JEREMIA 2 - AMÜSA BAIBEL (BSI)

Tsingrangba-nü Israelrü Xükümcho

¹ Abüdongba-nü yusi hi

² Jerusalem la lirü atümung te sobhonung Ite yocho: “Nüh dhrezade khüta yuje chocho Ihnü lümkehre, Ihjü kuthriyeng nühnü khüta Ih müicho; müchisicho lih ko lipilih khu, nühnü khüta I khanglang iirocho.

³ Israel, nüh I müleng yo; nüh I Amüsa kuthsi. Ihnü chongcha ko achangba nührü dhsakehjürü müipi chah müthehcho. Ih, Abüdongba-nü choko.”

Israelrü Jümürü Münyi

⁴ Abüdongba yu nyieng, nührü Jakob trah, nührü Israel hungti.

⁵ Abüdongba-nü yore: “Nührü jümürünü Ih nyümnungthsa I chah tu dhingchehcho? Tu chahnü arüh I tenü za tsicho? Arühnü amükhyu kyothri mübücho ko arühbürü amükhyu kangcho.

⁶ Arühnü Ih mülümxücho, Ihnü arüh Ijip lanü nüchehnye, ko akungaselih khu nünye: lipilih ko akungase ko dhsürü lih, süsü müliba lih ko süsü mülahkhudhingcho lang.

⁷ Ihnü arüh asu lih lang noro tsang rii ko apa tsahma atsati tsusohcho. Ta arühnü I lih thsangnyangjücho; Ihnü jücho lih arühnü münyijücho.

⁸ ‘Abüdongba khüde liro’ pü bebürünü mütsingdhing. Ipu bebürünü Ih mümüdhecho. Yangthsarütinü Ih nyüm yacho; Azikehrütinü Baal nengla choyohcho ko amükhyu kyothri mübücho.”

Müyurü Nyüm Khiyu

⁹ “Hütsünü Ih Abüdongba-nü müyurü nyüm khiyu linung. Ihnü arüh shümtsurü nyüm khiyu linung.

¹⁰ Nyüzüdulang Cyprus mütrolang wüng, ko nyüchüro lahpi Kedar lih lang khürü müthehng. Ko hi kyo mütikehdhingnang nührünü müdhenung.

¹¹ Tu yuchonüsü arüh tsingrang mümülidhing, arüh tsü yuje tsingrang müthsanye. Ta I müyurünü arüh khyang nengse hirojüba Tsingrang tsü, arüh khyang tu münguchichehjüba tsingrang te mülitako.

¹² Hütsünü adrünungkeh shühchinung ko nyekasohnung Ihnü ning te yuzeng jüko,

¹³ tunüo müyurünü münyi anyüh shitpahko: arühnü akang kih yongna Ih pehjüko, ko kih mütingba atsohnahcho kihkong juko.”

Israel Yuje Müchocho Amii

¹⁴ “Israel tsü ayurü mah; abi ayurü kangnung müsuro. Khang tuepü abi rorünü abi iichiro?

¹⁵ Arühnü abi chah kihkhünying kyo rengkehjüko; arühnü abi lih lihpi kangsohko, ko abi yanglihti sehchi thsangnyang pehjüko.

¹⁶ Ho, Memfis ko Tapanes-rünü abi thah müprüpjüko.

¹⁷ Israel, nühnü hi nüpu chah hiroko! Nühnü Ih pehjüko, Abüdongba nü Tsingrang, Ihnü nü langla nowüde.

¹⁸ Ijip lang wüchonü nüh tu jingchonung? Nile Yongkhi kih yongnungo? Assyria lang wüchonü tu jingchonung? Eufrates yongkhi kih yongnungo?

¹⁹ Nührübürü münyinü nührü khingchinung, ko I tenü ximüla tsiba tsünü nührü mülangjünung. Ih, Abüdongba nührü Tsingrang pehjüba ko yocho mühnyiba tsü khüta amüthsalang ko akhanang hütsü nührünü müdhenung. Ih, Amichahba Akohba Tsingrang-nü choko.”

