ISAYA 9 - AMÜSA BAIBEL (BSI)

¹ Hiba chongcha lanü tsiphunung arüh nengdang tu lang mülinung. Zebulun ko Naftali yuchoti lih tsü khüdupi ashah khyo licho, ta Mediteranean nyüchürolangnü Jordan khüulang chii ko shuparü liba Galil lanü hiba mükyah yang aronungla adhichi hiro jünung.

Aronung Yangthsaba

² Amala lirütinü atsingse arangcheh khüdu nguko. Arüh nbükhüm lih la licho, ta ade arüh chah atsingse hekehre.

³ Nühnü arüh khyang akünyang amülah khüdu jüko, Abüdongba; nühnü arüh künyangsohko. Nühnü nguchichola arüh künyangre, müyurünü maxade künyangtacho kyo, mahkhang akengchocho kohro changtade kyo.

⁴ Tunüo arüh bhamülingba hongzih tsü nühnü pehjüko. Ko arüh rungchah xüpba idong nühnü thsangnyangjüko. Nü müyurü sehchi nyüpmüsehba yucho nühnü kohchehko, nühnü papade Midian-rü rothsarü kohchehcho kyo.

⁵ Amahrü rothsarü jingthri ko ashüh münohcho jengki apüm michangnü trüp-pehnung.

⁶ Ihsa khyang akhunga khüdu surojü lile! Ihsa khyang dhrezarü khüdu jo lile! Ko abi Ihsa yangthsarü thsanung. Abi te, “Anyemüyangnung, Tbachijürü” “Akohbong Tsingrang,” “Achangka müliba Au” “Yangtsa Yangthsaba” pü dsinung.

⁷ Abi thsaxüküm tase mütozah linung; abi yanglih lede yangtsa la linung. Abinü David ko abi yanglih michah, yuje ko amüsaba chah müdongkeh, ade ko achangka müli yangthsanung. Akohbong Abüdongba-nü hiri apüm nguchinung dhrongchehko.

Abüdongba -nü Israelrü Khingchinung

⁸ Abüdongba-nü Israel yanglih michah ko Jakob trah michah yukhaba jopehko.

⁹ Israelrü atümungnü, Samaria yangdila lirü müipinü hütsü abinü nguchichoepü müdhenung. Ade arüh müthsehre ko hongzire.

¹⁰ Arühnü yore, “Lihtah lungnü thsacho kuh khüluko, ta ihrünü hütsü lungnü thsamülinung. Papasi singnü ajing khengcho kyüsahjüko, ta hütsü cedar sing atsaubanü mülihnung.”

¹¹ Arüh mahsohnung Abüdongba-nü arüh rorüti ruhmüsure.

¹² Nyüchürolang Syria ko nyüzüdulang Filistiarünü Israel münyünung arüh be kapü yingle. Hütsütanye Abüdongba rihlong chüroba münyehli; khingchinung Abi kheh dhimüsu du lile.

¹³ Abüdongba Akohbongnü arüh khingchinye; Israelrünü arüh lasih müthsamüla, arühnü Abi yang müthali.

¹⁴ Nyümong khüdunü Israelrü ko arüh langnürü khingchinung; Abinü arüh aza-azi apüm müpsehnung.

¹⁵ Azirü ko adirüti tsü athah, ko amüying tsü arahkheh doba azikehrüti!

¹⁶ Hiri nyitsarü langnürütinü arüh nümülako ko khüdupinü lümdhamasohko.

¹⁷ Hütsünü Abüdongba-nü dhrezarü süsü mütsiphusohnung, ko Abinü mürürü ko chomilarüsü süsü mümüinung, tunüo nyitsarü apüm Tsingrangba mümüdherü ko amütsarüti du ko arühnü choba lüpcho tsü amünyi. Hütsütanye, Abüdongba rihlong münyehlinung, ta khingchinung Abi kheh dhimüsu du linung.

¹⁸ Müyurü amütsa tsünü michang kyo zeng ko zengdongti trüp-pehre. Hütsünü rangmü michangnü kyo mikhu lohchehchü trüpre.

¹⁹ Akohbong Abüdongba rihlong chürochonü, alih apüm la Abi akhingchiba tsünü michangnü kyo trüpre ko müyurü changsohre, ko sünüsü aparü mürikijüre.

²⁰ Yanglih apümlang nyitsarünü angucho masü rohcho tsure, ta arüh ayang tsü müzah. Arühnü palu tsurü mii tsure!

²¹ Manaserü ko Efraimrü nyüh khatare, ko anyüh yohrütapü Juda mahcho. Hütsütanye Abüdongba rihlong münyehlicho; ko khingchinung Abi kheh dhimüsu du licho.