JEREMIA 13 - AMÜSA BAIBEL (BSI)

Rungrüm

¹ Abüdongba-nü Ite wü rungrüm khüdu lihpü rümnung yocho; ta hütsü kih la müdhsangnung yocho.

² Achotsü Ihnü hütsü lii rümcho.

³ Hütsüpü anyüpiu Abüdongba-nü Ite chota yocho,

⁴ “Eufrates Yongkhilang wüng ko rungrüm tsü lungkoh khüdula rangpüng.”

⁵ Achotsü Ihnü wücho ko Eufrates shündhün rangpücho.

⁶ Azachah lipü Abüdongba-nü Ite thali Eufrates lang tsü wünü rungrüm tsü khyünung yocho.

⁷ Achotsü Ihnü thali wü arangpüba tsü ngude, hütsü mütsangnah akhyümütsapü li ngucho.

⁸ Hütsüde Abüdongba-nü Ite thali chotacho. Abinü yocho,

⁹ “Ihnü Juda kükhingcho ko Jerusalem dee kükhingba tsü hi kyo changjünung.

¹⁰ Amünyi nyitsarü hirinü I yocho mühnyire. Arühnü lede roh-i hongzi ko khürahre ko aparü tsingrangti mübüre ko dikehre. Hütsünü, rungrüm hi akhyüchah mülicho kyo arüh kangnung.

¹¹ Rungrümnü khahkhah rümcho kyo, Israelrü ko Judarü atümungnü I chah khahkhah rameh lisohnyücho. Arüh I müyurü thsanung ko I nengse ko Ih dhichisohnung Ihnü hi nguchicho; ta arühnü I yocho mühnyicho.”

Yongkha Füh

¹² Abüdongba Tsingrang-nü Ite yocho, “Jeremia, Israelrü te füh apüm yongkhanü jengsohnung young. Füh apüm yongkhanü jengsohnung tsü arühnü müdhelepü arühnü lalingnung.

¹³ Hütsüde, hiba lih la nyitsarü atümung yongkhanü müchasohnung, Ih, Abüdongba-nü yosohre: David chahnü trahchocho yangthsarüti, bebürüti, azikehrüti ko Jerusalemrü atümung.

¹⁴ Ko Ihnü aza-azi akyokyo, füh kyo khüdunü khüdu chah müpkehta müpzangzangsohnung. Tu amüi, dhsa lümba mahkhang yanglilümnü arüh kyüsehnung lanü Ih müyatichehnung.”

Kükhingcho Nyüm Müzahsohcho

¹⁵ Israelrü, Abüdongba-nü choko! Longlüm kang ko Abi yu nyieng.

¹⁶ Abüdongba, nü Tsingrang dhiching, Abinü amarürah mühiroede, ko azongchah nü jing mümüthiede; nühnü longdiba atsingse tsü Abinü amarürah mükangsohde.

¹⁷ Nühnü mühnyikhang, Ihnü rang nü kükhing nengdang tranung; Ihnü dee longri tranung, ko I nahshükih threhnung, tunüo Abüdongba müyurü arangyohlang küm tsiko.

¹⁸ Abüdongba-nü Ite yocho, “Yangthsaba ko abi atpa te yangthsaba pümji lanü jüronung young, tunüo arüh thah chahnü atsah atsa kuthri tsü shohjoko.

¹⁹ Juda kihjing lahpi yangditi tsü betiko; sünüsü hütsüla müzüducheh. Judarü apüm yangtsilang notsipehko.”

²⁰ Jerusalem, Dhing! Kihku lahpinü nü rorüti tsehle! Nü chah nyümkehjüba müyurü, nühnü dümpiba nü müyurüsü khülo?

²¹ Nü shangrüepü lümbatinü nüh mahcheh ko nü michah yangthsade nühnü tu yonung? Khingkurü azarü surode kyo nüh dhsanung.

²² Nü chah tikehcho hiri apüm dhingdhingkhang, tuepü nü jengki rehnahjücho, ko nüte khing mükhongcho, ko tsingdhingkhang, hütsü nü münyi diracho ngang.

²³ Ethiopiarünü arüh küp mülichinung do, mahkhang müroh khünyingnü ayah mülichichehnung do? Hütsü mülichichehkhang, nührü amünyi du nguchirünü athsalang nguchinung nyichochehnung.

²⁴ Lihpi nyübongnü manying fotsicho kyo, Abüdongba-nü nührü tsishosohnung.

²⁵ Nührü müngu hi kyo linungepü Abinü yore. Abinü nührü chah hiroh-i nguchinung dhrongchehko, tunüo nührünü Abi nbüchüpehko ko arahkheh tsingrangti chah longlangko.

²⁶ Abüdongba apunü nührü jengki khohpehjünung ko nührü ashah khyüsohnung.

²⁷ Abinü thrünyiba nührünü nguchicho Abinü nguko. Abinü nüh akhangchah ko angah la, bürü nitpürü mükhyahba nyitsarü mahkhang kuri apungnü atrüh khüdu khanglang shangba kyo, müyudsirü tsingrangti khanglang wücho nguko. Jerusalemrü, nührü ahohah! Khodeto nührü müdhseng linung?