JEREMIA 21 - AMÜSA BAIBEL (BSI)

Jerusalem Kohchehnung Müngucheh

¹ Juda yangthsaba Zedekia-nü Ih yang Malkia tsurü Pashur ko Maseia tsurü bebüba Zefania nyüh akihchiba yu hi hipü rosohcho:

² “Yanglilüm Abüdongba te ihrü nengdang kihchijüng, tunüo Babylon yangthsaba Nebukadnezar ko abi rothsarütinü ihrü yangdi beti yale. Kümüdeo Abüdongba-nü thsayahiya khüdu nguchi Nebukadnezar ko abi nyitsarü shehlinung kohle.”

³ Ta Jeremia-nü arüh te lalingcho, Zedekia te young,

⁴ Abüdongba Israel Tsingrang-nü hita yore: “Zedekia, Babylon yangthsaba ko abi rothsarü te chitaba nü rothsarüti Ihnü kohchehsohnung. Ihnü yangdi yanglongla nü rothsarü thsunohrü zangbülungsohnung.

⁵ Ihnü nüh nyüm, I tase, I zii, I rihlong apümnü khatanung.

⁶ Ihnü hiba yangdila lirü apüm kyüsehnung; adrünung dhsaranü nyitsarü ko kanglungrü apüm süsohnung.

⁷ Ta nüh, nü pohki adirüti ko müyurü chita, yangkong ko dhsara lanü sürü nyingcho, Ihnü nührü apüm nührü kyüsehnyürü nührü rorüh yangthsaba Nebukadnezar khyang kohchehsohnung. Nebukadnezar-nü nührü süsohnung. Abinü nührü süsü münyingjünung mahkhang nührü sütesü yanglilüm ko amüi müngunung. Ih, Abüdongba-nü choko.”

⁸ Hütsüde Abüdongba-nü müyurü te I khyang hita yosohcho, “Nyieng! Ih, Abüdongba-nü nührü khyang akang ko asü lang anyüh yola khüdu thronung jüre.

⁹ Sü yangdila linang abi rothsa mahkhang yangkong mahkhang dhsaranü sünung. Ta ade yangdi beti yaba Babylon-rü te sünü wü lüpnang, arühlü mükyüsehnung; apu akanglü tsichehnung.

¹⁰ Hiba yangdi hi Ihnü mürikinung, ta changjünung dhrongchehko. Hütsü Babylon yangthsaba khyang jünung ko abinü alih chah müdrengkeh trüp-pehjünung. Ih, Abüdongba-nü choko.”

Juda Yangthsaba Kukhi chah Yukhacho

¹¹ Abüdongba-nü yusi hi David trah, Juda yangthsaba kukhi te yonung Ite yocho:

¹² “Ih, Abüdongba-nü tu yoro nyieng. Nyümong mükhu yuje du nguchisohng. Thsüyohchüba nyitsarü tsü sünü thsüyohchüro abi chahnü tsungtieng. Nühnü hütsüta münguchikhang, nühnü nguchiba amünyi tsünü mümehchehsohba michang kyo I rihlong chürosohnung.

¹³ Jerusalem, angah la lung yacho kyo, nüh athseng dhimüsu yale. Ta Ihnü nüh nyüm khatanung. Sünü nührü mümahchehnung mahkhang nührü tbü müthsangnyangcheh pü nührünü yore.

¹⁴ Ta nührü nguchi ngang Ihnü nührü khingchinung. Ihnü nührü yangthsaba kuh la michang thsürangnung ko michang tsünü hütsüla licho lüpcho trüp-pehnung. Ih, Abüdongba-nü choko.”