JEREMIA 32 - AMÜSA BAIBEL (BSI)

Jeremia-nü Luh khüdu Lihcho

¹ Juda la Zedekia yangthsacho kang dhüreu la ko Babylon la Nebukadnezar yangthsacho kang dhürekeu la, Abüdongba-nü Ite chotacho.

² Hütsü shikhe Babylon yangthsaba rothsarütinü Jerusalem mah yacho ko yangthsaba kekhüm la Ih khangti yohpücho.

³ “Babylon yangthsaba khyang hiba yangdi hi kohchehsohnung,

⁴ ko yangthsaba Zedekia mütsichehnung, pü Ihnü seyohjücho ngang Zedekia yangthsabanü Ih mülangjü khangtipücho. Abi Babylon yangthsaba kheh la züdunung; abinü abi te romih e romihrü dhsükehta chotanung.

⁵ Zedekia tsü Babylon lang notsinung, ko Ihnü abi te müshirü yingcheh abi hütsüla linung. Babylon-rü te chitanye abinü mükohnung. Ih, Abüdongba-nü choko.”

^6-7 Iu azaba Shalum tsurü Hananel-nü Benjamin lih Anathot la Ite inung Ih yang ronung, tunüo Ih tsü abi shüku amünyeh-uba ko hütsü Ihnü lihnung tsü athsalang lilepü Abüdongba-nü Ite yocho.

⁸ Hütsüde, Abüdongba-nü yocho kyo, akhangtilang tsü Ih yang Hananel rocho ko luh tsü lihnung Ite tsingdhingcho. Hütsü khu, yuje Abüdongba-nü chotakopü Ihnü müdhecho.

⁹ Ihnü Hananel chahnü luh tsü lihcho ko abi khyang thsi tsü ho-pü jücho; angang tsü taripi shekel dhüredhünyeh thsacho.

¹⁰ Ihnü athrahtachola tsü I neng thrahnü shingticho, yuzithsasohcho ko thsi tsü ahosing la ho jücho.

¹¹ Hütsüpü Ihnü athrahtacho vathrah shingti liba ko khangthru liba anyüding khyücho,

¹² ko Mahseia shümtsurü ko Neria tsurü Baruk khyang hütsüri tsü jücho. Ihnü hütsü Hananel, yuziti ko kekhüm la pümrüti atümung bete abi khyang jücho.

¹³ Arüh atümung betenü Ihnü Baruk te yocho,

¹⁴ “Akohba Abüdongba, Israel Tsingrang-nü yuchüm vathrah ashingticho ko akhangthrucho anyüding khyo aronungla müthsangnyangpü riki yohpünung nengdang alih füh khüdula yohpüngpü nü khyang yuzeng jüre.

¹⁵ Hiba lih la, kuh, luh ko shükusiluh thali lihchehnungepü Akohba Abüdongba, Israel Tsingrang-nü yoko.”

Jeremia Dangkhidangnang

¹⁶ Ihnü Baruk khyang alihtacho vathrah tsü jüko khanglang dangkhidangnangcho,

¹⁷ “Amichahba Tsingrang, Nü zii ko tasela ning ko alih Nühnü thricho; Nü nengdang tu athsah mühle.

¹⁸ Nühnü nyitsarü hajar te amüthrehba amüi ngusohko, ta arüh tpurü münyi ngang Nühnü arüh khingchire. Nüh arangcheh ko re azeh Tsingrang; Nüh Akohba Abüdongba.

¹⁹ Nühnü lümlong li chungre ko nguchi amülah nguchire; nyitsarünü nguchicho lüpcho Nühnü ngure, ko arüh nguchi aichi jiyüre.

²⁰ Papade Ijip la Nühnü thsayahiya ko anyemüyangnungti nguchicho, ko chünye yingcheh Israel la ko yucho apüm la mütozah hütsüri nguchire, hütsü khu ade Nüh apümlang müdhere.

²¹ Thsayahiya ko anyemüyangnungnü ihrü rorüh nehsohko, ko Nü müyurü Israelrü Ijip lanü nüchehnung Nühnü Nü re ko zii bichiko.

²² Nühnü arüh jümürü te nyengchocho kyo nyikih ko thsakukih pohba lih arüh khyang jüko.

²³ Ta arühnü ro hiba lih khyüde, Nü yuzeng mübichi mahkhang Nü adoba roh-i müli; ko Nühnü yocho tusü arühnü münguchi. Hütsü khu Nühnü achangba hiri arüh chah tikehsohcho.

