JEREMIA 27 - AMÜSA BAIBEL (BSI)

Jeremia-nü Ahong la Hongzih yoh Dhicho

¹ Juda la Josiah tsurü Zedekia yangthsaba kangyeng,

² Abüdongba-nü Ite shuküp amütpah ko singnü hongzih külüp-pü I hong la lahnung yocho.

³ Hütsüpü Jerusalem lang yangthsaba Zedekia te shirütanung rorüh arüh yanglih langbürüti khu Edom, Moab, Amon, Tyre ko Sidon yangthsarüti yang yusi jünung yocho.

⁴ Akohba Abüdongba, Israel Tsingrang-nü arüh yangthsarüti te yuzeng hiroh-i jünung Ite yocho:

⁵ “I zii ko tase amülahla Ihnü limih, amüi tsurü ko limih chah liba kanglungrü apüm thricho; ko hütsü Ihnü jünyürü masü khyang jüre.

⁶ I dikehrü, Babylon yangthsaba Nebukadnezar pohki yucho hitoi yohpüjüba tsü Ih lile ko Ihnü rangmü kanglungrünü mii abi dikehsohcho.

⁷ Yuchoti apümnü abi dikehnung ko apu yucho khülunung akyang khüdu müchide, arühnü abi tsurü ko abi shümtsurü mii dikehnung. Hütsüpü abi yuchonü rezeh yuchoti ko yangthsarüti dikehnung.

⁸ “Ta yucho mahkhang yanglih khürünü abi pohki müzüdukhang, hütsüba yucho tsü Ihnü chita, yangkong ko dhsaranü khingchinung Nebukadnezar khyang hütsüri riri changsohnung.

⁹ Azikehrü yu tünyi mahkhang melang mahkhang asülang würü mahkhang azi-among nguchinünye, atikehnung libati yochehrü yu tünyi. Babylon yangthsaba pohki tüzüdu pü arüh atümungnü yonung.

¹⁰ Arühnü nüh kihyochüre ko hütsü khu nührü lih lanü ashu notsisohnung. Ihnü nührü iipehnung ko nührü changnung.

¹¹ Ta tu yuchonü Babylon yangthsaba pohki züdu abi dikehnang, arüh Ihnü arühbürü lih la yuthsah-bhahi lisohnung. Ih, Abüdongba-nü choko.”

¹² Ihnü Juda yangthsaba Zedekia tesü hütsü du yoko, “Babylon yangthsaba chah hapm. Abi ko abi nyitsarü dikehng ko nührü akang linung.

¹³ Tuepü nüh ko nührü nyitsarü chitala mahkhang yangkongnü mahkhang dhsaranü sünung? Tunüo tu yuchonü Babylon yangthsaba chah mühapnang, hütsüta tikehnungepü Abüdongba-nü yoko.

¹⁴ Abi chah tühap-pü yoba azikehrüti yu tünyi. Arühnü nührü kihyochüre.

¹⁵ Abinü arüh mümütheh ko abi nengla arühnü arahkheh chorepü Abüdongba apunü yoko. Hütsünü abinü nührü iipehnung ko nührü ko nührü te arahkheh chorü azikehrü tsü kyüsehnung.”

¹⁶ Hütsüta Ihnü bebürü ko müyurüti te Abüdongba-nü yocho yu tsü yocho: “Babylon lanü Amübükuh kuthsi tunyah mülipü thali hironungepü yoba azikehrü yu tünyi. Arühnü nührü te arahkheh chore.

¹⁷ Arüh yu tünyi! Babylon yangthsaba chah hapm ko nührü akang linung. Tuepü hiba yangdi hi athsangnyangcho bhüm kangnung?

¹⁸ Arüh yuje azikehrü thsakhang ko I yusi hirü thsakhang, Amübükuh ko yangthsaba kuh la liba kuthsi tsü Babylon lang mühitsinung. Ih, Abüdongba te tsingdhingsohng.”

^19-20 (Yangthsaba Nebukadnezar-nü Babylon lang Juda yangthsaba, Jehoiakim tsurü Jehoiakhin ko Juda ko Jerusalem la akuthsengti notside, abinü dongditi, imüyeng kihbong, misü akhülubati ko amübükuh la kohro khürülü pehjücho)

²¹ “Jerusalem la amübükuh ko yangthsaba kuh la pehjüba kuthsi nengdang Ih, Akohba Abüdongba, Israel Tsingrang-nü tu yoro nyieng:

²² Hütsüri Babylon lang hitsinung ko Ihnü hütsüri mülümchehde arüh hütsüla linung. Hütsüpü Ihnü thali hironung ko hiba müdümla yohpünung. Ih, Abüdongba-nü choko.”