JAKOB 3 - AMÜSA BAIBEL (BSI)

Müle Rahsehba

¹ Ajünirüti, nührü drongra adorü mükangbae, tunüo Ihsa adorüti aparü tenü alaa amülingba yu khanungepü nührünü müdhele.

² Ihsa atümungnü adrongpi thsamehre.Ta nyüh khüdunü abi yula khodesü müthsamehkhang, abi apisae, ko abinü akang apüm mii rahsehchehnung.

³ Ihsanü Kuri be la yochonyisohnung lakhüm yohjüre, ko Ihsa wünyücholang wüsohnung nüchire.

⁴ Mahkhang kihkuh khüdu nengdang lümdhing: Hitoh-i dinye ko nyübongnü zii fünye, atbhengsing khüdunü anüchibanü khüilang wüsohnyünang hütsülang würe.

⁵ Mülesü hütsü kyo lile: Hitoh-i zaranye, arangcheh nengdang mii tüzümükhümre. Mihmüle azikyahnü khüta rangmü arangcheh mürohro lümdhing!

⁶ Ko müle tsü michang kyole. Hiba hi amümüsa amülah khüi Ihsa fü la kehba ko Ihsa akang apüm khu amünyi zisohre. Mümehmi abükyü lanü roba michang tsünü Ihsa akangli ayung la michang thsürangjüre.

⁷ Nyitsarülü rahsehnung kohre ko kanglungrü apa atümung rahsehko, rangmü kanglungrü ko uzati, chitsiba ko nguh.

⁸ Ta sünüsü khodesü müle mürahsehcheh. Hiba hi mürahsehchehba, asü müyühnü jeng liba amünyi lile.

⁹ Ihsanü hi Ihsa Abüdongba ko Au nengse nengdang bichire ko Tsingrangba apu kyochola thricho nyitsarüsü chokehcholare.

¹⁰ Bekah khüdu lanü anengse ko chokehchola yu chürore. Hütsüta müthsabae, jünirüti!

¹¹ Kihna khüdu lanü kih anyiyah ko akha müpohchere.

¹² Jünirüti, ngurüsih dongnü olive sih müsihcheh; shükusishünü ngurüsih müsihcheh, mahkhang mikih-poh lanü kih anyiyah müpohre.

Amilang roba Lümlong

¹³ Nührü yola lümlong azeh mahkhang anyicheh khürü lirü mah-o? Abinü apu akang atsa nguchi ko lümlongnü yuzi ngusohbae.

¹⁴ Ta nü lasih la mükohdhing, akha, ko abürü nengdang du lümba likhang, nü lümlong nengdang müthsehnü yujeba nyüm amünyi tüshitbah.

¹⁵ Hütsütari lümlong tsü ninglangnü rocho mah; hiba hi alimih shutsa ko amünyi yo lile.

¹⁶ Khüde mükohdhing ko abürü nengdang du lümba liro, hütsüla yubejarong ko amünyi lüpcho lile.

¹⁷ Ta amilangnü roba lümlong tsü akhu amüdhseng, atbachi, alonglüm ko tsataba; amüinü jeng ko asih atsa jüre: ko alümxünung ko akhürah müzeh.

¹⁸ Ko yangtsa külüprütinü yangtsa khyümba singtse lanü sihba tsü atsa tsü lile.