JEREMIA 34 - AMÜSA BAIBEL (BSI)

Zedekia Nengdang Yusi

¹ Babylon yangthsaba Nebukadnezar ko abi rothsarü yola abi pohki liba yuchoti ko ahungti zeh, Jerusalem ko mükangmüshü liba yangditi mah yade, Abüdongba-nü Ite chotacho.

² Abüdongba, Israel Tsingrang-nü Ite wü Judarü Zedekia te hita yonung yocho, “Ih, Abüdongba-nü hiba yangdi hi Babylon yangthsaba kheh la jünung, ko abinü hütsü trüp-pehjünung.

³ Nüh mütsichehnung; nüh rangnung ko abi kheh la jünung. Nühnü romih dhsükehta apu te chotanung; hütsüpü nüh Babylon lang nowünung.

⁴ Zedekia, Ihnü nü nengdang tu yoro hi nyieng. Nüh chitala mükyüsehnung.

⁵ Nüh tbachi sünung ko nü müngu yangthsarü nü jümürü dhrürangde müchiji tahcho kyo, arühnü nü nengdang müchiji tahnung. Arühnü nü me tra yonung, ‘Ihrü yangthsaba süko!’ Ih, Abüdongba-nü choko.”

⁶ Achotsü Ihnü hiba yusi hi

⁷ Babylon yangthsabanü Jerusalem mah yade, Zedekia khyang yangdila tsü jücho. Rothsarüti tsünü Juda la nying liba atbüticho yangdi Lakish ko Azeka mah yacho.

Ayurü Kihyocho Bichicho

⁸ Yangthsaba Zedekia ko Jerusalemrünü arühbürü Israelrü ayurü müyohpünung nengdang,

⁹ arüh Ibrirü ayurü khingkurü ko adhrerü lehcheh müthehnung azengchotaba külüpcho.

¹⁰ Azirü ko müyurü apümnü arüh ayurüti müthehnung ko khodesü arüh thali ayurü mükangsohnung nyengchocho.

¹¹ Arühnü arüh müthehcho, ta akhanglang arüh lümlong thsamüla arüh noro thali ayurü kangsohcho.

¹² Hütsüde Abüdongba,

¹³ Israel Tsingrang-nü Ite hiroh-i müyurü te yosohcho: “Ihnü nührü jümürü Ijip lanü nüchehde azengchotaba khüdu arüh te külüpcho ko ayurü suro lanü nüchehcho.

¹⁴ Kang dhünyeh müipi arüh kang dhüroh dikeh rorüh Ibrirü ayurü atümung lehcheh müthehnung Ihnü arüh te yocho. Ta nührü jümürütinü Iyu mühnyicho mahkhang I yocho münguchicho.

¹⁵ Nyümao du tsü nührünü nührü lümlong thsamüla Ih künyangnungthsa nguchicho. Nührü atümungnü nührü jünirü Israelrü müthehnung nyengchocho, ko Ih mübüba Amübükuh la I bete nührünü azengchotaba külüpcho.

¹⁶ Ta nührünü yuje mücho Ih mükhimünguko. Nührünü müthehba ayurüti tsü nührü atümungnü nüli ro thali ayurü kangsohcho.

¹⁷ Hütsüeko ade, Ih, Abüdongba-nü yore, “Nührünü I yocho mühnyi: nührünü nührü jünirü Israelrü khyang arüh nyüje müjü. Tsale, khang, Ihnü nührü khyang nyüje jünung: chita, yangkong ko dhsaranü sünung. Ihnü nührü chah nguchicho ngu limih la yuchoti apümnü drüsohnung.

¹⁸ Juda ko Jerusalem la adirüti yola yangthsaba kuh la xükümrü, bebürü ko langnürütinü misüpung anyüh kang phohrüpcho longla tsü tsehchi Ite azengchotaba külüpko.

¹⁹ Hütsünü Ihnü hiri nyitsarü chah arühnü misüpung chah nguchicho kyo nguchinung.

²⁰ Ihnü arüh rorüh kheh la jünung ko arüh me tsü uzati ko rangmü kanglungrünü tsunung.

²¹ Ihnü Juda yangthsaba Zedekia ko abi pohki adirüti arüh rorüh kheh la jünung. Nührü te chita zahpü liba Babylon rothsarü khyang Ihnü arüh jünung.

²² Ihnü yuzeng jünung, ko arühnü yangdi lang thalinung. Arühnü hütsü mahnung, kohchehnung, ko trüp-pehjünung. Ihnü Juda yangditi tsü süsü mülinungthsa lihpi kangsohnung. Ih, Abüdongba-nü choko.”