JEREMIA 11 - AMÜSA BAIBEL (BSI)

Jeremia ko Azengchotacho

¹ Abüdongba-nü Ite yocho,

² “Anyengchotaba hi nyieng.

³ Hiba azengchotaba hi sünü mübichinang, Ih, Israel Tsingrang Abüdongba-nü abi chah chokehchola khüdu jopehko pü Judarü ko Jerusalemrü te young.

⁴ Hütsü Ihnü arüh nengdang trüp yaba Ijip lih lanü nüchehde arüh te külüpcho azengtacho lile. Ihnü arüh te I yochonyi Ihnü mülacho lüpcho nguchinung yocho. Arühnü I yocho nyikhang arüh I müyurü ko Ih arüh Tsingrang thsanung Ihnü arüh te yoko.

⁵ Hütsükhang Ihnü arüh jümürü te ade arüh liyaba nyikih ko thsakukih pohyaba lih tsü jünung nyengchoko.” Ihnü yocho, “Hütsütasohng, Abüdongba.”

⁶ Hütsüde Abüdongba-nü Ite yocho, “Juda yangditilang ko Jerusalem yanglonglang wüng. Hütsüla I yusi sobhoung ko hiba azengchotaba nyinung ko hütsüri bichisohnung müyurü te young.

⁷ Ihnü arüh jümürü Ijip lanü nüchehde, I yuzeng bichinung yuzengjücho ko chünye yingcheh mütozah müzahsoh rore.

⁸ Ta arühnü mühnyi mahkhang mübichi. Hütsü mülih, atümungnü hongzi lede roh-i du mütsa licho. Azengchotacho yohpünung Ihnü yuzengjücho, ta arühnü mükhyücho. Hütsünü Ihnü hütsüla zehba akhingchi apüm arüh michah hirocho.”

⁹ Hütsüpü Abüdongba-nü Ite yocho, “Judarü ko Jerusalemrünü Ih nyüm rah külüpre.

¹⁰ Arühnü I yocho mühnyiba arüh jümürü yang thaliko; arühnü apa tsingrangti mübüko. Judarü ko Israelrü anyüdingnü Ihnü arüh jümürü te külüpba azengtacho thsangnyangko.

¹¹ Hütsüeko ade, Ih, Abüdongba-nü arüh chah achangba hirojünung ko arüh mütsiphunungepü arüh te müzahsohko. Ko arühnü Ite arüku ching züdede, Ihnü arüh yu mühnyinung.

¹² Hütsüde Judarü ko Jerusalemrünü arühnü kangmübü jüba tsingrangti te ihrü khümchoung pü züdenung. Ta hütsüri tsingrangtinü hiba achangba rode arüh mükhümchochehnung.

¹³ Judarünü arüh yangdi toi tsingrangti yohpüko, ko Jerusalemrünü yangdi lang toi Baal tsingrang khyang kangmübü jünung bholu külüpcho.

¹⁴ Jeremia, hiri nyitsarü nengdang Ite tüdangkhidangnang mahkhang tükihchi. Arüh chongchala lide ko arüku nengdang kihchide, Ihnü arüh te mühnyinung.”

¹⁵ Abüdongba-nü yore, “Ihnü müiba müyurünü amünyi nguchire. I amübükuh la ronung arüh tu dekhingro? Nyengchocho ko kangmübü jüchonü asüba tsü yatinungepü arühnü lümrü mah-o? Hütsünü arüh künyangsohnung mah-o?

¹⁶ Khüdupilü Ihnü arüh te ava dhülüm olive sing, asih mütsenglüp sihba pü dsicho; ta ade, ningkicho kyo khong Ihnü ava chah michang thsürangjünung ko ajengza kyopehjünung.

¹⁷ “Ih, Akohba Abüdongba-nü Israel ko Juda khyümcho; ta ade Ihnü asübanü khangre. Arüh amüthsalang nguchicho ngang, hi arühbürü michah hiroko. Arühnü Baal tsingrang khyang kangmübü jücho khu I zichürosohko.”

Jeremia Nyüm Rah

¹⁸ I rorütinü Ih nyüm rah külüpcho Ite müdhesohcho.

¹⁹ Ih amüpsehnung nowüba alonglüm sanza kyo licho, ko arühnü Ih nyüm rah amütsa lümchung chungcho Ihnü mümüdhecho. Arühnü yocho, “Sing hi asih zeh Ihsanü repehnung; adelü sünüsü abi mülümkehsohnung Ihsanü abi kyüsehnung.”

²⁰ Hütsüpü Ihnü dangkhidangnangcho, “Akohba Abüdongba, Nüh yuje yukharü lile; Nühnü nyitsarü lümcho ko thoh thsadsüre. Ihnü Nü kheh la I bhamüling yohpüjüre; hütsünü hiri nyitsarü chah rühyangcho Ihnü dhingnung.”

²¹ Anathot-rünü Ih müpsehnyücho, ko Ihnü Abüdongba yusi mütozah chokhang Ih müpsehnung yoko.

²² Hütsünü Akohba Abüdongba-nü yocho, “Ihnü arüh khingchinung! Arüh dhrezarüti chitala kyüsehnung; arüh tsuzarü kongseh sünung.

²³ Ihnü Anathot-rü chah asüba chihsohnung bekhyah khüdu yohpüle, ko hütsüba bekhyah chihde, arüh süsü mühnyingnung.”