JEREMIA 18 - AMÜSA BAIBEL (BSI)

Fühtangrü Kuh la Jeremia

¹ Abüdongba-nü Ite yocho,

² “Fühtangrü kulang tsü jowüng ko Ihnü hütsüla nü khyang I yusi jünung.”

³ Achotsü Ihnü hütsülang wücho ko abi fühtangji chah nguchiya ngucho.

⁴ Khodederü füh tsü tsa mütangchehnang, abinü lishe tsü khyo apa lango külüpcho.

⁵ Hütsüde Abüdongba-nü Ite yocho,

⁶ “Fühtangbanü lishe te alümcho nguchicho kyo Israel te nguchinung Ih athsalang mühle ang? Fühtangrü kheh la lishe kyo nührü I kheh la lile.

⁷ Ihnü masü te yucho khüdu mahkhang yanglih khüdu rohchehnung, thsangnyangjünung mahkhang changjünung yonung,

⁸ ta arühnü amünyi lanü ximülakhang, Ihnü nguchinung yoba tsü münguchinung.

⁹ Ta apa bekhyah khüdula, Ihnü yucho mahkhang yanglih khüdu külüpnung yonung,

¹⁰ ta hütsüba yucho ko yanglih tsünü I yocho mühnyi amünyi nguchikhang, Ihnü yoba tsü münguchinung.

¹¹ Hütsüeko ade, Judarü ko Jerusalemrü te Ihnü arüh nyüm lümchung chungle ko arüh khingchinung rungnümlepü young. Arüh amünyi akang liba zahnung, arüh akang mülichinung ko arühnü nguchiba tsü tünguchi pü arüh te young.

¹² Arühnü lalingnung, ‘Imoh, tuepü? Ihrü atümung ihrü thsanyücho thsa hongzi amünyi nguchi du linung.’”

Abüdongba Dhsonglicho

¹³ Abüdongba-nü yore, “Hi kyo mütikehdhingnang yucho mükhu te tsingdhing. Israelrünü adrünung nguchiko!

¹⁴ Lebanon lungrah la tsü mürang mübhümpü lidhingcho do? Arühsahkünang azong yongkhi tsü kungchehdhingcho do?

¹⁵ Ta I müyurünü Ih nbüchüko; arühnü kyothri khyang müchiji trüpre. Arüh wünung langla müthikehko; arühnü adelü langhii la mütsehre; arühnü arü mülichola tsehre.

¹⁶ Arühnü hiba lih hi adrünung kangsohko, lede müchümükehnungthsa. Alahkhurü atümungnü hütsü ngu nehnung; arühnü nyeka arüh thah ngahchinung.

¹⁷ Ihnü arüh rorüh bete I müyurü tsishosohnung, nyüchüro nyübongnü fotsiba lihwü kyo. Ihnü arüh lahpi I khang pinung; achangba rode Ihnü arüh mütronung.”

Jeremia Nyüm Arah

¹⁸ Hütsüde müyurünü yocho, “Ihsanü Jeremia nengdang lango nguchinung. Ihsa te donung bebürü, lümlong jünung amüdherü ko Tsingrangba yusi sobhonung azikehrü lede linung. Ihsanü abi mülangjüba hironung ko abi yu mühnyinung.”

¹⁹ Achotsü Ihnü dangkhidangnangcho, “Abüdongba, Ihnü yoba hi nyieng ko I rorünü I nengdang chocho nyieng.

²⁰ Amütsa tsü atsa mülih mah-o? Ta arühnü Ih longyohsohnung shukuh jure. Nühnü arüh te rihlong chüro mübichisohnung Ih Nü yanglang ro arüh nengla chocho Nühnü lümchehng.

²¹ Ta ade, Abüdongba, arüh tsuzarü kongseh süsohng; arüh khatala kyüsehsohng. Khingkurüti tsü arüh niirü ko tsuzarüti changsohng; azirü dhsaranü süsohng ko dhrezarüti khatala kyüsehsohng.

²² Dhrongyengnü arüh kuh kengchonung amülung müthehng; arüh adrüchonü trasohng. Arühnü Ih longyohsohnung shukuh juko ko Ih xohnung zeng thsapüjüle.

²³ Ta, Abüdongba, Ih kyüsehnung arüh rah apüm Nühnü müdhele. Arüh amütsa ko amünyi mülang tüpehjü. Arüh khülusohng ko Nü rihlong chüro lide arüh te chotaang.”