JEREMIA 22 - AMÜSA BAIBEL (BSI)

Yangthsaba Kukhi te Jeremia Yusi

¹ Abüdongba-nü David trah Juda yangthsaba kukhi te wünü,

² hütsüla yangthsaba, abi adirüti ko Jerusalemrü te Abüdongba-nü yocho yu nyinung Ite yocho:

³ “Tu yuje ko athsalang hütsü nguchinung Ih, Abüdongba-nü yuzeng jüre. Athsüyohchürünü kihyocho liba nyüh khüdu tsungtieng. Shuparü, mürürü ko chomilarü tüsehchi mahkhang mütsa tübichi; ko Amüsa müdüm hila achomükeh nyitsarü tükyüseh.

⁴ Ihnü mülacho roh-i nührünü yuje nguchikhang, David trah lanü mütozah yangthsanung. Ko arüh, arüh adirüti ko müyurü yola mütozah hiba yangthsaba kuh tbükhüm khu kuri akhüluba ko kuri chahnü lahkhunung.

⁵ Ta nühnü I yuzeng mühnyikhang, yangthsaba kuh hi khülu changnung Ihnü yuchümre. Ih, Abüdongba-nü choko.”

⁶ “I nengdang, Juda yangthsaba kuh tsü Gilead lih ko Lebanon Azong kyo atsah atsa lile, ta hütsü apehlih kyo kangsohnung.

⁷ Ihnü hütsü changsohnung nyitsarü müthehre. Arüh apümnü arüh püh hironung ko atsah atsa cedar dongditi retsunung ko michang la dhiyohchünung.

⁸ “Akhanglang shuparü adrong lahkhunung ko hiba yangdi arangcheh chah Ih, Abüdongba-nü tu nguchicho pü tsingdhingnung.

⁹ Hütsüde arühnü hütsü nührünü nührü Tsingrang Ite azengtacho pehjüpü aparü tsingrang mübü dikehchonüepü arühnü yonung.”

Joahaz nengdang Jeremia Yusi

¹⁰ Judarü, yangthsaba Josiah nengdang tütra; abi sücho me tüshü. Ta abi tsurü Joahaz nengdang dee traang; arühnü abi notsire, khodesü müthalinung, abi suro lih khodesü müngunung.

¹¹ Abüdongba-nü au mülih Juda la yangthsasohba Josiah tsurü Joahaz nengdang hita yore, “Abi hilanü khodesü müthalinung tsipehko.

¹² Abi khüde notsicho hütsüla abi sünung, ko abinü khodesü thali hiba lih hi müngunung.”

Jehoiakim nengdang Jeremia Yusi

¹³ Sünü yuje müchonü akuh thsaro ko dhsakehro; Sünü apu nyitsarü amükangnü nguchisohro ko arüh nyükhehshi müjüro, abi ahohah!

¹⁴ Sünü hita choro abi ahohah, “Ihnü Ipu kuh arangcheh amunglang ahechi chongsah yohpü thsanung.” Hütsüta abinü nyübongkhi yoh, cedar singnü abekhüm ko amohnü münohre.

¹⁵ Cedar singnü nü kuh thsachonü, aparü tenü atsauba külüpnü, nüh atsauba yangthsarü kangrü mah-o? Nüu akang dekhing liko. Abi lede yuje ko atsa licho, ko lüpchola abi müwacho.

¹⁶ Abinü ailümrü yu tsa khacho, ko abi te apüm tsa licho. Hütsü Abüdongba müdheba tsü lile.

¹⁷ Ta nühnü nüpu nengdang du nguchire; nühnü achomükehrü kyüsehre ko nü nyitsarü mütsa sehchire. Abüdongba-nü choko.

¹⁸ Hütsünü ade, Abüdongba-nü Juda yangthsaba Josiah tsurü Jehoiakim nengdang hita yore, Sünüsü abi me müshünung, mahkhang, “Müi-o pü müyonung. Sünüsü abi nengdang ‘I Büdongba, yangthsaba pü mütranung!’

¹⁹ Gadu khüdu dhrürangcho kyo, abi tphah hichüdu Jerusalem tbükhüm mihlang pehnung.”

Jerusalem Müngu nengdang Jeremia Yusi

²⁰ Jerusalemrü, Lebanon lang wüng ko züdeing, Bashan lih lang wüng ko traang; Moab zong lanü züdeing, tunüo nührü tsungphung thsarü apüm kohchehko.

²¹ Nührü tsa lide Abüdongba-nü nührü te chotacho, ta nührünü mühnyicho; Nührünü Abüdongba yu khodesü mühnyi.

²² Nührü langnürüti nyübongnü fo tsinung, nührü tsungphungthsarü arangyohrü kang notsiko, nührünü nguchicho amütsa apüm ngang nührü yangdi wahseh ashah khyüsohko.

²³ Lebanon lanü hiroba cedar singchah nührünü longlangre; ta khingkurü mi khungde kyo adhsanü nührü chah chihde, nührü khüta amüinung thsanung.

Jehoiakhin chah Tsingrangba Yukhaba

²⁴ Abüdongba-nü Juda yangthsaba Jehoiakim tsurü yangthsaba Jehoiakhin te yocho, “Ih akang liba Tsingrang lide, nüh I kheh tsalang ashingsing imüshi thsanye,

²⁵ Ihnü nüh tphahcheh nühnü drü liba nyitsarü, nüh kyüsehnung yangchibarü khyang jünung. Ihnü nüh Babylon yangthsaba Nebukadnezar ko abi rothsarüti kheh la jünung.

²⁶ Ihnü nüh ko nütpa yangtsilang khing wüsohnung. Nühjü müsuroba limih khüdulang nühjü wünung ko nühjüding hütsüla sünung.

²⁷ Nühjünü hiba lih longminung, ta khodesü thali müronung.”

²⁸ Ihnü yocho, “Yangthsaba Jehoiakhin amüpnahcho apehcho ko sünüsü müdhsütahba alih füh kyo kangcho mah-o? Hütsü khu abi ko abi tsuzarüti arühnü mümüdheba lih khüdulang yangtsilang notsicho mah-o?”

²⁹ O alih, alih, alih! Abüdongba-nü yoba yu tsü nyieng:

³⁰ “Hiba nyitsarü hi atsurü mii changnungthsa mülangjüko. Khodesü akoh münguba nyüh khüdu kangnung. Abi chahnü David mülih Juda la yangthsathsanung tsuzarü mülinung. Ih, Abüdongba-nü choko.”