JEREMIA 41 - AMÜSA BAIBEL (BSI)

¹ Hütsüba kang choo dhünyeh-ula, Elishama shümtsurü ko Nethania tsurü Ishmael, yangthsaba nah la khiyoh khüdu ko abi pohki dee atungte adirü khüdu Mizpa lang nyüh dhüre nüpü Gedalia shirünung wücho.

² Arüh atümung tsuyong yade, Ishmael ko nyüh dhüre tsünü arüh nohsheng tphahcheh Gedalia kyüsehcho.

³ Ishmael-nü Mizpa la Gedalia yola liyarü Babylon-rü rothsarütisü kyüsehcho.

⁴ Nyümong khüu, Gedalia müpsehcho tsü sünüsü mümüdhe-ede,

⁵ Shekem, Shiloh ko Samaria lanü nyitsarü qure rocho. Arüh benbüh hehpehcho, arüh jengki rehnahcho ko arüh jangjang tsehnahcho. Arühnü Amübükuhlang mübünung tsang ko müchiji hiwücho.

⁶ Achotsü Ishmael-nü Mizpa lanü arüh mütohnung tra chüducho. Khode abinü arüh mütohcho abinü arüh te yocho, “Yanglilüm züro Gedalia shirüng.”

⁷ Arüh yangdila züroyeng, Ishmael ko abi nyitsarütinü arüh kyüsehcho ko arüh me tsü kihkong la zangyohchüpehcho.

⁸ Ta arüh mülung la tsü nyüh dhürenü Ishmael te yocho, “Yanglilüm ihrü tükyüseh! Ihrünü rangmü la litoh, lüdi, olive-tuji ko thsakukih rang yohpüle.” Achotsü abinü arüh mükyüsehcho.

⁹ Ishmael-nü me zangyohchüpehba kihkong tsü dee amülah licho, hütsü Israel yangthsaba Baasha-nü mahde yangthsaba Asa-nü jucho lile. Ishmael-nü kihkong tsü menü jengsohcho.

¹⁰ Hütsüpü abinü yangthsaba tsularüti ko Mizpa la anüchiba Nebuzaradan-nü Gedalia pohki yohpüjüba nyitsarüti apüm rang notsicho. Ishmael-nü arüh arangyohrü kangsoh Amon lang notsicho.

¹¹ Johanan ko abi yola liba rothsarü anüchirütinü Ishmael-nü nguchiba tsü yuchicho.

¹² Achotsü arühnü abi iiwücho ko Gibeon la changtphü arangcheh te abi iiphücho.

¹³ Khode Ishmael-nü küm tsirünü Johanan ko abi yola anüchirüti ngucho, arühnü künyangcho,

¹⁴ ko ximüla arüh yang shang wücho.

¹⁵ Ta Ishmael ko abi yola nyüh kehlü Johanan tenü Amon lang rang tsicho.

¹⁶ Hütsüde Johanan ko rothsarü langnürütinü Ishmael-nü Gedalia, rothsarüti, khingkurü, azarü ko axangmichoti kyüsehpü Mizpa lanü arangyohrüti notsirü arühnü xükümcho.

¹⁷ Babylon yangthsabanü governor kangsohba Gedalia tsü Ishmael-nü müpsehcho khu arühnü Babylon-rü drücho.

¹⁸ Achotsü Babylon-rü dronü arühnü Ijip lang shemüsucho. Langla arühnü Bethlehem shündhün Chimham la nyehkehcho.