JEREMIA 23 - AMÜSA BAIBEL (BSI)

Aronung Alongdi

¹ Yangthsarü sürünü abi nyitsarü changjo tsishosohro, arüh chah Abüdongba yukhaba khüta adrünung linung!

² Yangthsarü sürü khyang abi nyitsarü xükümsohcho, arüh nengdang Israel Tsingrang Abüdongba-nü hita yore: “Nührünü I müyurü müxüküm; nührünü arüh tsishosoh arüh iipehko. Hütsünü ade nührü nguchi amütsa ngang Ihnü nührü khingchinung.

³ Ihnü tsishosohba yuchoti lanü I müyurü anyingchoti nübülungnung, ko arüh nührü lih lang thali noronung. Arüh tsuzarü adrong linung ko arüh suhnung.

⁴ Arüh xükümnung Ihnü yangthsarüti throcheh yohpüjünung. Adelü I müyurünü müdrünung mahkhang münehnung, ko Ihnü arüh thali mükhingchinung. Ih, Abüdongba-nü choko.”

⁵ Abüdongba-nü yore, “Ihnü David trah lanü amüsa yangthsarü khüdu throchehnung bekhyah chihle. Hütsüba yangthsabanü apümlang thsehdhsa, athsalang ko yuje la yangthsa thsanung.

⁶ Abi yangthsaba kangde Judarü khümcho linung ko Israelrü yangtsa la linung. Abi te ‘Ihsa Akhümcho Abüdongba’ pü dsinung.”

⁷ Abüdongba-nü yore, “Israelrü tsü Ijip lih lanü nüchehchoepü Ih akang liba Tsingrang nengla adelü yu müchümnung bekhyah tsehle.

⁸ Ta Ihnü arüh tsishosohba kihku lahpi lih ko apa limih apüm lanü Israelrü nüchehba akang liba Tsingrangepü yuchümnung. Hütsüta arühnü arühbürü lih la linung.”

Azikehrüti nengdang Jeremia Yusi

⁹ I lasih thsangnyangko, ko Ih dhridhrire. Abüdongba nengdangnü, Abi Amüsa yu nengdangnü, Ih amücharü kyore, amüchatpahcho nyitsarü kyore.

¹⁰ Alih la yuje müchorünü jengko; arühnü akang mütsa lire ko arüh tase amüthsalang bichire. Abüdongba chokehchola khu alihnü longrire ko rangmü kungpehko.

¹¹ Abüdongba-nü yore, “Azikehrü ko bebürünü Tsingrangba mümüdhe; Arühnü amübükuh tsatsala amünyi nguchicho Ihnü rangko.

¹² Arüh tsehba lang tsü ashüsheh ko amarürah thsanung; Ihnü arüh jingmüthi ngahsehsohnung. Ihnü arüh chah achangba chihsohnung, arüh khingchinung bekhyah tsehle. Ih, Abüdongba-nü choko.”

¹³ Ihnü Samariarü münyi nguko: arühnü Baal tsingrang nengla choko ko I müyurü amünülang nüko.

¹⁴ Ta Jerusalem la azikehrütinü alaa amünyi nguchicho Ihnü nguko; arühnü nahtrahnaxeng arahkheh chore; arühnü amütsa nguchinung la müyurü trore, hütsünü sünüsü amütsa nguchiba müzahre. I nengdanglü, arüh apüm Sodom ko Gomora-rü kyo amütsa.

¹⁵ “Hütsünü Ih Akohba Abüdongba-nü Jerusalem la azikehrüti nengdang yore: Ihnü arüh khyang tsuyongba akha tüpnung ko müyüh tihnung, tunüo arühnü apümlang Tsingrang mümüdheba shuko.”

¹⁶ Akohba Abüdongba-nü Jerusalemrü te yocho, “Azikehrünü yoba tsü tünyi; arühnü arahkheh alongdinü nührü jengsohre. Arühnü nührü te Ihnü yocho mahpü arühnü lümcho yore.

¹⁷ Ihnü yocho mühnyirü nyitsarü te, arüh nengdang lüpcho tsanungepü arühnü yore. Ko hongzirü apüm te achangbanü khodesü müchinungepü yore.”

¹⁸ Ihnü yocho, “Hiri azikehrü sünüsü Abüdongba lümlong khodesü mümüdhe. Arüh sünüsü abi yusi müyuchi mahkhang münyicheh, mahkhang abinü yocho mühnyidhing.

