JEREMIA 40 - AMÜSA BAIBEL (BSI)

Jeremia Gedalia Yola Licho

¹ Anüchiba Nebuzaradan-nü Ih Rama la lehcheh müthehko khanglang, Abüdongba-nü Ite chotacho. Ih hütsüla Jerusalem ko Judarü Babylon lang küm tsirü yola ixilihnü xohpü nowücho.

² Anüchiba tsünü Ih nükhu yocho, “Abüdongba nü Tsingrang-nü hiba lih nengdang achangba choyohcho,

³ ko ade abinü yocho kyo nguchiko. Nü nyitsarünü Abüdongba nyüm amünyi shitpahcho ko abi yu mühnyicho ngang hiri apüm tikehre.

⁴ Ade, nü khehlanü Ihnü ixilih khyüchehjüre ko nüh lehchehre. Nühnü Babylon lang I yola wünyükhang nüh ronung kohle, ko Ihnü nüh xükümnung. Ta nühnü müronyükhang türo! Nü nengdang limih apüm lile, ko nü wünyücholang wünung kohle.”

⁵ Ihnü mülalingülü, Nebuzaradan-nü yocho, “Shafan shümtsurü ko Ahikam tsurü Gedalia, sü Babylon yangthsabanü Juda yangdila governor kangsohcho, abi yang thali wüng. Nühnü abi te müyurü yola linung kohle, mahkhang nüh khüde wünyüro masülang wünung kohle.” Hütsüpü abinü I khyang jiyü khüdu ko tsuyongba jücho, ko Ih tsisohcho.

⁶ Achotsü Ihnü Mizpa la Gedalia te linung wücho ko nying liba müyurü yola licho.

Juda Governor Gedalia

⁷ Judarü adirü ko rothsarü khürü mühap-pü licho. Babylon yangthsabanü Gedalia tsü governor kangsohko ko Babylon lang mükümtsirü alih la ailümrüti abi khyang xükümsohcho arühnü yuchicho.

⁸ Achotsü Mizpa la Gedalia yang arüh nyitsarü nüpü Nethania tsurü Ishmael, Karea tsurü Johanan, Tanhumeth tsurü Seraia, Netofa lanü Efai tsurü ko Maka lanü Jezania-rü wücho.

⁹ Gedalia-nü arüh te yocho, “Nührünü Babylon-rü kheh la hapnung drü linung müdhsütah pü Ihnü nührü te yore. Hiba lih la lieng, Babylon yangthsaba dikehng, ko nührü tu müthsanung.

¹⁰ Ipusü Mizpa la linung ko hila Babylon-rü rode nührü nengla chotanung. Ta nührü liba yangdongtila nührünü yongkha, singsih ko olive tuji khyübülung zahkehng.”

¹¹ Hütsütade Moab, Amon, Edom ko apa yangditila liba Israelrünü, Babylon yangthsabanü Israelrü khürülü Juda la lisohcho ko arüh michah Gedalia tsü arüh governor kangsohcho yuchicho.

¹² Achotsü arühnü arüh tsisho liyaba müdümti pehjücho ko Juda lang thalicho. Arühnü Mizpa la Gedalia yanglang rocho ko hütsüla yongkha ko singsih khütang khyübülung jücho.

Gadalia Kyüsehcho

¹³ Hütsüpü, mühap-erü Johanan ko langnürütinü Gedalia yang Mizpa la rocho,

¹⁴ ko abi te yocho, “Amon yangthsaba Baalis-nü nüh müpsehnung Ishmael rosohcho nühnü mümüdheo?” Ta Gedalia-nü müyudsicho.

¹⁵ Hütsüde, Johanan-nü abi te rangnü yocho, “Ihnü wü Ishmael kyüsehnung, ko hütsü sününang bürünü mümüdhenung. Tuepü abi khyang nüh müpsehsohnung? Hütsünü nüh mükang shibülung liba Jihudarü hi apüm tsishosohnung, ko Juda la nying liba nyitsarü apüm yang achangba hironung.”

¹⁶ Ta Gedalia-nü lalingcho, “Doh! Nühnü Ishmael nengdang yoba tsü yuje mah!”