JEREMIA 39 - AMÜSA BAIBEL (BSI)Jerusalem Khülucho 1 Juda la Zedekia yangthsacho kang adüku-u choo adhüreula, yangthsaba Nebukadnezar-nü arothsarü apüm nüpü ro Jerusalem mahcho. 2 Zedekia yangthsacho kang dhürekheh, choo müyü ko nyümong adüku-ula, yangdi tbü tsü khülucho. 3 (Khode Jerusalem mahchehcho, Babylon yangthsaba pohki adirüti rocho ko arühnü alonglaba Tbükhüm ko Nergal Sarezer, Samgar Nebo, Sardekim ko aparü Nergal Sarezer zehnü pümcho) 4 Tikehyaba tsü yangthsaba Zedekia ko abi rothsarütinü ngude, arühnü yangdila tsünü amalanü rang tsinyücho. Arühnü yangthsarü tbü langla tsünü tbü anyüh shirütaba tbükhüm tsü khu wücho, ko Jordan Ngahlang tsü rang tsicho. 5 Ta Babylon rothsarütinü arüh iiwücho ko Jeriko shündhün angah la tsünü Zedekia tsü rangcho. Ko arühnü Zedekia tsü yangthsaba Nebukadnezar yang Hamoth lih la Ribla yangdi lang nowücho, ko hütsüla Nebukadnezar-nü abi yu khacho. 6 Ribla la Zedekia apunü dhingya atsurüti süsohcho, ko abinü Judarü adirütisü kyüsehcho. 7 Hütsüpü, Zedekia nah hehchehpehsohcho ko Babylon lang xohpü nowüsohcho. 8 Hütsüde Babylon-rünü yangthsaba kuh ko müyurü kuh trüp-pehjücho ko Jerusalem tbü tphahtsucho. 9 Achangkathsa anüchiba Nebuzaradan-nü yangdila nying lirü tsü abi yanglang tsirorü yola Babylon lang küm nowücho. 10 Abinü kuthsi mülirü ailümrü khürü du Juda la pehjücho, ko abinü arüh khyang shükusih yo ko luh jücho. Jeremia Müthehcho 11 Ta yangthsaba Nebukadnezar-nü yuzeng hiri jünung anüchiba Nebuzaradan khyang jücho: 12 “Wüng ko Jeremia yangching ko abi dee tsa xüküm. Abi tüdhsakehjü, ta abinü tu khyünyüro hütsüta nguchijüng.” 13 Hütsüpü Nebuzaradan ko adirü Nebushazban ko Nergal Sarezer ko Babylon yangthsarü pohki adirütinü 14 yangthsaba kekhüm la tsünü Ih norocho. Ih kuh chihcho dhingyehnung Shafan shümtsurü, Ahikam tsurü Gedalia kheh la Ih yohpüjücho. Hütsüta müyurü yola Ih licho. Ebedmelek nengdang Alongdi 15 Ih yangthsaba kuh la arangyoh la liyade, 16 Abüdongba-nü Ite Ethiopiarü Ebedmelek te Abüdongba, Israel Tsingrang-nü hita yorepü yosohcho, “Ihnü nguchinung yocho kyo, hiba yangdi chah amüwa mah ta achangba hironung. Ko hi tikehde, hütsü ngunungthsa nüh hütsüla linung. 17 Ta Ih, Abüdongba-nü nüh tsungtinung ko nühnü drüba nyitsarü kheh la nüh müjünung. 18 Ihnü nüh khümcho yohpünung, ko nüh müsüsohnung. Nüh akang tsichehnung tunüo nühnü I chah longlangcho. Ih, Abüdongba-nü choko.” |
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
Bible Society of India