JEREMIA 35 - AMÜSA BAIBEL (BSI)

Jeremia ko Rekab-rü

¹ Juda la Josiah tsurü Jehoiakim yangthsaba lide, Abüdongba-nü Ite yocho,

² “Rekab hung yanglang wüng ko arüh te chotaang. Hütsüpü arüh tsü Amübükuh chongsah khüdula nozürung ko arüh khyang yongkha tieng.”

³ Achotsü Ihnü Rekab hung apüm, Jazania (apa Jeremia tsurü, Habazinia tsurü) ko anirü ko atsurüti apüm,

⁴ arüh amübükuh yang norocho. Ihnü arüh tsü Igdalia tsurü azikehrü Hanan monoti chongsahlang nowücho. Hiba chongsah tsü Shalum tsurü Maaseia tsurü chongsah michah Amübükuh la atungte khüdu ko aparü adirüti chongsah shündhün licho.

⁵ Hütsüpü Rekab-rü bete tsü shing ko mütpah-tbhü yongkhanü jeng yohpüjüpü arüh te yocho, “Yongkha yong.”

⁶ Ta arühnü lalingcho, “Ihrü yongkha müyongre. Ihrü jümürü Rekab-rü tsurü Jonadab-nü ihrü ko ihrü shümtsurü sünüsü yongkha müyongnung yuzengjücho.

⁷ Abinü adesü ihrü te kuh müthsanung mahkhang luh müthsanung mahkhang shükusih mükhyümnung mahkhang mülihnung yocho. Hiba lih la ihrünü shirü kyo linung nengdang lede shükuh la du linung yuzengjücho.

⁸ Jonadab-nü jücho athülaba apüm ihrünü nyiko. Ihrübürü mahkhang ihrü nitpürü, ihrü tsurü ko tsularütinü khodesü yongkha müyongre.

⁹ Ihrünü alinung kuh müthsare, ihrünü shükuh la lire, ko ihrü shükusiluh, luh mahkhang fürü mühle.

¹⁰ Ihrü jümürü Jonadab-nü tu mülacho hütsüri apüm ihrünü khahkhah yohpüre.

¹¹ Ta Nebukadnezar-nü ihrü yucho mahde, Babylon ko Syria-rü rothsarü tenü rangkhu Jerusalem lang ronung dhrongchehcho. Hütsünü ihrü chünye Jerusalem la liyare.”

¹² Hütsüde, Akohba Abüdongba, Israel Tsingrang-nü wü Judarü ko Jerusalem te hiroh-i yonung yocho,

¹³ “Tuepü nührünü I yocho mühnyicho ko I athülaba mübichiro pü Ih, Abüdongba-nü nührü te tsingdhingre.

¹⁴ Jonadab trahnü abi yu nyi yongkha müyongcho, ko chünye yingcheh arüh sünüsü müyongre. Ta nührü te Ihnü yo du yore, ko nührünü Iyu mühnyi.

¹⁵ Ihnü nührü yang mütozah I dikehrü azikehrü müthehre, ko arühnü nührü te amünyi langti pehjünung ko yuje du nguchinung yore. Ko Ihnü nührü ko nührü jümürü khyang jüba lih la tsü lidu linung nengdang aparü tsingrangti mümübünung ko müdikehnung nührü te müzahsohko. Ta nührünü Iyu mühnyi.

¹⁶ Jonadab trahnü arüh jümürünü jücho amülaba bichiko, ta nührünü Iyu mühnyi.

¹⁷ Hütsünü ade, Ih, Akohba Abüdongba, Israel Tsingrang Ihnü nyengchocho achangba apüm nührü Judarü Jerusalemrü chah hironung. Ihnü hi nguchinung, tunüo nührü te chotacho nührünü mühnyi, ko Ihnü dside nührünü mülaling.”

¹⁸ Hütsüde Rekab hung te Akohba Abüdongba, Israel Tsingrang-nü yocho Ihnü arüh te yocho, “Nührü jümürü Jonadab-nü yuzengjücho nührünü nyiko; abi athülaba apüm nührünü bichiko, ko abinü mülacho apüm nührünü nguchiko.

¹⁹ Hütsünü Ih, Akohba Abüdongba, Israel Tsingrang-nü Rekab tsurü Jonadab chahnü Ih dikehnung lede adhrerü khüdulü trahchosohnung nyengchore.”