JEREMIA 30 - AMÜSA BAIBEL (BSI)

Abüdongba Anyengchocho

¹ Abüdongba, Israel Tsingrang-nü,

² Ite yocho: “Ihnü nüte yocho lüpcho vakha khüdula thrahng,

³ tunüo I müyurü Judarü ko Israelrü nüli ronung becho chihle. Ihnü arüh jümürü khyang jüba lih lang arüh thali noronung ko arühnü hütsü khyünung. Ih, Abüdongba-nü choko.”

⁴ Abüdongba-nü Israel ko Judarü te yore:

⁵ “Ihnü adrü yuva yuchicho, atbachi yuva mah ta adrü yuva.

⁶ Ade nyehlieng ko lümdhing! Adhrerünü akhunga suronung mah-o? Khang tuepü khingkurü mikhungde kyo, nyitsarü apüm palu mila hümyehpü nguro? Tuepü atümung hitoi pha-a ro?

⁷ Adrünung nyümong khüdu tsehle; Tu te hütsü mükihtacheh, I müyurü wahnung bekhyah khüdu, ta arüh khümchonung.”

⁸ Akohba Abüdongba-nü yore: “Hütsüba nyümong rode, arüh hong la zehba hongzih thsangnyangjünung ko arüh ixilih pehjünung, ko adelü arüh shuparü yuhrü müthsanung.

⁹ Ta arühnü Ih arüh Tsingrang Abüdongba ko arüh yangthsaba David, sü Ihnü arüh yangthsaba kangsohnung abi dikehsohnung.

¹⁰ “I müyurüti, tüdrü; Israelrü, tüdrümüyang. Ihnü limih ashula tsünü nührü khümchonung, nührü rangyohba lih la tsünü. Nührünü kulang thali ronung ko atbachila linung; nührü khümcho linung ko sünüsü nührü müdrüsohnung.

¹¹ Ih nührü yang ronung ko nührü khümchonung. Ihnü nührü shupishuza pehjüba yuchoti apüm changjünung, ta nührülü müchangjünung. Ihnü nührü mükhingchipü müpehjünung; ta Ihnü nührü khingchide Ihnü tsa bichinung. Ih, Abüdongba-nü choko.”

¹² Abüdongba-nü Abi müyurü te yore, “Nührü madhsa tsü amükyangba, nührü dhsakehcho tsü mükyangnung.

¹³ Nührü xükümrü süsü mühle, nührü madhsa mükyangnung, akyangnung alongdi mühle.

¹⁴ Nührü müilarünü nührü nbüchüpehko; adelü arühnü nührü mülümchehre. Ihnü arorüh kyo nührü mahko; nührü akhingchi tsü dirako, tunüo nührü münyi tsü dirale ko nührü akhürah tsü dirale.

¹⁵ Nührü dhsakehcho adelü tüyo; nührü nengdang akyangba mühle. Ihnü hita nührü khingchicho tunüo nührü münyi drongrale ko nührü khürah tsü dirale.

¹⁶ Ta ade, nührü münyüyohchürü apüm münyüyohnung, ko nührü rorüh apüm arangyohrü kang notsinung. Nührü sehchirü apüm sehchinung, ko nührü mahrü apüm mahnung.

¹⁷ Ihnü thali nührü tsa kangsohnung; Ihnü nührü madhsa kyangjünung, nührü rorünü hita yonye, ‘Zion tsü apehcho; Sünüsü abükyü mülümxüre.’ Ih, Abüdongba-nü choko.”

¹⁸ Abüdongba-nü yore, “Ihnü I müyurü khyang thali arüh lih jünung ko kukhi müipite yanglilüm ngusohnung. Jerusalem külüpchinung ko yangthsaba kuh thsachinung.

¹⁹ Hütsüla lirünü nengsekhi thsanung; arüh akünyangnü züdenung. I amüwanü arüh suhnung; I amüwanü arüh dhichinung.

²⁰ Ihnü yucho khyang tase jülinung ko thali drengdrengsohnung. Arüh sehchirü atümung Ihnü khingchinung.

^21-22 Arüh langnürü arühbürü yucho lanü chüronung, arühbürü nyitsarü yolanü yangthsarü chüronung. Ihnü dsiyohde abinü Ite chotanung, tunüo müdsiyohpü sünü rochehnung? Arüh I müyurü thsanung, ko Ih arüh Tsingrang thsanung. Ih, Abüdongba-nü choko.”

²³ Abüdongba rihlong tsü tsingxinyübong, akhürahrü thah chah adrünung nyübong thsungkehnung. Abinü nguchinyücho apüm münguchikhangde, abinü münyehlinung.

²⁴ Aronung nyümongla müyurünü hi tsidsa nyichehnung.