JEREMIA 37 - AMÜSA BAIBEL (BSI)

Zedekia-nü Jeremia te Kihchicho

¹ Babylon yangthsaba Nebukadnezar-nü Josiah tsurü Zedekia tsü Jehoiakim tsurü Jehoiakhin mülih Juda la yangthsaba kangsohcho.

² Ta Abüdongba-nü I khyang jüba yusi tsü Zedekia, abi pohki adirüti mahkhang müyurü sünüsü mühnyicho.

³ Yangthsaba Zedekia-nü ihrü yucho nengla Abüdongba ihrü Tsingrang te dangkhidangnangjüng pü Ih yang Shelemia tsurü Jehukal ko Maseia tsurü bebürü Zefania nyüh rosohcho.

⁴ Ih hütsütadelü arangyoh la mürangyoh-e, müyurü yola alümxü mülipü rachiba bekhyah thsacho.

⁵ Babylon rothsarütinü Jerusalem mah yacho, ta Ijiprü rothsarüti lurü khu rocho yuchide, arühnü shehlicho.

⁶ Hütsüde, Abüdongba, Israel Tsingrang-nü Ite Zedekia te hita yosohcho,

⁷ “Ijiprü rothsarü nü tronung role, ta arühnü thalinung.

⁸ Hütsüpü Babylon-rü thali ronung, yangdi tsü mahnung, kohchehnung, ko trüp-pehjünung.

⁹ Babylon-rü thali müronungepü lüm nührü jangjang tükiyohchü pü Ih, Abüdongba-nü nührü müzahsohre, tunüo arüh ronung.

¹⁰ Nührünü Babylon-rü rothsarü tsü kohpü shükuh la dhsakehrü du pehjünye, arüh tsü shemüsulinung ko hiba yangdi hi alih chah rongkeh trüpnung.”

Jeremia Rang Khangticho

¹¹ Babylon-rü rothsarüti Jerusalem lanü shehlicho, tunüo Ijiprü rothsarü chii rocho.

¹² Achotsü Ihnü Jerusalem pehjüpü Benjamin lih lang tsutpu thsiking I nohlüm khyünung wünung shemüsucho.

¹³ Ta khode Ih Benjamin Tbükhüm chihcho, hütsüla anyahrü rothsarü yola anüchiba, nyüh khüdu, Hanania shümtsurü ko Shelemia tsurü anengnü Irija, abinü Ih yati yocho, “Nüh Babylon lang rang tsile!”

¹⁴ Ihnü lalingcho, “Hütsüta mah! Ih rang tsirü mah.” Ta Irija-nü Iyu mühnyicho. Abinü Ih rangcho ko adirüti yanglang nowücho.

¹⁵ Arühnü Ite rihlong chürocho ko Ih lahpü yukha athrahba Jonathan kuh tsü arangyoh kuh kangsoh Ih hütsüla khangtinung yuzengjücho.

¹⁶ Ih alihyonglang akhangtila anyahli yohpücho.

¹⁷ Akhanglang yangthsaba Zedekia-nü Ih dsinung müthehcho, ko yangthsaba kuh la abinü Ite rang tsingdhingcho, “Abüdongba chahnü yusi tu mülio?” Ihnü lalingcho, “Lile,” “Nüh Babylon yangthsaba kheh la jünung.”

¹⁸ Hütsüde Ihnü abi te tsingdhingcho, “Ih akhangtila yohpünungthsa, Ihnü nüh, nü pohki adirüti ko müyurü nyüm tu thsamehcho?”

¹⁹ Babylon yangthsabanü nüh ko nü yucho mümahnungepü nüte yoba azikehrü chah tu tikehcho?

²⁰ Ko ade, Nüh Adibong, Iyu nyieng ko Ihnü tsingdhingcho nguching pü Ihnü kihchire. Yanglilüm Jonathan kuh arangyohlang Ih thali tüwüsoh. Nühnü Ih wüsohkhang, yuje Ih hütsüla süriri.”

²¹ Hütsünü yangthsaba Zedekia-nü Ih yangthsaba kuh la khangtinung yuzengjücho. Ih hütsüla licho, ko nyümong mükhu I khyang yangdila hümdhse müthümde hümdhse khüdu-khüdu tüpcho.