¹⁹ Abi rihlong tsü akhürahrü thah chah fükehnung tsingxinyübong lile,

²⁰ ko Abinü lümcho lüpcho münguchikhangde hütsü müzahnung. Aronung nyümongla Abi müyurütinü hütsü tsidsa nyichehnung.”

²¹ Abüdongba-nü yocho, “Ihnü hiri azikehrüti müwüsoh, ta arüh jangjang wücho. Ihnü arüh khyang tu yusi müjü, ta arühnü I nengla chocho.

²² Arühnü I arang lümlong müdherelang, I müyurü te I yusi sobhonü arüh akang ko arüh nguchi mülichijüpü liba thsako.

²³ “Ih müdüm khüdula du mah ta apümlang liba Tsingrang lile.

²⁴ Ihnü müngunungthsa sünüsü rangnung mükoh. Ninglang ko alih la Ih apümlang lirepü nührünü mümüdhe ang?

²⁵ I nengla arahkheh choba ko arüh melangla Ihnü yusi jüchoepü yoba hütsüri azikehrünü tu yocho Ihnü müdhele.

²⁶ Hütsüri azikehrütinü arühnü dochehba arahkheh tsünü khütoi nyahli I müyurü nümülanung.

²⁷ Arüh tpurünü Ih nbüchüpü ko Baal tsingrang yang ximülacho kyo, arühnü yoba melang tsünü I müyurünü Ih nbüchünungepü arühnü lümre.

²⁸ Azikehrü sünü melang melangcho abinü hütsü melang khüduepü yobae, ta azikehrü sünü I yusi yuchicho abinü hütsü yuje cho sobhobae. Fürü te mayü khüta kihtanung?

²⁹ I yusi tsü michang kyole ko lung zangzang müpnahba amüpsing kyole.

³⁰ Azikehrü sürünü arüh iithsata I yusi kyo sobhoro Ihnü arüh thrünyire.

³¹ Adesü azikehrü sürünü palunü chopü I chahnü rochoepü yoro hütsü Ihnü thrünyire.

³² Ih, Abüdongba-nü tu yoro hi nyieng. Ihnü azikehrü melang arahkheh yorü nyümre. Arühnü arüh melang yo arüh arahkheh ko tüzümükhümde I müyurü amünülang nüre. Ihnü arüh müwüsoh mahkhang wünung yuzeng müjü, ko müyurü nengdangsü arüh tu arüku mühle. Ih, Abüdongba-nü choko.”

Abüdongba Bhamüling

³³ Abüdongba-nü Ite yocho, “Jeremia, I müyurü khüdu mahkhang azikehrü mahkhang bebürü khüdunü nüte, ‘Abüdongba yusi tuo’ pü tsingdhingde, nühnü abi te, ‘Nüh Abüdongba nengdang bhamüling lile ko Abinü nüh pehnung; pü young.’

³⁴ I müyurü khüdu, mahkhang azikehrü mahkhang bebürü khüdunü ‘Abüdongba bhamüling’ yu tsü bichikhang, Ihnü abi ko abi kukhi khingchinung.

³⁵ Hütsümüsung, atümungnü palu shangrü ko jünirü te, ‘Abüdongba-nü tu alalingba jücho? Abüdongba-nü tu yocho’ pü tsingdhingtaang.

³⁶ Hütsüeko arühnü adelü, ‘Abüdongba bhamüling’ ba yu tsü tübichi, tunüo khürünü bichikhang, Ihnü abi nengdang yuje Iyu tsü bhamüling kangsohnung. Müyurünü arüh Tsingrang, akang liba Tsingrang, Akohba Tsingrang yu khyümülare.

³⁷ Jeremia, azikehrüti te tsingdhing, ‘Abüdongba-nü nührü khyang tu yusi jücho? Abüdongba-nü tu yocho?’

³⁸ Ko arühnü I Yuzeng mühnyi, “Abüdongba bhamüling, yu tsü bichikhang,

^39-40 Ihnü nührü thromüsu nührü ashula tsayohchüpehnung, arühbürü ko arüh jümürü khyang Ihnü jüba yangdi anyüding; Khodesü münbüchünungthsa Ihnü arüh chah ashah ko awah hirojünung.”