JEREMIA 19 - AMÜSA BAIBEL (BSI)

Amüpnahcho Füh

¹ Abüdongba-nü Ite wü alih füh khüdu lihnung yocho. Abinü I yola azibarü khürü ko bebürü azibarüsü khürü nüpü,

² Hinnom Ngahlang Fühlahrüp Tbükhüm khu wünung yocho. Hütsüla Abinü I khyang jünungba yusi tsü sobhonungba licho.

³ Abüdongba-nü Ite hita chonung yocho, “Juda yangthsarüti ko Jerusalemrüti, Ih, Akohba Abüdongba, Israel Tsingrang-nü yocho nyieng. Ihnü hiba limih la hütsü yuchirü atümung nangkhi yingyingchüro achangba khüdu hironung.

⁴ Ihnü hi nguchinung tunüo müyurünü Ih thrüchahchüpehko ko arühbürü mahkhang arüh jümürü mahkhang Juda yangthsarütinüsü mümüdheba apa tsingrangti khyang kangmübü jo hiba lih hi münyijüko.

⁵ Arühnü hiba müdüm hi achomükehrü shühnü jengsohko ko arüh tsuzarü kangmübü trüp mübünung arühnü Baal tsingrang khyang bholu külüpko. Hita nguchinung khodesü Ihnü arüh khyang mümüla; I lüm lasü khodesü müro.

⁶ Hütsünü, hiba müdüm te Tofet mahkhang Hinnom Ngah pü müdsinung becho chihle. Hütsü mülih, hite Kingthrüm Ngah pü dsinung.

⁷ Hiba müdümla Ihnü Judarü ko Jerusalemrü rah müchühsohnung. Ihnü arüh rorüh khyang arüh kohsohnung ko chitala kyüsehsohnung. Ko arüh me tsü uzati ko rangmü kanglungrü tsangdhi thsasohnung.

⁸ Alahkhurü apümnü neh nyekanungthsa Ihnü hiba yangdi chah adrünung achangba hirojünung.

⁹ Arühnü yangdi mükangtinung ko hütsüla lirü kyüsehnung müküpnung. Betiba tsü khura adrünung thsachonü yangdi yonglang khüdunü khüdu tsunung ko arühbürü tsuzarü mii tsunung.”

¹⁰ Hütsüpü Abüdongba-nü Ite I yola würü betenü füh tsü müpnahnung yocho

¹¹ ko Akohba Abüdongba-nü chocho arüh te yocho, “Ihnü hiri nyitsarü ko hiba yangdi hi thsangnyangjünung, ko hütsü alih füh müpnahcho achungkehta mütsacho kyo kangnung. Müyurünü asücho tsü Tofet la mii dhrürangnung, tunüo adhrürangchah khüdesü mülinung.

¹² Ihnü hiba yangdi ko hütsüla lirüti Tofet kyo kangsohnung nyengchore.

¹³ Jerusalem la kuh, Juda yangthsarüti kuh ko püti khyang müchiji trüpba kuh apüm ko apa tsingrangti khyang yongkha tungkehjü mübüba, arüh apüm tsü Tofet kyo amümüsa linung.”

¹⁴ Hütsüpü Abüdongba-nü Abi yusi sobhosohnung müthehba Tofet lanü tsicho. Ihnü wücho ko amübükuh kekhüm la yapü,

¹⁵ müyurü te Akohba Abüdongba, Israel Tsingrang-nü yocho arüh te yocho, “Ihnü yocho kyo Ihnü hiba yangdi ko mükangmüshü liba yangditi müipi chah akhingchi apüm hironung, tunüo nührü ahongzi ko Ihnü yocho nührünü mühnyinung.”