JAKOB 5 - AMÜSA BAIBEL (BSI)

Alirü nengdang Amüzahnung

¹ Ade, nührü alirüti, Ite nyieng! Nührü michah tu thsamütsa roro hütsü nengdang meshü traang!

² Nührü kuthsi chang tsire ko nührü jengki azahnü tsukhangre.

³ Nührü hon ko taripi dhrongnü tsütire, ko hiba dhrong tsü nührü nyüm yuzithsanung ko michangnü roh-i arühnü nührü shuh tsukhangnung. Nührünü hiba achangka nyümongla kuthsi sühpüre.

⁴ Nührü luh la nguchirü khyang nyükheh ngang müjüre. Arüh mükünyangcho tsü nyidhing! Nührü maxarü züdeba tsü Abüdongba akohba Tsingrangba nangkhila züduko.

⁵ Nührünü limih la müzamüphu ko künyangküshi liko. Akyüsehba nyümongla nührü longnyüpcho.

⁶ Achomükeh nyitsarü nührünü mülangjü müpsehko, ko arühnü nührü nyüm mühya.

Arangcho ko Dangkhidangnang

⁷ Hütsüeko jünirüti, Abüdongba royingcheh rangcho lieng. Dhing, luthsarünü luh lanü tsahma chüronung khütoh-i rangcho yingro. Abinü mamüki ko mürüpmünu tsing nengdang rangcho yingre.

⁸ Nührünüsü rangchoung. Nührü alongdi amülah lieng, tunüo Abüdongba ronung nyümong tsü amünyeh thsako.

⁹ Jünirüti, Tsingrangba-nü nührü yu mükhanungthsa, khüdunü khüdu tünyümta. Yukhaba tsü ronungthsako.

¹⁰ Jünirüti, Abüdongba nengla chorü azikehrüti tsü lümchehng. Arühnü achongcha la rangchocho adüzü khyüng.

¹¹ Ihsanü arüh te akünyang ko dsire tunüo arühnü rangchoko. Job-nü rangchocho nührünü nyisiko, ko Abüdongba-nü achangkala khüta abi müwajücho hütsü nührünü müdhele. Tunüo Abüdongba tsü yanglilüm ko dhsa lümjübanü jeng lile.

¹² Jünirüti, alathsa nührünü zengtade tsuyuchüm tüthsa. Ning mahkhang alih mahkhang nengpa tusü dangchi yu tüchüm. Nührü Tsingrangba-nü mümülangjünung nengdang, hohnung la “hoh” ding, ko mahnung la “mah” ding.

¹³ Nührü yola khürü chongcha lirü mah-o? Abinü dangkhidangnang. Khürü künyang lirü mah-o? Abinü nengsekhi thsaang.

¹⁴ Khürü füdhsa lirü mah-o? Abinü Lithro azibarü dsieng, ko Abüdongba nengla arühnü abi chah tuji müyühjü dangkhidangnangsohng.

¹⁵ Yudsi dangkhidangnang tsünü füdhsaba tsü kyangnung; Abüdongba-nü abi kyangjünung, ko abinü shitpahcho münyiti mülangpehjünung.

¹⁶ Hütsüeko, nührü kyangnung nengdang khüdunü khüdu te münyi nyengchoung ko khüdunü khüdu nengdang dangkhidangnang jütaang. Amüsarünü dangkhidangnangcho la suh amülah zehle.

¹⁷ Elijasü Ihsa roh-i nyitsarü khüdu du thsacho. Tsing mürosohnung abinü khahkhah dangkhidangnangcho, ko limih la kang asangpü choo dhüroh tsing mürocho.

¹⁸ Abinü anyüpiu dangkhidangnangcho, ko ningnü tsing müthehcho ko alihnü tsahma chürojücho.

¹⁹ Jünirüti, nührü yola khürü yuje lanü tsicho tsikhang ko aparü khüdunü abi nüli rokhang,

²⁰ hi lümchehng: Sünü münyirü khüdu amüthsalang lanü ximülasohnang; anbü tsü asü lanü khümchore, ko münyi khütango mülang pehjüba ngusohre.