JEREMIA 10 - AMÜSA BAIBEL (BSI)

Kyothri ko Yuje Mübü

¹ Israelrü, nührü nengdang Abüdongba yu tsü nyieng.

² Abinü yore, “Aparü yucho tüithsa; ningchah pathsa nguchonü tülümkücha, aparü yuchonü hütsüri drünye.

³ Hiri nyitsarü mübü yangthsa tsü adeng. Mürong lanü singdong khüdu rerü; ko singkyührünü hütsü kyüchehre,

⁴ ko hon ko taripinü mükingre. Hütsü mükhülusohnung imühinü hamkehre.

⁵ Hütsütari kyothri tsü luh la uza rihba kyole; arühnü yu chonung mükoh; arüh tsü dhire, tunüo arühnü mütsehcheh. Arüh tüdrü: arühnü tu müdhsakehjünung, ko atsasü tu münguchijünung.”

⁶ Abüdongba, Nüh kyo sü mühle; Nüh akohba, Nü neng arangcheh ko akurah.

⁷ Sünülü Nü jengreng müdrünung, yucho apüm yangthsabong. Nü jengreng drünung aleng. Yuchotila amüdherü yola mahkhang arüh yangthsarüti yola Nüh kyo sü mühle.

⁸ Arüh atümung adohrü ko amüsithsa. Arühnü sing kyothri chahnü tu nyichonung?

⁹ Arüh kyothri tsü Spain lanü taripi ko Ufaz lanü hon-nü müshüticho, apüm khehnü külüpcho du; Axangcheh shükyahrü kyahcho anyahrüm ko mohmüru jengki khyüre.

¹⁰ Ta Abüdongba, Nühlü yuje Tsingrang, Nüh akang liba Tsingrang ko achangka müliba yangthsaba. Nü rihlong chürode, limih dhridhrire; yuchotinü Nü rihlong mürangcho.

¹¹ (Ning ko alih müthriba tsingrang tsülü changjünungepü arüh te nührünü young. Arüh limih la khüdesü mülinung)

Tsingrangba Nengse Khi

¹² Abüdongba-nü Abi ziinü limih külüpcho; Abi lümlongnü lihküp thricho ko ning lehmüthehcho.

¹³ Abinü yuzeng jüde ning michah kihnü khongcho; Abinü alih achangka lanü nyükhi hirore. Abinü tsing yola tsingchi külüpcho ko azahkehji lanü nyübong müthehre.

¹⁴ Hi ngude, nyitsarünü adohrü kang lümlong chahre; kyothri külüprü tsü züchang pehre, tunüo arühnü külüpba tsingrang tsü arahkheh ko akang mühle.

¹⁵ Arüh tsü amii mühle ko pehnungba du; Abüdongba arüh te dhsükehnung rode, arüh changpehnung.

¹⁶ Jakob Tsingrang tsü arüh mükyo; lüpcho külüpba tsü Abi, ko Abinü Israel tsü apu yo thsanung throchehcho. Akohba Abüdongba tsü Abi neng.

Aronung liba Yangtsi

¹⁷ Jerusalemrü, nührü betiko! Nührü kohro zang.

¹⁸ Abüdongba-nü hiba lih lanü nührü iipehnung; Abinü süsü münying changsohnung. Abüdongba-nü choko.

¹⁹ Jerusalemrünü züdecho, “Ihrü khura mütsa dhsakehko! Ihrü madhsa mükyangnung. Hi ihrünü rangchonung nguchi thsanungepü ihrünü lümcho!

²⁰ Ihrü shükuh thsangnyang lile; arüh rahcho düshü tohnahko. Ihrü tsuzarü apüm tsipehko; ihrü shükuh thsachinung süsü mühle; akitising kinungsü süsü mühle.”

²¹ Ihnü lalingcho, “Ihrü langnürüti adohrü du; langnüsohnung arühnü Abüdongba te müching. Hütsü khu arüh amükoh ngucho, ko müyurü tsishocho.

²² Nyieng! Yusi roko! Kihku lahpi yucho khüdula khiyu amülah chüroko; arüh rothsarütinü Juda yangditi lipilih kangsohnung, shirung lamungji khüdu.”

²³ Abüdongba, palu nahdhingkeh la palu abüdongrü mah; Sünüsü abürü akang mürahseh pü Ihnü müdhele.

²⁴ Nü müyurü müchongchijüng, Abüdongba; ta dee mülingnü mah, mahkhang Nü rihlong chüro lide ihrü tükhingchi; ihrü nengdang hütsü achangka thsanung.

²⁵ Nü rihlong tsü Nüh mümübüba yuchoti ko Nüh mükhyüchoba nyitsarüti michah küdusohng. Arühnü Nü nyitsarü müpsehko; arühnü ihrü riri changsohko ko ihrü lih apehlih kangsohko.