²⁴ “Yangdi tsü mahnung Babylon-rünü hütsü mükang roshengvi thsare, ko arüh mahle. Chita, yangkong ko dhsaranü yangdi tsü arüh kheh la züdusohnung. Nühnü chocho apüm tikehko.

²⁵ Ta, Amichahba Abüdongba, yangdi tsü Babylon-rünü kohcheh khyünung lipü mii, Nühnü I khyang alih tsü lihsohcho.”

²⁶ Hütsüde Abüdongba-nü Ite yocho,

²⁷ “Ih nyitsarü apüm Tsingrang, Abüdongba. I nengdang tusü amükohnung mühle.

²⁸ Ihnü yangdi hi Babylon yangthsaba Nebukadnezar ko abi rothsarü kheh la jünung;

²⁹ arühnü hütsü kohnung ko michang thsürangjünung. Arühnü hütsü nyitsarünü kumungchah Baal tsingrangti khyang müchiji trüp ko aparü tsingrang khyang yongkha amübü tungkehjü I zichürosohba kuh zeh trüp-pehjünung.

³⁰ Arüh yukheh adikeh lanü Israelrü ko Judarünü arüh nguchinü Ih mükünyangsoh ko I zichürosohko.

³¹ Yangdi hi thri nyümong lanü hila lirünü I zii ko rihlong chürosohcho.

³² Judarü ko Jerusalemrü, arüh yangthsarü ko langnürü, bebürü ko azikehrüti zeh nguchicho amünyi apüm ngang Ihnü hiba yangdi changjünung dhrongchehko.

³³ Arühnü I tenü ximülako; ko Ihnü arüh te donye, arühnü mühnyire mahkhang mühnyichore.

³⁴ Ih mübünung thsaba Amübükuh la mii arühnü athrünyinung kyothri yohpüko, ko hütsü münyijüko.

³⁵ Arühnü Molek tsingrang khyang arüh tsurüti ko tsularüti kangmübü jünung, Hinnom Ngah la Baal khyang bholu külüpko. Ihnü hütsüta nguchinung arüh khyang yuzeng müjü ko arühnü hütsüta nguchi Judarü münyi shitpahsohnungepü I lasih la mii müzüro.”

Alongdi Nyengchocho

³⁶ Abüdongba, Israel Tsingrang-nü Ite yocho, “Jeremia, chita, yangkong ko dhsaranü hiba yangdi hi Babylon yangthsaba kheh la züdunungepü müyurünü chore. Ade Ihnü apa tu yonang nyieng.

³⁷ Ihnü zii ko rihlong chüro shupishuza pehba yuchoti lanü, I müyurü nübülungnung, ko hiba lih la arüh thali noronung ko arüh hila khümcho lisohnung.

³⁸ Hütsüde arüh I müyurü ko Ih arüh Tsingrang thsanung.

³⁹ Arüh akangla alümcho khüdu du lisohnung: arüh ko arüh shümtsurü tsanung nengdang akang ayung Ih dhichinung.

⁴⁰ Ihnü arüh te müchangkaba azengchotaba khüdu külüpnung. Ihnü arüh nengdang nguchi atsa nguchiba müzahnung, ko arühnü I tenü khodesü ximüla mütsinung nengdang arüh lasih apümnü Ih drüsohnung.

⁴¹ Arüh nengdang nguchi atsa nguchibala Ih künyangnung, ko Ihnü arüh hiba lih la arühtoh lisohnung.

⁴² “Ihnü hiri nyitsarü chah achangba hirojücho kyo, Ihnü anyengchocho atsa apüm arüh khyang jünung.

⁴³ Hiba lih hi nyitsarünye kanglungrünye mülichehba lihpi kangnung, ko hütsü Babylon-rü khyang jünungepü nyitsarünü chore. Ta hiba lih la thali luh lihnung.

⁴⁴ Nyitsarünü hütsüri lihnung, athrahtabala neng thrahnung, shingtinung, ko yuzithsanung. Hi Benjamin lih la, Jerusalem mükang yangdongtila, Juda yangditila, azong lih yangditila, azong jingdümpila ko Juda kihjing lahpila tikehnung. Ihnü müyurü khyang arüh lih thali jünung. Ih, Abüdongba-nü choko.”