JEREMIA 24 - AMÜSA BAIBEL (BSI)Ngurüsih Loh Anyüh 1 Abüdongba-nü ngurüsih loh anyüh Amübükuh bete yohpo Ite ngusohcho. (Hi Babylon yangthsaba Nebukadnezar-nü Jehoiakim tsurü yangthsaba Jehoiakhin Jerusalem lanü Babylon lang Judarü zirü, sihthrirü ko nguchi müdherü yola arangyohrü kang nowüko khanglang tikehcho.) 2 Akhudiba lohla akhu nyicho ngurüsih atsa; akhüuba lohla tsü atsu mütsa ngurüsih asühcho zehcho. 3 Hütsüde Abüdongba-nü Ite yocho, “Jeremia, nühnü tu nguro?” Ihnü lalingcho, “Ngurüsih. Ngurüsih atsati tsü dee atsa, ko amütsati tsü atsu mütsa sühko.” 4 Hütsüde Abüdongba-nü Ite yocho, 5 “Ih, Abüdongba, Israel Tsingrang-nü, Babylon lang notsiba müyurü tsü hiri ngurüsih atsa kyo khichire, ko Ihnü arüh tsa bichinung. 6 Ihnü arüh dhingyehnung ko hiba lih lang thali noronung. Ihnü arüh dhimüsunung ko mütphünahnung; Ihnü arüh khyümnung ko mürohchehnung. 7 Ih Abüdongbaepü müdhesohnung Ihnü arüh khyang lümlong jünung. Hütsüde arüh I müyurü ko Ih arüh Tsingrang kangnung, tunüo arühnü Ih yang arüh lasih apümnü thali ronung. 8 “Juda yangthsaba Zedekia, abi te yangthsarüti ko Jerusalem la nyehli liba ko Ijip lang notsiba müyurüti; Ih, Abüdongba-nü arüh apüm tsü atsu mütsaba ngurüsih kyo bichinung. 9 Liküpla yuchotinü nehnungthsa arüh michah Ihnü hütsütari achangba hirojünung. Nyitsarünü arüh münyodhingnung, arüh nengdang tülatüshinung, arüh mütsa chonung ko arüh wücho apümlang arüh neng dangchinung. 10 Ihnü arüh chah khata, yangkong ko dhsara, ko arüh jümürü khyang jüba lih la nyüh khüdusü münyingnungthsa hirojünung.” |
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
Bible Society of India