JEREMIA 20 - AMÜSA BAIBEL (BSI)

Jeremia ko Bebüba Pashur nyüh Yuji

¹ Khode Amübükuh la ayingthsaba Bebüba, Imer tsurü Pashur-nü Ihnü sobhocho hiri yuchicho,

² Ih xüpnahpü Amübükuh la Benjamin Tbükhüm shündhün ixilihnü rahpü yohpünung yuzengjücho.

³ Nyangnyü khüu, rah liba lanü Pashur-nü Ih lehchehpü, Ihnü abi te yocho, “Abüdongba-nü nü neng Pashur müdsi. Abinü dsijüba neng tsü ‘Apümlang Adrüba.’

⁴ Abüdongba apunü yocho, ‘Ihnü nüh nüpu ko nü shangrüti nengdang adrüba kangsohnung ko arüh atümung arüh rorüh nohshengnü kyüsehcho nühnü ngunung. Ihnü Judarü apüm Babylon yangthsaba kheh la jünung; abinü khürü arangyohrü kang arüh lih lang notsinung ko anyingcho tsü süsohnung.

⁵ Arüh rorüh khyang hiba yangdi kuthsi apüm kengcho khyüsohnung ko Juda yangthsarüti kuthsi zeh arüh kuthsi ko thsidi apüm zang khyüsohnung ko lüpcho Babylon lang hitsisohnung.

⁶ Ko nüh, Pashur, nüh ko nü kukhi apüm rang Babylon lang notsinung. Hütsüla nühnü arahkheh hütsütoi yoba nü shangrü yola nüh sünung ko dhrürangnung.’”

Jeremia-nü Abüdongba te Longmüsücho.

⁷ Abüdongba, Nühnü Ih kihyochüko, ko Ih kihyocho lile. Nüh I tenü amüküp-u, ko Nühnü Ih kohko. Ih bürü münyüdong kangko; mükhyang Ih müthsamünyüre.

⁸ Khodederü Ihnü choro, Ihnü khongre, Ihnü züdere, “Shüh khatoh Achangba!” Abüdongba, Ihnü Nü yusi sobhochonü Ih lede münyüjo ko yübüre.

⁹ Ta khode, “Ihnü Abüdongba nbüchünung ko Abi nengla adelü müchonung” pü Ihnü yonang, hütsüde Nü yusi tsü michang kyo Ifü la ayonglang trüpre. Ihnü hütsü ranglinung müküpre, ta hütsü müranglichehre.

¹⁰ “Apümlang adrünung lile, pü apümnü chochicho Ihnü yuchire. Ihsanü yangbe te abi nengdang yonung.” I shangrükhungnü mii Ih khülusohnung jümre. Arühnü yore, “Abi rahmütsanung kohnung, khang Ihsanü abi rangnung ko rühyangnung.”

¹¹ Ta, Abüdongba, Nüh re zeh ko Akohba I lahpi zehle, ko I dhsümthserü amükoh ngunung. Arüh lede nengdang ashah khyünung, tunüo arühnü mükoh. Arüh ashah tsü khodesü münbüchünung.

¹² Ta, Akohba Abüdongba, Nühnü nyitsarü athsalang thsadsüre; arüh lümlong ko lasiking müdhele. Hütsüeko nühnü I rorüh chah rühyangcho Ite ngusohng, tunüo Nü kheh la I bhamüling jopehko.

¹³ Abüdongba te khi thsaang! Abüdongba seing! Abinü amütsarü khehlanü asehchirü khümchore.

¹⁴ I suroba nyümong tsü chokehcholaang! I tpanü Ih nümüsuba nyümong tsü tülümchehsoh!

¹⁵ Uwa yang, “Adhrerüe! Nüh adhrerü nguko” pü yusi hiroba nyitsarü tsü chokehcholaang!”

¹⁶ Abi tsü Abüdongba-nü müchomangpü changsohba yangditi kyosohng. Abi khyang rühchicho yuva anyangnyü ko nyüthungla chita yuva yuchisohng,

¹⁷ tunüo abinü Ih müsuroe mükyüseh. Arelang, Itpa mibong tsü I kong thsaba thsako.

¹⁸ Tuepü Ih surocho? Chongcha roto du ko I akang ashah la changkanung surocho ang?