JEREMIA 16 - AMÜSA BAIBEL (BSI)

Jeremia Akang nengdang Abüdongba Lümcho

¹ Adesü Abüdongba-nü Ite chota yocho,

² “Hiroh-i müdümla kuh tükang mahkhang tsuzarü tüli.

³ Hila nümüsurü tsuzarü ko tpurü chah tu tikehnungnang Ihnü nüte yonung.

⁴ Adrünung dhsaranü arüh sünung, ko arüh me rangnung ko meshünung süsü mülinung. Arüh me tsü sehnyeh roh-i bhümpünung. Arüh khatala kyüsehnung mahkhang kongseh sünung, ko arüh me tsü uzati ko rangmü kanglungrü tsangdhi thsanung.

⁵ “Meshü liba kuh la nühnü tüzüdu. Sü nengdangsü tülongri. Ihnü adelü I müyurü yangtsanü mümüwajünung mahkhang arüh te amüi ko yanglilüm müngusohnung.

⁶ Alirü ko ailümrü hiba lih la sünung, ta arüh dhrürangrü mahkhang meshürü süsü mülinung. Alongri ngusohnung sünüsü abürü fü tsehnah mahkhang thah mühehpehnung.

⁷ Amüiba nyüh khüdu süde abi longkyangsohnung sünüsü süte mütsuyongrütanung. Au mahkhang atpa süpü liba nyüh khüdu te mii sünüsü amüi müngutanung.

⁸ “Thsüti khyo liba kuh la tüzüdu. Arüh yola tsuyongnung tüpüm.

⁹ Ih, Akohba Abüdongba, Israel Tsingrang yu nyieng. Künyangtaba yuva ko kukangba thsüti yuva Ihnü zahsohnung. Hila lirü müyurünü hi tikehcho ngunung.

¹⁰ “Nühnü hiri apüm arüh te yode, tuepü Ihnü arüh hitoi mütsa khingchinung dhrongchehcho pü arühnü nüte tsingdhingnung. Arühnü tu thsamehcho ko Abüdongba arüh Tsingrang nyüm tu münyi shitpahcho pü arühnü tsingdhingnung.

¹¹ Hütsüde, arüh te Abüdongba-nü hita yorepü young: ‘Nührü jümürünü I tenü ximüla apa tsingrangti mübücho ko dikehcho. Arühnü Ih thrüchahchü pehcho ko I adoba mühnyi.

¹² Ta nührünü nührü jümürü tenüsü amütsaba nguchiko. Nührü apüm ahongzi ko amütsa ko nührünü Ite mühnyire.

¹³ Hütsü khu, hiba lih lanü nührü mahkhang nührü jümürünü mii mümüdheba lih khüdulang Ihnü nührü pehnung. Hila bürünü aparü tsingrang ama atsingse dikehnung ko Ihnü nührü te yanglilüm müngusohnung.’”

Yangtsilangnü Thalicho

¹⁴ Abüdongba-nü yore, “Ih akang liba Tsingrang-nü Ijip lanü Israelrü nüchehcho müchonung bekhyah tsehle.

¹⁵ Hütsü mülih Ih akang liba Tsingrang-nü arüh kihku lahpi lihko Ihnü arüh tsisho peh liba yanglihti apüm lanü Israelrü nüchehcho arühnü I nengla yuchüm chonung. Ihnü arüh thali arühbürü lih, arüh jümürü khyang jüba lih yang noronung. Ih, Abüdongba-nü choko.”

Aronung Akhingchi

¹⁶ Abüdongba-nü yore, “Hiri nyitsarü rangnung Ihnü ngurangrü adrong dsinung müthehre. Hütsüpü akhang azong ko lungrahkurah chii arüh iijowüsohnung Ihnü shu-iirü khütang dsinung müthehnung.

¹⁷ Arüh nguchi lüpcho Ihnü ngure. I tenü tusü rang mühle; I nahtse tenü arüh münyiti mütsiphu.

¹⁸ Arüh münyi ko mütsacho ngang Ihnü arüh khyang anyüshinü alaa jüsohnung, tunüo me kyo akang müliba kyothrinü I lih münyijüko, ko arahkheh tsingrangtinü hütsü jengjüko.”

Jeremia-nü Longlang Dangkhidangnangcho

¹⁹ Abüdongba, Nüh dunü Ih tsungtire ko re jüre; I chongchala Nühnü trore. Alih changka lanü yuchotinü ro Nüte yonung, “Ihrü jümürü arahkheh tsingrangti ko amükhyu kyothri chah khu tu mülicho.

²⁰ Nyitsarünü apu tsingrangti külüpchehnung do? Mah, ko abinü külüpnye, hütsü yuje tsingrangti müthsapü linung.”

²¹ Abüdongba-nü yore, “Hütsükhang, Ihnü lede nengdang yuchoti khyang I zii ko I tase müdhesohnung; ko arühnü Ih Abüdongbaepü müdhenung.”