JEREMIA 36 - AMÜSA BAIBEL (BSI)

Amübükuh la Baruk-nü Thrahloh Khicho

¹ Juda la Josiah tsurü Jehoiakim yangthsacho kang müyüu la, Abüdongba-nü Ite yocho,

² “Thrahlohcho khüdu hirung ko hütsüla Israel, Juda ko yucho apüm nengdang Ihnü nüte tuturü yocho hütsüri apüm thrahng. Josiah yangthsathsaba tinü ade tizah la Ihnü nüte chotacho lüpcho thrahng.

³ Judarünü Ihnü arüh chah hironung licho achangba hiri apüm yuchide, kümüdeo arühnü arüh amünyi lang apüm lanü ximülanung. Hütsükhang Ihnü arüh khürah ko arüh münyi mülangpehjünung.”

⁴ Achotsü Ihnü Neria tsurü Baruk dsiro Abüdongba-nü Ite yocho lüpcho yo thrahsohcho. Ko Baruk-nü hütsüri apüm thrahloh khüdula thrahyohcho.

⁵ Hütsüpü Ihnü Baruk khyang athülaba hiri jücho: “Ih adelü Amübükuh la müzüdusohre.

⁶ Hütsüeko müyurü kongnung bekhyahla tsü Ihnü nüh hütsüla wüsohnyüre. Ite Abüdongba-nü yocho ko Ihnü nüte cho thrahsohcho lüpcho arüh khyang yuchisohnung, nühnü thrahlohcho tsü tasenü khi young. Yangditi lanü roba Judarü ko aparü apümnü yuchisohnung hütsüta nguching.

⁷ Kümüdeo arühnü arüh münyi lang lanü ximüla Abüdongba te dangkhidangnangnung, tunüo Abüdongba-nü hiri nyitsarü Abi adrünung zii ko rihlongnü mütichiko.”

⁸ Hütsüta Ihnü abi te yocho roh-i Baruk-nü Amübükuh la Abüdongba yu tsü khicho.

⁹ Juda la Jehoiakim yangthsathsacho kang münga choo adüku-u la, Abüdongba-nü chomangsohnung müyurünü kongcho. Hiba akongbala tsü Jerusalem la lirü ko Juda yangditi lanü rorüh apümnü zehcho.

¹⁰ Hütsüla müyurü apümnü nyi yade, Baruk-nü thrahlohcho tsü khicho. Abinü hütsü yukhala athrahba, Shafan tsurü Gemaria liba chongsah Amübükuh lanü khicho. Abi chongsah tsü Amübükuh la Tbükhüm Asi trahtri shündhün amungthriba kekhüm la licho.

Thrahloh tsü Adirüti te Khiyocho

¹¹ Baruk-nü Abüdongba-nü yocho thrahlohcho lanü khiba tsü, Shafan shümtsurü ko Gemaria tsurü Mikaia-nü yuchicho.

¹² Hütsüde abinü yangthsaba kuh la, adirüti khiyu kihta pümyaba yukha athrahba chongsahla tsü wücho. Hütsüla athrahba Elishama, Shemaia tsurü Delaia, Akbor tsurü Elnathan, Shafan tsurü Gemaria, Hanania tsurü Zedekia ko aparü adirüti apüm pümcho.

¹³ Baruk-nü müyurü te khide yuchirü apüm te Mikaia-nü yocho.

¹⁴ Hütsünü adirütinü Jehudi (Kushi shümtsurü anyüuba ko Shelemia-rü shümtsurü ko Nethania tsurü) tsü Baruk yang abinü müyurü te khiba thrahlohcho tsü chingnung müthehcho. Baruk-nü arüh khyang thrahlohcho tsü hirojücho.

¹⁵ Arühnü yocho, “Püm ko ihrü te thrahlohcho tsü khi young.” Achotsü Baruk-nü khi yocho.

¹⁶ Abinü hütsü khiko khanglang, arüh-e arührü dhingta Baruk te yocho, “Ihsanü hi yangthsaba te yonung.”

¹⁷ Hütsüpü arühnü abi te tsingdhingcho, “Nühnü hi apüm khüta thrahcho ihrü te young? Jeremia-nü nüte cho thrahsohcho mah-o?”

¹⁸ Baruk-nü lalingcho, “Jeremia-nü yutse apüm Ite chocho ko Ihnü hiba thrahlohcho la ngakinü thrahcho.”

¹⁹ Hütsüde arühnü abi te yocho, “Jeremia nühjü wü rangpehng. Nühjü rangcho sü khyangsü tümüdhesoh.”

Yangthsabanü Thrahlohcho tsü Trüp-pehcho

²⁰ Adirütinü thrahlohcho tsü yukha athrahba Elishama kuh la yohpücho, ko yangthsaba kulang wü abi te lüpcho tsü yocho.

²¹ Hütsüde yangthsabanü thrahlohcho tsü hironung Jehudi müthehcho. Abinü hütsü Elishama kuh lanü hiro yangthsaba ko abi mükang yarü adirüti apüm te khi yocho.

²² Hütsü tsingkang bekhyah thsacho ko yangthsaba tsü abi tsingkang kuh la michang te pümcho.

²³ Jehudi-nü vatpah asang müyü khichi du yangthsabanü hütsü khyo nohchangnü xanahpü michang la yohcho. Thrahlohcho tsü mütrüpkhangde abinü khingchi tahcho.

²⁴ Ta yangthsaba ko hütsü yuchirü adirüti sünüsü müdrü mahkhang tu longri mülicho.

²⁵ Elnathan, Delaia ko Gemaria-rünü yangthsaba te thrahlohcho tsü tüdrüp pü kihchinye, abinü arüh yu tsü mühnyicho.

²⁶ Hütsüpü abinü yangthsaba tsurü Seraia ko Abdel tsurü Shelemia-rü te Ih ko I athrahba Baruk rangnung yuzengjücho. Ta Abüdongba-nü ihrü rangpücho.

Jeremia-nü Thrahlohcho Apa Thrahcho

²⁷ Yangthsaba Jehoiakim-nü Baruk te Ihnü yo thrahsohba thrahlohcho tsü trüp-pehjüko khanglang,

²⁸ Abüdongba-nü Ite thrahlohcho apa khüdu khyo akhudibala zehcho apüm tsü thrahyohnung yocho.

²⁹ Abüdongba-nü Ite hiroh-i yangthsaba te yonung yocho, “Nühnü thrahlohcho tsü trüp-pehjüko, ko nühnü Jeremia te tuepü abinü Babylon yangthsabanü ro hiba lih, müyurü ko kanglungrü changjünung thrahcho pü tsingdhingko.

³⁰ Hütsüeko ade, yangthsaba Jehoiakim, David yanglih la nü chahnü trahchocho sünüsü yangthsa müthsanung. Ih, Abüdongba-nü yore. Nü me tsü anyümong nyünü tahnungla ko aromang müdhrangnü lehsohnung yohpüjünung.

³¹ Nührünü shitpahcho münyi hiri apüm ngang, Ihnü nüh, nü trah ko nü pohki adirüti khingchinung. Nüh, Jerusalemrü ko Judarü sünüsü Iyu mühnyi, hütsünü Ihnü yoba achangba apüm tsü nührü chah küronung.”

³² Hütsüpü Ihnü thrahlohcho apa khüdu hiro I athrahba Baruk khyang jücho, ko Ihnü yocho lüpcho abinü thrahcho. Akhudiba alohbala zehba lüpcho ko Ihnü abi te yocho yusi apüm abinü thrahyohcho.