JEREMIA 3 - AMÜSA BAIBEL (BSI)

Yuje Mücho Israel

¹ Abüdongba-nü yore, “Nyüh khüdunü anitpü pehkhang, ko abükyü tsü aparü nitpürü kangkhang, abinü abükyü thali mükhyücheh. Hütsünü alimih khüdupinü münyijünung. Ta, Israel, nühnü adrong te müitako, ko ade nühnü Ih yang thali ronyüre!

² Akhang müjoh chah tsü dhing. Nühnü mabomashi münguchidhingcho müdüm khüdu dusü mülio? Arab-rünü lipilih la jümcho kyo, nühnü lang ayung nü müitarü jümko. Nü mabomashi nguchinü alimih münyijüko.

³ Hütsü khu tsing tphahliko ko chisi kyang tsing mürore. Nü tsahnü mabomashilarü kyole; nüh ashahmükeh.”

⁴ “Ko ade nühnü Ite yore, ‘Nüh Iu ko I zadenü nühnü Ih müire.

⁵ Nüh lede zichüro du mülinung; nüh achangchi Ite rihlong müchüronung.’ Israel, hütsüta nühnü yocho, ta nühnü kohcho amütsa kükyo nguchiko.”

Israel ko Juda nyühnü Lasih Thsamülabae

⁶ Josiah yangthsaba lide, Abüdongba-nü Ite yocho, “Yuje mücholatpü Israel-nü nguchicho nühnü münguo? Abükyü I tenü za tsicho ko akhang apüm la ko singdhülüm pohki mabomashicho.

⁷ Abükyünü hiri apüm nguchipü khanglanglü, Ih yang ximüla ronung thsaepü Ihnü lümcho. Ta abükyünü müximüla ko yuje mücholatpü ani Juda-nü hiri apüm ngucho.

⁸ Israel-nü I tenü za mabomashilarü kangcho khu Ihnü abükyü pehcho ko tsisohcho Juda nüsü nguko. Ta yuje mücholatpü Israel nirü Juda-nüsü drü mülicho.

⁹ Abükyüsü mabomashilarü kangcho ko tu müshahcho. Abükyünü limih münyijücho ko singlungrü mübü nahtrahnaxengcho.

¹⁰ Hiri apüm khanglang, yuje mücholatpü Israel nirü Juda-nü Ih yang thali rorüh kyo ngusohcho; ta hütsü lümkhungnü mah. Ih, Abüdongba-nü choko.”

¹¹ Hütsüpü Abüdongba-nü Ite yocho, Israel-nü abi tenü ximüla tsinye, yuje mücholatpü Juda tenü atsau pü dhingchehcho.

¹² Abinü Ite wü Israel te hita yonung yocho, “Yuje mücholatpü Israel, Ih yang thali rung. Ih yanglilüm ko zii müchüronung; Ihnü ledelü nüte zii müchüronung.

¹³ Nühnü nü Büdongba nü Tsingrang nyümko, ko nüh mülangkopü nyengchoung. Singdong apüm pohki nühnü shupa tsingrang khyang nü amüi jüko ko I yuzeng mühnyicho nengdang nyengchoung. Ih, Abüdongba-nü choko.”

¹⁴ “Yuje müchorüti, thali rung; nührü Iyo lile. Ihnü yangdi müipi lanü nyüh khüdu-khüdu, ahung müipi lanü anyüh-nyüh ko Ihnü nührü Zion zong lang nüli ronung.

¹⁵ Ihnü I yocho nyirü yangthsarü nührü khyang jünung, ko arühnü lümlong ko anyichehbala nührü michah thsanung.

¹⁶ Hütsüpü khode nührü hütsüla mükhilong kangnang, nührünü adelü I Anyengchotacho Singdi nengdang müdangchinung. Arühnü adelü hütsü nengdang mülümdhingnung mahkhang mülümchehnung; arühnü müdhsütahnung mahkhang apasü mükülüpnung.

¹⁷ Hütsü shikhe rode, Jerusalem te ‘Abüdongba Pümji’ pü dsinung ko Ih mübünung hütsüla yuchoti apüm shimükhongnung. Adelü arüh amünyi lasih khanglang hongzi mü-iiwünung.

¹⁸ Israel-nü Judarü te yohrütanung ko kihku lahpi yangtsilangnü thalinung ko Ihnü nührü jümürü khyang arühtoh jüba lih yang wünung.”

Tsingrangba Müyurü Kyothri

¹⁹ Abüdongba-nü yore, “Israel, Ihnü nüh I tsurü kang khyüchonyücho, ko limih la atsah atsau lih, akünyangnung lih jünyücho. Nühnü Ite uwa dsi I tenü khodesü ximüla mütsisohnyücho.

²⁰ Ta yuje mücho nitpü kyo, nühnü Ite yuje müchoko. Ih, Abüdongba-nü choko.”

²¹ Akhangchah tsü yuva khüdu yuchire: hütsü Israelrü akihchiba yuva, tunüo arühnü arüh Tsingrang, Abüdongba nbüchüpü amünyi la akang licho.

²² Thalieng, Nührü Abüdongba tenü ximüla tsirüti; abinü nührü kyangjünung ko yuje chosohnung. Nührünü yore, “Ho, ihrü Abüdongba yang thali rore, tunüo abi ihrü Tsingrang.

²³ Akhangchah tsü kyothri mübüchonü ihrü tulasü mütro. Israel yang arüku tsü Ihsa Tsingrang Abüdongba chah dunü rore.

²⁴ Ta ashahnung tsingrang Baal mübüchonü, kanglungrü tsurü ko tsularüti ko Ihsa tpurünü papadenü nguchi rocho lüpcho changpehko.

²⁵ Ihsa ashahkhyüla khülunung ko ashah tsünü phatisohnung. Ihsa ko Ihsa tpurütinü Ihsa Tsingrang Abüdongba nyüm lede amünyi shitpahko; Ihsanü khodesü Abi yuzeng mübichi.”