JEREMIA 17 - AMÜSA BAIBEL (BSI)

Judarü Münyi ko Akhingchi

¹ Abüdongba-nü yore, “Judarü, nührü münyi tsü idhsenü thrahko; thsidilung amüxinü nührü lasih la ko nührü bholu chah xehrang thrahko.

² Nührü nyitsarünü Ashera tsingranglarü nengdang sing adhülüm müipi te ko akhangchah,

³ ko rangmü la azongchah bholu ko kyothri külüpba chah mübüre. Nührü lih apüm la nührünü shitpahba münyi ngang, Ihnü nührü kuthsi ko thsidi kohro nührü rorüh khyang hitsisohnung.

⁴ Ihnü jüba lih nührünü pehjünung ko nührünü tu mümüdheba lih la nührü rorüh dikehnung, tunüo I rihlong tsü michang kyole, ko hütsüpü achangka müli trüpnung.”

Choyoh Papa

⁵ Abüdongba-nü yore, “I tenü ximüla tsiba nyitsarü, ko nyitsarü chah yudsiba ko asüba nyitsarü tasela longlangba, Ihnü hütsütari mülangjünung.

⁶ Abi tsü lipilih la rangmü akungchola ziba, tusü müchiba mih chüroba lih la liba singtrung khüdu kyole. Abi chah tu atsa khodesü mütikehre.

⁷ “Ta sünü I chah longlangro Ihnü abi müwajünung.

⁸ Abi tsü yongkhi shündhün kih la rayoh liba singdong kyole. Tsingnyü adhsa ronung abinü müdrüre, tunüo ava müyah lile; tsing müronye tu alümxü mühle; asih sihmükhyang du lire.”

⁹ “Nyitsarü lasiking sünü nyichehnung? Hütsü kyo akihyochüba apa mühle; hütsü kyangnung khura thsahle.

¹⁰ Ih, Abüdongba-nü nyitsarü lümlong yangchire; ko lasiking thsadsüre. Nyitsarü mükhu abürü licho aichi bichire, abi nguchi aichi.”

¹¹ Yujemücho thsi nguba tsü uza khüdunü aparü kyü shüpcho kyole. Abi alongdenü abi kuthsi changnung, ko amükhyula changkanung.

¹² Ihsa amübükuh tsü adikeh lanü akhang athsengchah yaba ahechi yangthsaba pümji kyole.

¹³ Abüdongba, Nüh Israel alongdi; Nüh pehjürü apüm ashah khyüsohnung. Lihwüla neng thrahba kyo arüh changpehnung, tunüo arühnü Nüh pehjüko, Abüdongba, Kih amüseng yongna.

Jeremia-nü Abüdongba te Arüku Chingcho

¹⁴ Abüdongba, Ih kyangjüng ko tsapenung; Ih iichoung ko Ih khümcho linung. Ihnü seba tsü Nüh lile.

¹⁵ Nyitsarünü Ite yore, “Abüdongba-nü ihrü nyüm külüpba adrünungti tsü khülo? Hütsüri ade nguchisohng!”

¹⁶ Ta, Abüdongba, arüh michah achangba hironung Ihnü khodesü Nüh müthsüchi; Ihnü arüh aikyahsü chongchasohnyo mülüm. Abüdongba, hi Nühnü müdhele; Ihnü tu chocho Nühnü müdhele.

¹⁷ Nüh I nengdang adrünung tüthsa; chongchala Nüh I tsikehchah lile.

¹⁸ I dhsümthserü michah ashah hirojüng, ta Ih khümchoung, Abüdongba. Arüh adrübanü jengsohng, ta Ih tüdrüsoh. Arüh chah achangba chihsohng ko arüh zangzang münohnah pehng.

Sabath Nyümong Müsa Yohpünung

¹⁹ Abüdongba-nü Ite yocho, “Jeremia, Juda yangthsarü züroba ko yangdi lanü chüduba Müyurü Tbükhüm lang tsü wüng ko Iyu sobhoung; hütsüpü Jerusalem tbükhüm apa apümlang wüng.

²⁰ Juda yangthsarü ko müyurüti atümung ko Jerusalem la lirü ko tbükhüm khu zürorü atümung te Ihnü tu yoro hütsü nyinung young.

²¹ Arühnü arüh akang müikhang, Sabath nyümong tu bha mühinung; arühnü Jerusalem tbükhüm khu tu mühizüronung

²² mahkhang arüh kuh lanü tu mühichüdunung arüh te young. Arühnü Sabath nyümong tu münguchibae; Ihnü arüh jümürü khyang yuzengjücho roh-i arühnü hütsü amüsa nyümong kang mung.

²³ Arüh jümürünü Iyu mühnyi. Ta arühnü hongzicho; arühnü Iyu mühnyicho ko I chahnü mühnyichocho.

²⁴ “Hiri nyitsarü te arühnü Ihnü mülacho apüm nyinung young. Arühnü Sabath nyümong yangdi tbükhüm khu tusü mühizüronung. Arühnü hütsü Amüsa nyümong kang mungnung ko tusü münguchinung.

²⁵ Hütsükhang arüh yangthsarü ko yangthsarü tsurütinü Jerusalem tbükhüm khu züronung ko David kyo tase linung. Judarü ko Jerusalemrü te müjang arühnü kuri akhüluba ko kuri chah pümnung ko Jerusalem yangdi tsü lede nyitsarünü jeng linung.

²⁶ Juda yangditi lanü ko Jerusalem mükang yangdongti lanü nyitsarü ronung; arüh tsü Benjamin lih lanü, azong jingdümpi lanü, azong lanü ko Juda kihjing lahpi langnü ronung. Arühnü I amübükuh yang trüp mübü ko kangmübü, tsang mübü ko müchiji ko anengse mübü hironung.

²⁷ Ta arühnü Iyu nyieng ko Sabath nyümong müsa mung. Arühnü hütsü nyümong Jerusalem tbükhüm khu tusü mühizüronung, arühnü hizürokhang, Ihnü Jerusalem tbükhümti chah michang thsürangjünung. Michang tsünü Jerusalem yangthsaba kuh trüpnung ko hütsü sünüsü mümehchehsohnung.”