JEREMIA 12 - AMÜSA BAIBEL (BSI)

Jeremia-nü Abüdongba te Yutsingcho

¹ “Abüdongba, Ihnü Nüte I khiyu rehtakhang, Nüh du athsalang thsanung. Ta Ihnü Nüh yujeba nengdang tsingdhingnung, Tuepü amütsarü hitoi müwaro? Tuepü yuje müchorünü akoh nguro?

² Nühnü arüh khyümre, arühnü ara rare; arüh zire ko asih sihre. Arühnü lede Nü tsacho chore, ta arüh lasih Nü tenü ashu lile.

³ Ta, Abüdongba, Nühnü Ih müdhele; Ihnü tu nguchiro, ko Nüh khüta müiro Nühnü ngule. Amütsarü nyitsarü hiri amüpsehnung san kyo tphah tsieng; arüh mümüpseh-ede arüh nyahng.

⁴ Ihrü lih khütoi nyahli kungnung, ko luh la zanu mükunung? Ihrü nyitsarü khürahchonü kanglungrü ko uzati sükhangle, arühnü yore, ‘Ihsanü nguchicho Tsingrangba-nü müngure.’”

⁵ Abüdongba-nü yocho, “Jeremia, nyitsarü te shangmülitachonü kyahkhang, nühnü khüta kuri te shangmülitanung? Nühnü asehsa la müyachehkhang, Jordan rangmü la khüta yachehnung?

⁶ Nü jünirü, kukhi la khiyohnü mii nüh kihyochüre; nü nyümrüti yola arühsü zehle. Arühnü tsa chotanye, arüh chah tüyudsi.”

Abüdongba Longricho

⁷ Abüdongba-nü yore, “Ihnü Israel thrüchahchüpehko; Athrochehcho yucho Ihnü pehko. Ihnü müiba nyitsarü tsü Ihnü arüh rorüh kheh la jüko.

⁸ Athrochehcho I müyurünü Ih nyüm yare, mürong la kihkhünying kyo arühnü I chah rengkehre, hütsünü Ihnü arüh thrünyire.

⁹ I athrochehcho nyitsarü tsü müdinü apümlangnü betiba uza kyole. Rangmü kanglungrü dsinü thsütila tsü zehsohng!

¹⁰ Shuparü yangthsarü adrongnü I shükusih yo thsangnyangjüko; arühnü I luh dhrümnahjüko; arühnü aditpangnung I lih lipilih kangsohko.

¹¹ Arühnü hütsü apehlih kangsohko; I bete hütsü peh jole. Alih apüm lipilih kangko, ko sünüsü müxükümre.

¹² Lipilih azong lahsah nyitsarünü mahnung rore. Alih tsü apüm changsohnung Ihnü khata müthehko; süsü yangtsa la mülinung.

¹³ I nyitsarünü litoh shucho, ta za xabülungcho; arühnü khee nguchicho, ta tusü müngucho. I rihlong chürocho khu arüh tsahma mütsacho.”

Israel Kurümrüti te Abüdongba Anyengchocho

¹⁴ Abüdongba-nü yore, “Ihnü I müyurü Israelrü khyang jüba lih thsangnyangjürü Israelrü kurümrü nengdang ayonung lango lile. Ihnü amütsarü tsü sing aranü rohchehcho kyo, arüh yanglih lanü khyümüinung ko Ihnü arüh khehlanü Juda khümchonung.

¹⁵ Ta Ihnü arüh khyümüiko khanglang; Ihnü arüh te yanglilüm ngusohnung; Ihnü yucho müipi abürü lih ko yanglih lang noronung.

¹⁶ Arühnü arüh lasih apümnü I müyurü yangthsa khyüchokhang, ko khüdupi arühnü I müyurü te Baal nengla yuchümsohcho kyo, ‘Abüdongba akang lichonü’ arühnü yuchümkhang, arühsü I müyurü yola khiyohnung ko müwanung.

¹⁷ Ta yucho khürünü mühnyikhang, Ihnü arüh aranü rohchehnung ko changjünung. Ih, Abüdongba-nü choko.”