nying lirütinü Abüdongba nührü Tsingrang yocho mühnyi ko hiba lih la mülinungepü tüyo. Nührünü, ‘Ihrünü wü adelü chita mümütohba, mahkhang chitalang wünung adsiba mahkhang yangkong müliba Ijip la linung pü tüyo. Nührünü hütsüroh-i wü Ijip la linung yokhang, Akohba Abüdongba Israel Tsingrang-nü yore”

¹⁶ Nührünü drüba chitanü nührü iiro yasahnung, ko yangkongnü nührü iironung, ko Ijip la nührü sünung.

¹⁷ Ijip lang wü linung dhrongchehrü apüm chitanü mahkhang yangkongnü mahkhang dhsaranü sünung. Arüh süsü münyingnung, Ihnü hironung achangba lanü khüdusü mütsichehnung.

¹⁸ “Abüdongba, Israel Tsingrang-nü yore, ‘Jerusalemrü chah I zii ko rihlong mükhakehcho roh-i, nührünü Ijip lang wükhang nührü chah I zii ko rihlong mükhakehnung. Nührü adrünung kehnung; nyitsarünü nührü mülangjünung ko nührü neng chokehchola kang bichinung. Ko nührünü hiba müdüm khodesü thali müngunung.’”

¹⁹ “Abüdongba-nü nührü Juda la nying lirüti Ijip lang müwünung yore.

²⁰ Hütsüeko ade nührünü dira thsamehchonü Ihnü nührü müzahsohre. Nührünü Ihsa Tsingrang te kihchinung Ite kihchicho ko abinü tu yonang nührünü nyinung nyengchoko.

²¹ Ko ade Ihnü nührü te yoko, ta Abüdongba Ihsa Tsingrang-nü nührü te yonung rosohcho yu nührünü mühnyire.

²² Hütsüeko, hi lümkehng: nührünü wü linyüba lih la tsü chitala mahkhang yangkong mahkhang dhsaranü nührü sünung.”