JEREMIA 1 - AMÜSA BAIBEL (BSI)

Jeremia

¹ Hiba vakha hi Benjamin lih la Anathot yang la bebürüti yola nyüh khüdu, Hilkia tsurü Jeremia-nü chocho thrahcho lile.

² Abüdongba-nü Juda la yangthsaba Amon tsurü Josiah yangthsacho kang dhüreasangula Jeremia te chotacho,

³ ko abinü thali Josiah tsurü Jehoiakim yangthsa bekhyahla chotacho. Hütsüpü khanglang mii, Josiah tsurü Zedekia yangthsacho kang dhürekheh chii, Abüdongba-nü abi te adrongpi chotacho. Hütsüba kang choo müngaula Jerusalem la lirüti yangtsilang kümtsicho.

Jeremia Dsicho

⁴ Abüdongba-nü Ite yocho,

⁵ “Nüh amila müthriedenü Ihnü nüh throchehcho, ko nüh müsuroedenü yuchoti yanglang azikehrü thsanung Ihnü nüh throchehcho.”

⁶ Hütsüde Ihnü lalingcho, “Amichahba Abüdongba, khüta chonung Ihnü mümüdhe; Ih azarü due.”

⁷ Ta Abüdongba-nü Ite yocho, “Nüh azarü duepü tücho, ta Ihnü müthehcho nyitsarü yanglang wüng, ko Ihnü nüte yuzengjücho apüm arüh te young.

⁸ Arüh tüdrü, tunüo nüh tsungtinung Ih nüte zeh linung. Ih, Abüdongba-nü choko!”

⁹ Hütsüpü Abüdongba-nü akheh müyungchü I beküp chah thahpücho, ko Ite yocho, “Nyieng, nühnü chonung yu Ihnü nü khyang jüre.

¹⁰ Chünye yuchoti ko yanglihti michah, rohchehnung ko khülusohnung, thsangnyangnung ko mükhanung, thsanung ko khyümnung Ihnü nü khyang tase jüre.”

Müngucheh Anyüh

¹¹ Abüdongba-nü Ite yocho, “Jeremia, nühnü tu nguro?” Ihnü lalingcho, “Almond singdong jengza khüdu.”

¹² Abüdongba-nü yocho, “Nüh yuje” ko “Iyu tikehsohnung Ihnü dhingyehre.”

¹³ Hütsüpü Abüdongba-nü Ite thali chotacho. “Nühnü apa tu nguro?” Ihnü lalingcho, “Ihnü kihku lahpi füh khüdu tsüchi ngure, ko hütsü hilang mükhapehnung thsale.”

¹⁴ Abinü Ite yocho, “Achangba tsü hiba lih la lirü chah kihku lahpinü tsüchi chüronung,

¹⁵ tunüo kihku lahpi yuchoti apüm Ihnü dsire. Arüh yangthsarütinü arüh pümji Jerusalem tbükhümti ko tbü mükang külüpnung ko Juda la apa yangditi mükangsü külüpnung.

¹⁶ Ihnü I müyurü khingchinung, tunüo arühnü amünyi shitpahko; Ih pehjüko, kangmübü apa tsingrang khyang mübüko, ko kyothri külüp arüh mübüko.

¹⁷ Rungnüm, Jeremia; Ihnü nü khyang yuzengjücho apüm arüh te wü young. Ade arüh tüdrü, mahkhang nüh arüh te lide, Ihnü nüh alaa drüsohnung.

¹⁸ Nyieng, Jeremia! Hiba lih la lirü atümung: Juda yangthsarüti, adirüti, bebürüti, müyurünü nüh nyüm yanung.

¹⁹ Ta chünye arüh nyüm yanung Ihnü nü khyang tase jüre; nüh tsü lungtbü yangdi kyo, idhse dongdi, ko imüyeng tbü kyo linung. Arühnü nüh mükohnung, tunüo nüh tsungtinung Ih nüte linung. Ih, Abüdongba-nü choko.”