ISAYA 8 - AMÜSA BAIBEL (BSI)

Müyurü nengdang Isaya Tsurü Amüdhethsa

¹ Abüdongba-nü Ite yocho, “Lungtpah amülah khüdu hirung ko hütsüchah amülülahnü thrahng: ‘Maher-Shalal-Hash-Baz, adüzü Zah zühng, dhsüdhsa kengchoung.’

² Longlangba nyitsarü anyüh yuzithsasohnung, bebüba Uria ko Jeberekia tsurü Zekaria nüng.”

³ Azachah lipü I nitpü fü müdeng kangcho. Khode akhunga tsü surocho, Abüdongba-nü Ite yocho, “Aneng, Maher-Shalal-Hash-Baz dsing (adüzü zah zühng, dhsüdhsa kengchoung.)

⁴ Akhunga tsünü ‘Itpa Uwa’ pü dsinung mümüdhe denü Damaskas kuthsi apüm ko Samaria lanü kengchocho apüm Assyria yangthsabanü hitsikhangnung.”

Assyria Yangthsaba Rocho

⁵ Abüdongba-nü Ite thali chotacho.

⁶ Abinü yocho, “Hiri nyitsarünü Shiloa kihnatung lanü kih alonglüm mükhyüpü ko yangthsarü Rezin e Peka nyüh jingte dhridhrichonü,

⁷ Ih, Abüdongba-nü Juda mahsohnung Assyria yangthsaba ko abi rothsarüti noronung. Arüh tsü Eufrates Yongkhi mülümthoh pohcho kyo ronung.

⁸ Hütsünü ahong chii küronung, ko lüpcho tingti Juda khu mülümpha alih apüm woh pohtpah tsinung.” Tsingrangba Ihsa te lile! Aqonü limih kyiti nyahyehnung.

⁹ Yuchoti, dhridhri müjang shibülung! Nyieng, nührü ashula liba yuchoti. Khatanung rungnüm, ta drüng! Rungnüm, ta drüng!

¹⁰ Nührü lümchung külüpm! Ta arühnü khodesü mükohnung. Nührünü kohcho choung! Ta hütsü apüm adeng, tunüo Tsingrangba Ihsa te lile.

Azikehrü Müzahsohcho

¹¹ Abüdongba zii arangchehla, müyurü tsehba langla mütsehnung Abinü Ih müzahsohcho.

¹² Abinü yocho, “Müyurü lümchung la tüzeh ko arühnü drüba nührünü tüdrü.

¹³ Ih, Amichahba Abüdongba, Amüsa epü lümchehng; nührünü Ih drüng.

¹⁴ I Amüsaba tsü anyekanung kehchonü, Ih nyitsarü jing müthiba lung khüdu kyo lile; Ih Juda, Israel ko Jerusalem yanglihti nyitsarü xohsohba zeng khüdu kyo lile.

¹⁵ Adrong müthikehnung; arüh khülunung ko dhrümnahnung. Arüh zeng la xohnung.”

Asülang wüsohcho Müzahsohcho

¹⁶ Nührü, I monotinü I khyang Tsingrangba-nü jüba yusiti tsü nyahng ko rikieng.

¹⁷ Abüdongba-nü apu müyurü tenü apu jangjang rangko, ta Ihnü Abi chah longlangre ko I alongdi Abi chah yohpüre.

¹⁸ Ih hila Abüdongba-nü jüba tsuzarü te lile. Zion khang chah Abi pümji liba Akohbong Abüdongba-nü, Israelrü yang Ihsa akang yusi müthehko.

¹⁹ Ta müyurünü nüte ajümjümrü ko abolorü, asülang würü ko amongrü te yusi tsü tsingdhing pü yonung. Arühnü yonung, “Müyurünü akang lirü nengdang anbüti ko asürü te mücheh yusi khyünungbae.”

²⁰ Nührünü hütsüri laling, “Abüdongba-nü nührü te tu yoro hütsü nyieng! Asülang würü yu tünyi, arühnü yoba tsü nü nengdang tu ajingcho mülinung.”

Dhsangthsinung Shikhe

²¹ Müyurüti suzah ko yangseh, alih la tsü rümchi rachinung. Arühnü yangseh ko rihlong chüronü arüh yangthsaba ko arüh Tsingrangba chokehcholanung.

²² Arühnü ningchah kehchü dhingnung mahkhang alih la dhingnung, ta arüh küm wüba adrünung amarürah, chongcha ko ama chah khu apa tusü müngunung.