JEREMIA 25 - AMÜSA BAIBEL (BSI)

Kihku langnü Arorüh

¹ Juda la Josiah tsurü Jehoiakim yangthsacho kang müyüula, Ihnü Abüdongba chahnü Judarü apüm nengdang yusi khüdu ngucho. (Hütsü Babylon la Nebukadnezar yangthsacho akhudiba kang.)

² Ihnü Judarü ko Jerusalemrü te yocho,

³ “Amon tsurü Josiah yangthsathsacho kang dhüreasangu lanü chünye yingcheh, kang mükyüpü asang, Abüdongba-nü Ite chota rore, ko Abinü yocho yu khüdusü Ihnü nührü te müyopü mühle. Ta nührünü mühnyi.

⁴ Abüdongba-nü nührü yang abi dikehrü ko azikehrü mütozah müthehnye, nührünü mühnyicho.

⁵ Abüdongba-nü nührü ko nührü jümürü khyang arühtoh jücho lih la linung nührü akang ko nguchi amütsa lanü ximülanung arühnü yocho.

⁶ Apa tsingrangti mübü ko dikehchonü ko nührü khehnü külüpcho kyothri mübü Abüdongba rihlong chürosohnung arühnü nührü te yocho. Nührünü Abüdongba te nyirelang, Abinü nührü mükhingchiba thsacho.

⁷ Ta nührünü Abi te mühnyi pü Abüdongba apunü yore. Hütsü mülih, nührü kyothrinü Abi zichürosohcho ko nührübürü chah Abi rihlong hirocho.

⁸ “Nührünü Abi yu mühnyichonü, Akohba Abüdongba-nü yore,

⁹ ‘Kihku lahpinü yucho apüm ko I dikehrü Babylon yangthsaba Nebukadnezar nünung Ihnü müthehre. Juda ko hütsüla lirü ko mükangmüshü liba yuchoti apüm nyüm khatasohnung Ihnü arüh noronung. Ihnü hiba yucho ko mükangmüshü liba yuchoti lede adrünung ko nehnungthsa thsangnyang pehjünung. Ih, Abüdongba-nü choko.

¹⁰ Arüh künyangküshi yuva ko kukangba thsüti yuva zahsohnung. Arüh dsi nengdang michangkih mülinung, ko tsuyongba kingkapehnung.

¹¹ Hiba yanglih apüm thsangnyangpehjo nehnungthsa ngunung ko mükangmüshü liba yuchotinü Babylon yangthsaba kang nyühre dikehnung.

¹² Hütsüpü, Babylon ko yangthsaba arüh münyi ngang Ihnü khingchinung. Ihnü hütsüba yanglih thsangnyangjünung ko lede nengdang chang pehjünung.

¹³ Ihnü Jeremia te chotade yuchoti chah achangba hironung chocho achangba ko hiba vakhala zehcho achangba apüm Babylon chah hironung.

¹⁴ Ihnü Babylon khyang arüh nguchi ngang thali jünung, ko arühbürü tsü yucho adrong ko yangthsarü amülahti yurü kangnung.’”

Tsingrangba Yukhaba

¹⁵ Abüdongba, Israel Tsingrang-nü Ite yocho, “Hila I rihlongnü jeng yongkha shing khüdu lile. Ihnü nüh wüsohba yucho apümlang hütsü hiwüng, ko arüh khyang tieng.

¹⁶ Arühnü hütsü yongde, Ihnü arüh nyüm khata müthehcho khunü arüh khüluchinung ko lüm chahnung.”

¹⁷ Achotsü Abüdongba khehlanü shing tsü khyüpü, Ih wüsohba yuchoti apüm khyang hütsü yongsohcho.

¹⁸ Jerusalem tsü rangmü kangnung, adrünung ko nehnungthsa ngunung ko ade roh-i müyurünü arüh neng tsü chokehchola kang bichinungthsa, Judarü yangditi arüh yangthsarü ko langnürü khyang hütsülanü yongsohcho.

^19-26 Shingla tsünü yongba aparüti tsü hiri: Ijip yangthsaba, abi pohki adirüti ko azirüti; Ijiprü apüm ko Ijip la shuparü apüm; Uz lih la yangthsarü apüm; Filistin yangditi Ashkelon, Gaza, Ekron ko Ashdod la anyingcho hirila yangthsarü apüm; Edom, Moab ko Amon-rü apüm; Tyre ko Sidon yangthsarü apüm; Mediteranean lih la yangthsarü apüm; Dedan, Tema ko Buz yangditi; Kuva akhikyükyah kehrü apüm; Arabia yangthsarü apüm; Lipilih hung yangthsarü apüm; Zimri, Elam ko Media yangthsarü apüm; Kihku lahpi ashu ko amünyeh mülita thsa rorüh yangthsarü apüm. Limih la lirü yucho mükhunü hütsülanü yongnung kangcho. Achangkathsa, Babylon yangthsabanü hütsülanü yongnung.

²⁷ Hütsüpü Abüdongba-nü Ite yocho, “Ih, Akohba, Abüdongba, Israel Tsingrang-nü I müyurü te Ihnü arüh nyüm khata müthehcho khu, arüh müchapü mümülüde ko ngahsehpü mükoh shemüsu mükangde, arüh te yongnung yuzeng jürepü young.

²⁸ Arühnü nü khehlanü shing tsü khyo yongnung ritakhang, khüta khütanye yongnung Akohba Abüdongba-nü yuzeng jürepü young.

²⁹ Ihnü athsangnyangba nguchi tsü Ipu yangdila dikehnung. Arüh mükhingchipü pehjünungepü arühnü lümrü mah-o? Mah, arüh khingchinung, tunüo Ihnü limih la nyitsarü apüm chah khata müthehnung. Ih, Akohba Abüdongba-nü choko.

³⁰ “Jeremia, Ihnü yocho yu apüm nühnü sobhoung. Hiri nyitsarü te hita young: ‘Abüdongba-nü ninglangnü rengnung ko amunglangnü ningki müthehnung. Abinü Abi müyurü nyüm khongnung; shükusih nyehde kyo züdenung. Limih la lirü apümnü Abi yu yuchinung,

³¹ ko yuva tsünü alih changka chii tehkehnung. Abüdongba-nü yuchoti nyüm yu lile: Abinü nyitsarü apüm yukhanung ko akhürahrü süsohnung. Abüdongba-nü choko.’”

³² Yucho khüdu khanglang khüdu chah achangba ko alih changka chii tsingxinyübong shibülung rolepü Akohba Abüdongba-nü yore.

³³ Hütsü nyümong Abüdongba-nü kyüsehcho meti tsü alih changka chii shupishuza jonung. Sünüsü arüh me mütranung, ko sünüsü hiwü müdhrürangnung. Arüh alih la sehnyeh kyo bhümpünung.

³⁴ Traang, langnürüti, nührü müyurü nyahrüti, thsengnü traang! Tra lihwüla chichieng. Nührü kingthrümnung becho chihko ko sanpung kyo nührü kyüsehnung.

³⁵ Nührü atsichehnung lang mülinung.

^36-37 Nührünü longrinü traang, tunüo Abüdongba-nü arihlongla nührü yucho changjüko ko nührü atbachi limih thsangnyangjüko.

³⁸ Kihkhünyingnü abi lungkoh pehjücho kyo, Abüdongba-nü Abi müyurü thrüchahchü pehjüko. Adrünung chita ko Abüdongba adrünung rihlongnü yanglih tsü apehlih kangsohko.