JAKOB 1 - AMÜSA BAIBEL (BSI)

¹ Tsingrangba ko Abüdongba Jisu Khrista dikehrü Jakob chahnü: Liküp la tsisho liba Tsingrangba tsurüti atümung te salüm müdhesohre.

Yudsi ko Lümlong

² Ajünirüti, khode athsadsü alangalang ro mütohnang hütsü amüwaepü khiching,

³ tunüo nührü yudsi thsadsücho khunü arangcho chürosohrepü nührünü müdhele.

⁴ Nührü tunüsü mümüdsipü akükyüh ko apisa kangnung nengdang, akang ayung amükoh müngusohpü rangcho wünung müküpm.

⁵ Nührü yola khürü lümlongnü müdsi likhang, abinü Tsingrangba sünü hütsü nührü khyang jüro, abi te dangkhidangnang; tunüo Tsingrangba-nü atümung khyang amükangnü ko achomangnü jüre.

⁶ Ta khode nührünü dangkhidangnangro, tu mütütohnyünyehpü yudsing. Sünü tütohnyünyehro abi nyübongnü füchiba kihdi kiloh kyole.

^7-8 Hütsü kyo nguchi apüm la müdhacheh ko müdhrongchehba nyitsarünü, Abüdongba chahnü tusü ngunung tülongdi.

Ailüm ko Ali

⁹ Khode ailümrü khristan khüdu Tsingrangba-nü dhimüsunang künyang,

¹⁰ ko alirü Tsingrangba-nü jowüsohde künyang. Tunüo rangmü yungpi khüdu kyo kuthsi tsü changpehnung.

¹¹ Nyü tsü trüpnah dhsa chürore, za tsü tasehre; yungpi tsü trülohre, ko abi atsah atsa tsü changre. Hütsü kyo, alirü tsüsü abi shithsabhüleh rachide changpehnung.

Müchehcho ko Thsadsücho

¹² Sünü athsadsü rangchoro abi amüwanung; tunüo khode abinü athsadsü tsü kohnang, Tsingrangba-nü abi müirüti khyang jünung nyengchocho akang tsü ngunung.

¹³ Khode nyüh khüdu thsadsünang, “Hiba athsadsü hi Tsingrangba chahnü rochoepü” tüyo. Tunüo amünyinü Tsingrangba thsadsünung mükoh, ko abinüsü süsü müthsadsüre.

¹⁴ Ta khode nyüh khüdu apu amünyi mükhyahmürahnü tphah nowü xohnang, hütsüde thsadsüre.

¹⁵ Khode amünyi mükhyahmürahnü abi jengnang amünyi surore; ko khode amünyi tsü zinang, asüba surore.

¹⁶ Amüiba jünirüti, nührü tükiyohchüsoh!

¹⁷ Jiyü atsa ko apisa apüm ninglangnü lile; ninglang atsingseti thriba, sü mümülichiro mahkhang rehnye mümaro, hiba Tsingrang chahnü lile.

¹⁸ Abinü thricho akang apüm yola amungthriba kangnungthsa, apu lümchonü yuje yu khu abinü Ihsa chürosohcho.

Yuchicho ko Nguchicho

¹⁹ Amüiba jünirüti, hi lümkehng! Atümungnü nyichonung dhsüdhsang, ta achonung ko zichüronung khaiding.

²⁰ Nyitsarü zichürochonü Tsingrangba amüsa alümcho mütikehchehre.

²¹ Hütsüeko amümüsa ko akhürah saying apüm pehjüng. Ko Tsingrangba-nü nührü lasih la lengjüba yu khüinü nührü khümchonung kohro hütsü khyüchoung.

²² Ta nührü abürü jangjang kihyochü ayuchirü du mükangpü anguchirü kang.

²³ Sünü yu tsü yuchiro, ta nguchi kang münguchiro, hütsü nyüh khüdunü tsahrising la dhingde apu tsah ngucho kyo lile.

²⁴ Abinü apu tsah chah dhingpü tsirü, ta tu kyorünang athsahkhüti nbüchüpehre.

²⁵ Ta sünü nyitsarü nyüje yujeba yuzeng la dhingro, ko yuchipü münbüchüpü nguchi kang nguchiro, abi nguchicho la Tsingrangba-nü abi müwajünung.

²⁶ Khürünü abi amüsabaepü lümrü mah-o? Abinü apu müle mürahsehkhang, abi yangthsa tsü amii mühle, ko abinü apu kihyochüre.

²⁷ Au Tsingrang-nü amüthsengcheh ko yuje yangthsaepü khichiba tsü hie: Mürürüti ko chomilarüti arüh chongcha la dhingnung ko limih athsangnyang lanü za linung.