JEREMIA 38 - AMÜSA BAIBEL (BSI)

Jeremia Akung Kihkong la

¹ Madan tsurü Shefatia, Pashur tsurü Gedalia, Shelemia tsurü Jehukal, ko Malkia tsurü Pashur hirinü, Ihnü Abüdongba-nü hita yocho müyurü te yocho yuchicho,

² “Sünü emüthsa yangdila tsü liyanang abi chita mahkhang yangkong mahkhang dhsaranü sünung. Ta sünü wü Babylon-rü chah hapnang abilü mükyüsehnung; abi akang khümchonung.”

³ Abüdongba-nü yocho Ihnü arüh te hisü yocho, “Ihnü yangdi tsü Babylon-rü rothsarü kheh la jünung ko arühnü hütsü kohcheh khyünung.”

⁴ Hütsüde adirütinü yangthsaba yanglang wü yocho, “Nyitsarü hi süsohng. Hita chocho khunü yangdila rothsarüti müci sümsohre, ko yangdila nying lirü apüm hütsüta kangre. Abinü müyurü tronung mahpü arüh dhsakehjünung du müküpre.”

⁵ Yangthsaba Zedekia-nü lalingcho, “Dee tsale, nührünü lümcho kyo nguching; Ihnü nührü müyatire.”

⁶ Hütsünü arühnü Ih nowü yangthsaba kuh la Malkia kihkong la rangdüshü chahnü Ih züdusohcho. Kihkong la tsü chongbong chah khu kih müzehcho, ko Ih dhrümrangcho.

⁷ Ta, yangthsaba kuh la nguchirü, axangmicho Ethiopiarü Ebedmelek-nü Ih arühnü kihkong la züdusohkopü yuchicho. Hütsütade yangthsaba tsü Benjamin Tbükhüm la yukha pümcho.

⁸ Achotsü Ebedmelek-nü yangthsaba yanglang wü yocho,

⁹ “Adibong, hiri nyitsarünü nguchiba tsü amülange. Arühnü Jeremia rangpü kihkong la dhiyohchüpüle, hütsüla abi ayangchonü süriri, tunüo yangdila tsuyongnung mühle.”

¹⁰ Hütsüde yangthsabanü Ebedmelek yola nyüh asang nüpü ro Ih müsü denü kihkong la tsünü tphahchehnung mülacho.

¹¹ Achotsü Ebedmelek-nü nyitsarüti tsü nüpü ro yangthsaba kuh la azahkehjila tsünü shüthreh hirocho ko abinü hütsü rangshü chahnü Ih yang khyüyohchüjücho.

¹² Abinü Ite rangshü tsünü Ih müdhsakehnung nengdang shüthreh tsü I khüyahla yohnung yocho.

¹³ Ihnü hütsüta nguchicho ko arühnü kihkong la tsünü Ih tphahchehcho. Hütsüpü arühnü Ih kekhüm la tsü yohpücho.

Zedekia-nü Jeremia te Lümlong Chingcho

¹⁴ Apa bekhyah khüdula yangthsaba Zedekia-nü Ih abi yanglang amübükuh trahtri asangubala norosohcho, ko abinü yocho, “Ihnü nüte lango tsingdhingnung, ko nühnü Ite yuje young.”

¹⁵ Ihnü lalingcho, “Ihnü nüte yuje tsü yokhang, nühnü Ih süsohnung, ko Ihnü nü khyang lümlong jükhang, nühnü mühnyinung.”

¹⁶ Hütsüde yangthsaba Zedekia-nü rang Ite nyengchocho, “Ihsa khyang akang jüba akang liba Tsingrang nengla Ihnü nüh müsüsohnung mahkhang nü rorüh kheh la müjünungepü Ihnü yuchümre.”

¹⁷ Achotsü Akohba Abüdongba, Israel Tsingrang-nü yocho tsü Ihnü Zedekia te yocho, “Nühnü Babylon-rü adirüti chah hapkhang, nü akang khümchonung, ko hiba yangdisü mütrüp-pehnung. Nüh ko nü kukhi anyüding khümchonung.

¹⁸ Ta nühnü arüh chah mühapkhang, hiba yangdi hi Babylon-rü khyang jünung ko arühnü trüp-pehjünung ko nühsü arüh khehlanü mütsichehnung.”

¹⁹ Ta yangthsabanü lalingcho, “Ihnü Ihsa nyitsarü Babylon lang rangkhu tsirü drüre. Ih arüh kheh la jo dhsümthsenung kohle.”

²⁰ Ihnü yocho, “Nüh arüh kheh la müjünung. Abüdongba yu nyinung Ihnü nüte kihchire; khang lüpcho tsapenung, ko nü kangsü khümchonung.

²¹ Ta nühnü mühapkhang tu tikehnung Abüdongba-nü I khyang münguchehsohko.

²² Hütsüla, Juda yangthsaba kuh la pehjüba khingkurü apüm Babylon adirüti ko yangthsaba yang nowücho Ihnü nguko. Arüh tside arühnü tu yocho hi nyieng: “Yangthsaba ashangrü atsaubanü abi nümülako, arühnü abi kohko. Ko ade abi jing chongbongla dhrümrangko, abi shangrütinü abi pehjüko.”

²³ Hütsüde Ihnü yocho, “Nührü khingkurüti ko tsuzarüti apüm Babylon lang nowünung, ko arüh khehlanü nüpu mii mütsichehnung. Nüh Babylon yangthsabanü arangyohrü kang nowünung ko hiba yangdi hi alih chah rongkeh trüpnung.”

²⁴ Zedekia-nü lalingcho, “Ihjü chotaba hi sü khyangsü tümüdhesoh, ko nü kang dhsürüla mülinung.

²⁵ Ihnü nüte chotako pü I pohki adirütinü yuchikhang, arühnü nüh yang ro ihjü tu chotacho pü tsingdhingnung. Nühnü arüh te lüpcho yokhang nüh müsüsohnungepü arühnü nyengchonung.

²⁶ Nüh thali akhangtikuh hütsüla tümütheh pü Ite kihchichoepü young.”

²⁷ Hütsüpü adirüti apüm I yanglang ro tsingdhingcho, ko Ihnü arüh te yangthsabanü yocho roh-i du yocho. Arühnü tu münguchichehcho, tunüo sünüsü achotacho tsü müyuchicho.

²⁸ Ko Jerusalem mahchehba yingcheh Ih yangthsaba kekhüm la yohpücho.