Israelrünü Abüdongba Mümübücho

²⁰ Akohba Abüdongba-nü yore, “Israel, papade nühnü Iyu mükhyüchocho; nühnü Iyu mühnyicho ko mümübücho. Akhang müipi chah ko singdong adhülüm müipi pohki, nühnü rii tsingrang mübücho.

²¹ Ihnü nüh shükusih atsauba majüh kyo nüh khyümcho. Ta nüh tu kangcho dhing! Nüh asühcho amükhyu shükusih kyole.

²² Nühnü aphonü khee thsütohnye, nü mülang arah tsü Ihnü ngu du linung.

²³ Nüh mümünyi pü nühnü khüta yonung, khodesü Baal tsingrang mümübü pü khüta yonung? Dhing, nühnü angah la khüta amünyi shitpahcho? Nüh tu nguchichonang dhing. Nüh alangtseh kyang, rangmü ut

²⁴ lehcheh khyachi, lihpilang tsohnah tsicho kyole. Khode abi akhyünyüba ronang, sünü hütsü rahsehchehnung? Abükyü müruba apung tsü longlüm kangre; akyanglü lede abükyünü kii yare.

²⁵ Israel, nü jing tükyah, mahkhang aparü tsingrang iichidenü nü linga tükungsoh. Ta nühnü yore, ‘Imoh! Ih ximülanung mükoh. Ihnü shuparü tsingrang mü-iipehko, ko arüh khanglang wünung.’”

Israel Khingchinung Aleng

²⁶ Abüdongba-nü yore, “Rangcheh nyümong aführü ashah khyücho kyo, nührü Israelrü atümung, nührü yangthsarüti ko adirüti, azikehrü ko bebürüti apüm ashah khyünung.

²⁷ Nührü sürünü singdong khüdu te hütsü uwa pü ko lung khüdu te Itpa pü dsiro, nührü apüm ashah khyünung. Hi tikehnung tunüo nührünü I yanglang ronung mülih I tenü ximüla tsiko. Ta nührü chongcha mütohdelü, nührünü Ite ro khümchoung pü kihchire.”

²⁸ “Nührünü nührübürü nengdang külüpba tsingrangsü khülo? Nührü chongchala lide arühnü kohkhang arüh khyang nührü khümchosohng. Juda, nührü tsingrangti nührü yangditi toi lile.

²⁹ Nührü longmüsü tu liro? Tuepü nührünü Ih nyümcho?

³⁰ Ihnü nührü khingchicho, ta hütsünü tu mükülüpcheh; nührünü I khyang mümüchongchijü. Rihlong chüroba kihkhünying kyo, nührünü nührü azikehrüti müpsehko.

³¹ Israelrü, Iyu nyieng. Nührü nengdang Ih lihpi ko amarürah dhsürü lih kyo licho mah-o? Khang, tuepü nührünü nührü thsanyücho thsa ko I yanglang khodesü thali müronungepü yoro?

³² Lazarünü abükyü nyihkhong jengki mahkhang kuthri jengki nbüchünung do? Ta I müyurünü nyümong mükhilong Ih nbüchüko.

³³ Nührünü müilarü khüta iichinung dee müdhele. Amütsauba khingkurünü mii nührü chahnü nyichonung kohle.

³⁴ Ailümrü ko achomükehrü shühnü nührü jengki chah münohko, afüashi shühnü mah. “Ta hütsütapü mii nühnü yore,

³⁵ ‘Ih mülang mühle; yutsatsa adelü Abüdongba-nü Ite zii müchüro.’ Ta Ih, Abüdongba-nü nührü khingchinung, tunüo nührünü amünyi müshitpah pü yoko.

³⁶ Nührünü apa yucho tsingrang yang ximülanü nührübürü amii müli kangko. Assyriarünü nührü bichicho kyo, Ijiprünü nührü wahsohnung.

³⁷ Nührünü Ijiprü tenü ashah khyo ximüla tsinung. Sürü chah nührünü longlangro, arüh tsü Ih, Abüdongba-nü mükhyücho; arüh chahnü nührü tu müjingchonung.”