JEREMIA 29 - AMÜSA BAIBEL (BSI)

Babylon la Jihudarü yang Jeremia Vathrah

¹ Ihnü bebürü, azikehrü, langnürü ko Nebukadnezar-nü Jerusalem lanü Babylon lang kümtsirü yang vathrah khüdu thrahcho.

² Ihnü hütsü yangthsaba Jehoiakhin, atpa, yangthsaba kuh la adirüti, Juda ko Jerusalem la azirüti, sihthrirü ko nguchi müdherüti yangtsilang nowüko khanglang thrahcho.

³ Ihnü vathrah tsü Juda yangthsaba Zedekia-nü Babylon yangthsaba Nebukadnezar yang müthehba Shafan tsurü Elasa ko Hilkia tsurü Gemaria nyüh khyang jücho. Hütsüla hita thrah zehcho:

⁴ “Nebukadnezar khyang Jerusalem lanü kümtsisohba Akohba Abüdongba, Israel Tsingrang-nü nyitsarü apüm te hita yore:

⁵ ‘Kuh thsaang ko lieng. Tbü tbüng ko hütsüri lanü chisi tsung.

⁶ Kuthrieng ko tsuzarü lieng. Hütsüpü nührü tsuzarüsü azarü linung nengdang kukangsohng. Nührü tükyücho, ta khütang suhng.

⁷ Nührü kümwü liba yangditi nengdang atsa nguching. Arüh nengdang Ite dangkhidangnang, tunüo arüh alirü thsakhang, nührüsü bholo linung.

⁸ Ih, Abüdongba, Israel Tsingrang-nü nührü yola liba azikehrüti ko aronung choyohrü khyang nührü mükihyochüsohnung müzahsohre. Arüh melang chah tüyudsi.

⁹ Arühnü nührü te I nengla arahkheh yore. Ihnü arüh mümütheh. Ih, Abüdongba-nü choko.’

¹⁰ “Abüdongba-nü yore: ‘Khode Babylon la kang nyühre tsü pisanang, Ihnü nührü nengdang nguchinung ko kulang nührü nüli ronung Ih anyengchoba yohpünung.

¹¹ Tunüo, nührü nengdang I lümchung Ih dunü müdhele, achangba mah, ta pungrohirojünung, nührü khyang aronung alongdi jünungepü Abüdongba nü yore.

¹² Hütsüde nührünü Ite dsinung. Nührünü ro Ite kihchinung ko Ihnü nührü te lalingnung.

¹³ Nührünü Ih yangchinung ko Ih ngunung, tunüo nührü lasih apümshünü Ih yangchinung.

¹⁴ Ho, Ihnü yore, nührünü Ih ngunung ko Ihnü nührü lih lang nowünung. Ihnü nührü tsishosohba apümlangnü nührü nübülungnung ko nührü yangtsilang nücheh tsiba lih yang nührü nüli ronung. Ih, Abüdongba-nü choko.’”

¹⁵ “Babylon la nührü khyang Abüdongba-nü azikehrü jükopü yore.

¹⁶ David-nü yangthsaba yanglih ko hiba yangdila müyurü nührü jünirü nührü yola münotsiba nengdang Abüdongba-nü tu yoro hütsü nyieng.

¹⁷ Akohba Abüdongba-nü yore, ‘Ihnü arüh michah chita, yangkong ko dhsara hirore ko Ihnü atsu mütsaba ngurüsih asühcho kyo kangsohnung.

¹⁸ Ihnü arüh chita, yangkong ko dhsaranü iichinung ko arüh ngude limih yuchotinü nehnung. Ihnü arüh apümlang tsishosohnung ko arüh chah tikehcho ngu nyitsarünü neh drünung. Nyitsarütinü arüh münyüjünung ko arüh neng chokehchola kang bichinung.

¹⁹ Ihnü I dikehrü azikehrü khu müthehba yu mübichicho khu arüh chah hi tikehnung. Arühnü mühnyicho.

²⁰ Ihnü Babylon lang müthehrü nührü atümungnü Ih, Abüdongba-nü tu yoro hi nyieng.’

²¹ “Akohba Abüdongba, Israel Tsingrang-nü Abi nengla arahkheh chorü Maseia tsurü Zedekia ko Kolaia tsurü Ahab nengdang hita choko. Abinü Babylon-rü yangthsaba Nebukadnezar tasela nührü jünung ko nührübürü nahtse tenü abinü nührü kyüsehsohnungepü yore.

²² Khode Jerusalem lanü Babylon lang küm tsirü khürü chah chokehcholanyünang, arühnü yonung: “Babylon yangthsabanü Zedekia ko Ahab nyüh michang la tahsehcho roh-i Abüdongba-nü nüte bichieng.”

²³ Hi arüh müngu thsanung tunüo arüh adrünung münyi mülang ngang, arühnü nahtrahnaxengko ko Abüdongba nengla arahkheh choko. Hi Abüdongba lümcho nyüm lile; arühnü tu nguchicho Abinü müdhele ko arüh nyüm Abi yuzi lile. Abüdongba-nü choko.”

Shemaia Vathrah

^24-25 Akohba Abüdongba, Israel Tsingrang-nü Nehelam-rü Shemaia sünü apu nengla Jerusalemrü apüm ko Maseia tsurü bebürü Zefania ko aparü bebürüti apüm yang vathrah thrahcho, abi nengdang yu hi I khyang jücho. Vathrah la tsü Shemaia-nü Zefania te yocho:

²⁶ “Abüdongba-nü nüh Jehoiada mülih bebürü kangsohcho, ko nüh ade Amübükuh la ayingba lile. Ade azikehrüepü yoba amükyangrü atümung rang ahong la idhse müshi yohjünung tsü nü nguchi lile.

²⁷ Tuepü Anathot-rü khüdu müyurü te azikehrü roh-i cho rachiba Jeremia chah hütsü roh-i münguchicho?

²⁸ Abi tsü zahsohng, tunüo abinü Babylon la müyurü te arüh hütsüla anyahli linung, hütsüeko kuthsa lieng, tbü tbüng ko hütsülanü chisicheh tsung pü yocho.”

²⁹ Zefania-nü vathrah tsü Ite khi yocho,

³⁰ ko hütsüde Abüdongba-nü Ite

^31-32 Babylon la arangyohrü apüm yanglang Shemaia yusi hi yonung yocho: “Ih, Abüdongba-nü Shemaia ko abi trah apüm khingchinung. Ihnü abi mümütheh, ta abinü nührü te abi azikehrü khüdu kyo chocho ko abinü nührü khyang arahkheh yudsisohcho. Nührü yolanü abi trah changpehnung. Ihnü I müyurü khyang nguchi atsa nguchicho hi ngunungthsa abi mülinung, tunüo abinü arüh te Ih nyümnung yocho. Ih, Abüdongba-nü choko.”