JEREMIA 4 - AMÜSA BAIBEL (BSI)

Lasih Thsamülanung Dsicho

¹ Abüdongba-nü yore, “Israelrü, nührünü ximülaekhang, Ih yang ximülaang. Nührünü Ite yuje chokhang ko Ihnü thrünyiba kyothri tsü pehkhang,

² nührünü I nengla yuchümnung tsü athsalang linung. Hütsüde yucho apümnü arüh müwajüng pü Ite kihchinung ko arühnü I neng senung.”

³ Abüdongba-nü Judarü ko Jerusalemrü te yore, “Nührü luh tsü mükyünahng; majüh tsü zengtrungla tüshu.

⁴ Nührü anyengchotaba tsü Ih nührü Abüdongba te yohpüng, ko nührü jangjang Ite müsachehng, nührü Judarü ko Jerusalemrü. Hütsü mahkhang nührünü amütsa nguchicho ngang michang kyo I rihlong chüronung. Hütsü trüpnung ko amehsohrü süsü mülinung.”

Juda Mahnung Yocho

⁵ Rühti tsü limih apümlang mehng! Tasenü tsidsa züdeing. Judarü ko Jerusalemrü te atbüticho yangditilang tsinung young.

⁶ Zion wüba lang thongung! Tsichehnung shang! Tümünu! Abüdongba-nü kihku lahpinü achangba ko athsangnyang amülah hirole.

⁷ Kihkhünying akuh lanü chürorü kyo, yuchoti changjürü khüdu shemüsuko. Abi Juda changjünung rore. Juda la yangditi changjünung, ko hütsürila süsü münyingnung.

⁸ Hütsüeko müyahshü müpieng ko traang, tunüo Juda chahnü Abüdongba rihlong mükhyümüi.

⁹ Abüdongba-nü yocho, “Hütsü nyümong yangthsarüti ko adirüti suzahnung; bebürüti nehnung ko azikehrüti nyemüyangnung.”

¹⁰ Hütsüde Ihnü yocho, “Akohba Abüdongba, Nühnü Jerusalemrü khüdupinü kihyochüko! Hütsüla yangtsa chüronungepü Nühnü yocho, ta arüh hong la nohsheng lile.”

¹¹ Jerusalemrü te lipilih lanü nyübong adhsa arüh yang folepü yonung becho chihle. Hütsü mayü fopehba alonglüm nyübong müthsanung.

¹² Abüdongba-nü mülajü rosohba nyübong tsülü deenü aziu thsanung! Hi Abüdongba apunü apu müyurü chah yukhaba seyohjüre.

Arorühnü Juda Mükangticho

¹³ Dhing, arorüh tsü nyükhi kyo role. Abi khata kuri tsü nyübong roh-i ko abi kuriti tsü müdi tenü adsayaba. Ihsa changko! Ihsa ahohah!

¹⁴ Jerusalem, nührü khümchonungthsa, nührü lasiking lanü amünyi tsü thsütohpehng. Kükhya nührünü amünyi du lüm linung?

¹⁵ Dan yangdi ko Efraim zong langnü yusi hirünü yusi amütsa züdecho.

¹⁶ Yuchoti te ko Jerusalemrü te limih ashulanü arorüh tsehlepü yonung rocho. Arorüh hirinü Juda yangditi nyüm züdenung

¹⁷ ko nyitsarünü luh nyahcho kyo arühnü Jerusalem betinung, tunüo abükyü müyurünü Abüdongba nyümko. Abüdongba nü choko.

¹⁸ Nü lili ko nü nguchinü nübükyü michah hiri hirore. Chongcha hi nü münyinü hirore; hütsünü nü lasih khakhu chiiko.

Jeremia Longricho

¹⁹ Adhsa! Adhsa tsü Ihnü mürangcho! I lasih! I lasih khütang thüthohle! Ihnü yaa mülicheh; Ihnü rühti yuva ko khata yuva yuchire.

²⁰ Achangba khüdu khanglang khüdu; Yanglih apüm chang pehjüko. Dhrongyengnü Ihsa shükuh thsangnyangko; Akitising rohzangzangko.

²¹ Rothsacho kükhya ngunung ko rühti yuva kükhya yuchinung?

²² Abüdongba-nü yore, “I müyurüti adohrü; arühnü Ih mütsüp. Arüh amükhyu zati kyole; arüh anyichehba mühle. Amünyi nguchinungla arüh asithsa, ta atsalü münguchicheh.”

Jeremia Müngucheh

²³ Ihnü limih chah dhingcho hütsü apehcho adeng; ningchah dhingcho, atsingse mülicho.

²⁴ Ihnü azongtichah dhingcho, arüh dhridhri yacho, ko akhang tsü shühchi ngucho.

²⁵ Ihnü nyitsarü li müngu; Uza mii mong tsikhangcho.

²⁶ Asu lih tsü lipilih kangpehcho; yangditi changpeh ngucho, hütsü Abüdongba rihlong khunü.

²⁷ (Limih apüm apehlih kangpehnungepü Abüdongba-nü yo licho, ta hütsü Abinü ririlü müchangjünung.)

²⁸ Limihnü meshünung; Ning marürah kangpehnung Abüdongba-nü chopehko ko Abi lasih mümülichinung. Abinü dhrongchehpehko ko müximülanung.

²⁹ Kuri chah pümrü ko singthsalu birü yuva yuchi atümungnü rang tsinung. Khürü müronglang tsinung; khürü lungrah la rangnung. Yangdi apüm pehjünung, ko hütsürila süsü thali mülinung.

³⁰ Jerusalem, nüh ahohah! Tuepü amoh jengkiro? Tuepü thsidilung yohro ko nü nahküp tühro? Nühnü adeng nengdang nü tsah külüpre. Nü müitarünü nüh mükhyücho ko nüh kyüsehnyüre.

³¹ Ihnü yuva khüdu yuchire, khingkurü mikhungde kyo, khingkurü akhudi azarü surode rühchicho kyo. Hütsü Jerusalem sah chichicho yuva, akheh müyungchü hita yocho, “Ih changkako! Arüh Ih kyüsehnung tsehle!”