JAKOB 4 - AMÜSA BAIBEL (BSI)

Limih te Shangrüthsacho

¹ Nührü yola khata ko yübüta hitoi hi khüdenü chüroro? Arüh tsü nührübürü chah lede khatanü liba nührü mükhyahmürah lümlong khu rore.

² Nührünü mükhyahre, ta müngure, hütsünü nührünü müpsehnung du dhrongchehre; nührünü khütang mükhyahre, ta münguchehre, hütsünü arühnü khatare ko yübütare. Nührünü khyünyücho tsü müngure tunüo nührünü hütsü nengdang Tsingrangba te müchingre.

³ Ko nührünü chingnye müngure, tunüo nührü nahdhingkeh tsü amütsae; nührübürü künyangküshi nengdang nührünü chingre.

⁴ Yujemücho nyitsarüti! Limih te shangrüthsaba tsü Tsingrangba münyehrüepü mümüdherü do? Sünü limih te shangrüthsanyüro, abinü apu jangjang Tsingrangba münyehrü kangre.

⁵ Amüsa yunü, “Tsingrangba-nü Ihsa chah lisohba anbü tsü nahmohnü jeng lile” pü yoba tsü arahkheh mah.

⁶ Ta Tsingrangba-nü jüba achomang tsü alaa adiu. Amüsa yunü hita yore: “Tsingrangba-nü amüthsehrü yatire, ta alonglümrü khyang achomang jüre.”

⁷ Hütsüeko, Tsingrangba pohki lieng. Motsing nyüm yang ko abinü nührü drü tsinung.

⁸ Tsingrangba shündhün rung, ko abinü nührü shündhün ronung. Nührü münyirüti! Nührü kheh müsang. Nührü akhürahrüti! Nührü lasih müdhsengchehng.

⁹ Wahnü tra meshüng; nührü münyüba atraba kang, nührü akünyang tsü alongri kang!

¹⁰ Abüdongba jingte nührü jangjang longlüm kang, ko abinü nührü dhimüsunung.

Khristan Jünirü nyüm Yukhaba Amüzahnung

¹¹ Jünirüti, nührü khüdunü khüdu nyüm mülang tüjüta. Sünü khristan jünirü khüdu mülangjüro mahkhang yukharo, abinü yuzeng mülangjüre ko yukhare. Nühnü yuzeng yu khakhang, adelü nüh yuzeng nyirü mah, ta hütsü yukharü kangre.

¹² Tsingrangba du tsü yuzengjürü ko yukharü lile. Abi dunü khümchonung ko thsangnyangjünung kohle. Ajünirü yu khanung nüh süepü lümro?

Müthsehcho nyüm Amüzahnung

¹³ Hi nyieng! Nührünü hita chore, “Chünye mahkhang atu yangdi khüdu lang wünung, ko kang khüdu hütsüla linü shithsabhüleh thsi khütang khyübülungnung.”

¹⁴ Atu nührü akang tu kangnung hütsü mii nührünü mümüdhe. Nührü akang tsü azachah shüchipü changpehba kihsah kyole.

¹⁵ Nührünü hita yonungbae: “Abüdongba-nü lümkhang, Ihrünü akang linung ko hi mahkhang hütsü nguchinung.”

¹⁶ Ta ade nührünü müthsehre, ko tüzümükhümre; hitari tüzümükhüm apüm amüthsalang.

¹⁷ Hütsünü, sünü atsa nguchinung müdhepü münguchirünang abi nengdang hütsü amünyi.