JEREMIA 26 - AMÜSA BAIBEL (BSI)

Yukhanung Jeremia Norocho

¹ Juda la Josiah tsurü Jehoiakim yangthsaba kangpü tunyah mülie,

² Abüdongba-nü Ite yocho, “Amübükuh kekhüm la tsü yaang ko hütsüla mübünung Juda yangditi lanü rorüh te yonung Ihnü nüte yoba tsü arüh te sobhoung. Tusü tünyingbü.

³ Kümüdeo müyurünü hütsü yuchinung ko amünyi lang lanü ximülanung. Arühnü hütsüta nguchikhang, arüh khürah nguchi ngang arüh michah hironung chungba achangba tsü Ihnü I lasih mülichinung.”

⁴ Abüdongba-nü müyurü te hita yonung Ite yocho, “Ihnü nührü khyang jücho adoba bichieng. Ih, Abüdongba-nü yocho,

⁵ ko I dikehrü nührü yang rosohba azikehrü yu nyinung Ihnü yocho. Arühnü yocho nührünü khodesü mühnyi.

⁶ Nührünü mühnyi du khang, Ihnü Shiloh chah nguchicho kyo hiba amübükuh chah nguchinung, ko limih la yuchoti apümnü hiba yangdi neng hi chokehchola kang bichinung.”

⁷ Bebürü, azikehrü ko müyurü apümnü Amübükuh la Ihnü yu hiri cho yuchicho,

⁸ ko Abüdongba-nü I khyang chosohnyücho apüm chokayeng, arühnü Ih rangcho ko züdecho, “Hi ngang nüh kyüsehnung!

⁹ Hiba Amübükuh hi Shiloh kyo kangnung ko yangdi hi changpehpü süsü hila mülinungepü tuepü nühnü Abüdongba nengla choro?” Hütsüta müyurünü Ih tsüticho.

¹⁰ Hi Judarü zirünü yuchide, arühnü dhsüdhsa yangthsaba kuh lanü Amübükuh lang wücho ko Tbükhüm Asi te jüm pümcho.

¹¹ Hütsüde bebürü ko azikehrütinü langnürü ko müyurüti te yocho, “Hiba nyitsarü hi süsohnung lengle, tunüo abinü Ihsa yangdi nyüm choko. Abinü chocho nührü nangkhinü yuchiko.”

¹² Hütsüde Ihnü yocho, “Hiba Amübükuh ko hiba yangdi nyüm nührünü yuchi chonung Abüdongba-nü Ih müthehcho.

¹³ Nührünü nührü liba akang ko nguchi tsü mülichi Abüdongba nührü Tsingrang yu nyieng. Nührünü mülichikhang, Abinü nührü michah hironung liba achangba tsü mülichinung.

¹⁴ Ih tsülü nührü kheh la lile! Nührünü tsacho ko athsalang hütsüta nguching.

¹⁵ Ta hi müdheing: nührünü Ih kyüsehkhang, nührü ko hiba yangdi achomükeh nyitsarü khüdu kyüsehcho mülang linung, tunüo nührü khyang hiba yusi jüsohnung Abüdongba-nü Ih müthehcho.”

¹⁶ Hütsüde azirü ko müyurünü bebürü ko azikehrüti te yocho, “Hiba nyitsarünü Ihsa te Ihsa Abüdongba Tsingrang nengla chore; abi tüsüsoh.”

¹⁷ Hütsüpü, azirü khürünü shemüsu shimükhong liba müyurüti te yocho,

¹⁸ “Khode Juda la Hezekia-nü yangthsacho, Moreshet lanü azikehrü Mika-nü müyurü te Akohba Abüdongba-nü yocho arüh te yocho, Zion tsü luh kyo junahnung, Jerusalem tsü sehnyeh bhüm kyo kangnung, ko Amübükuh Khang tsü mürong kangnung.

¹⁹ Yangthsaba Hezekia ko Judarünü Mika müsüsoh. Ta Hezekia-nü Abüdongba drücho ko abi kangli khyünyücho. Ko Abüdongba-nü arüh michah hironung liba achangba tsü mülichicho. Ade Ihsanü Ihsabürü chah adrünung achangba hironung müküpre.”

²⁰ (Adesü, Keriath Jearim lanü Shemaia tsurü Uria-nüsü Jeremia-nü roh-i du Abüdongba nengla hiba yangdi ko yucho nyüm chocho.

²¹ Khode yangthsaba Jehoiakim ko abi rothsarütinü Uria-nü choba tsü yuchicho, yangthsabanü abi kyüsehnung müküpcho. Ta Uria-nü hütsü yuchi Ijip lang drü tsicho.

²² Ta yangthsaba Jehoiakim-nü Uria rangnung Akbor tsurü Elnathan ko aparü khürü Ijip lang wüsohcho.

²³ Arühnü abi yangthsaba Jehoiakim yanglang rang norocho ko abinü abi kyüseh abi me tsü kongyo la dhiyohchüpehcho)

²⁴ Ta Ihlü Shafan tsurü Ahikam-nü trochonü, müyurü kheh la kyüsehsohnung müjücho.