ISAYA 66 - AMÜSA BAIBEL (BSI)

Abüdongba -nü Yuchoti Yukhanung

¹ Abüdongba-nü yore, “Ning I pümji ko alih I jing jükehji. Khang, I khyang kuh khütari thsajünung, Ih khütarila lisohnung?

² Hiri apüm Ipunü thricho. Alonglümrü ko lasih thsamülaba, Ih drürü ko I yocho nyirüti te Ihnü künyangre.

³ “Müyurünü arüh thsanyücho thsare. Arüh nengdang kangmübü thsanung misüpung müpsehcho mahkhang amüi tsurü müpsehcho nyüh tsü tu papa mühle; sanza kangmübü jünye mahkhang füza hong xisahjünye; tsang mübü jünye mahkhang shüka shuh mübünye; müchiji mübünye mahkhang kyothri mübünye, hütsü sako du licho. Arühnü athrünyinung mübübala künyang licho.

⁴ Hütsünü Ihnü arüh yang arühnü drüba achangba hirojünung, tunüo Ihnü dside sünüsü mülaling mahkhang Ihnü chode sünüsü mühnyi. I yocho münyinung ko amütsa nguchinung arühnü throchehcho.”

⁵ Abüdongba yu nyieng, nührü Abi drürü ko Abi yocho nyirüti: “Nührünü Ite yuje cho lichonü, nührübürü nyitsarü khürünü nührü thrünyicho ko nührü mükhiyohcho. Arühnü nührü münyodhing yocho, ‘Nührü künyangtacho ihrünü ngunungthsa, Abüdongba-nü Abi dicho ngusoh nührü khümchosohng.’ Ta arühbürü ashah khyünung!

⁶ Nyieng! Yangdila yuva tsü, Amübükuh la yuva tsü, hütsü Abüdongba-nü Abi rorüti khingchicho yuva lile!

⁷ “I Amüsa yangdi tsü mikhung mülipü khingkurü khüdu azarü nümüsucho kyole.

⁸ Khürünü hitari müngudhingo? Mahkhang hitari müyuchidhingo? Yanglih khüdu nyümong khüdunü surorü mah-o? Yanglih tsü müsuroede, Zion tsü anyahli müchongchanung.

⁹ Ihnü I müyurü tsü suronung bekhüm chii noropü arüh müsurosohnungepü tülüm.” Abüdongba-nü choko.

¹⁰ Jerusalem te künyangtaang; abükyü nengdang künyangtaang, nührü hiba yangdi müirü apüm! Ade abükyü te künyangtaang, nührü abükyü meshürü apüm!

¹¹ Nührünü abükyü amüwa changtanung, atpa nyikih chah akhunga khüdu kyo.

¹² Abüdongba-nü yore, “Ihnü nü khyang müchangba amüwa hirojünung: Yanglihti kuthsi tsü nüh yang münyehba yongkhi kyo pohronung. Nührü tsü atpanü müthsümba akhunga khüdu kyonung, abükyü kheh la wüp müinung.

¹³ Atpa khüdunü atsurü kihchocho kyo, Ihnü nüh Jerusalem tbachijünung.

¹⁴ Hi tikehcho ngude, nührünü künyangnung; hütsünü nührü rezehsoh suluh tsasohnung. Hütsüta nührünü Ih Abüdongba-nü Ite yocho nyirü tronung, ko I rorüh te zichüro khüta ngusohro hütsü müdhenung.”

¹⁵ Abüdongba michang la ronung. Abi rihlong chürobanü khingchinung ko Abi tsingxinyübong qo chah pümpü ronung.

¹⁶ Michang ko nohshengnü Abinü limih la thsamehrü apüm khingchinung, ko khütang süsohnung.

¹⁷ Abüdongba-nü yore, “Müyudsirü tsingrang mübünung müsachehrüti, Amüsa tbülang yanglongdse würüti ko shüka shuh ko yongmüza shuh ko apa athrünyinung tsuyongba tsurü nengdang achangka amünyeh tsehle.

¹⁸ Arüh lümlong ko arüh nguchi Ihnü müdhele. Yucho apüm lanü müyurüti nübülungnung Ih role.

¹⁹ Arüh müjang shibülungde, I ziinü khütoi nguchinung kohro hütsü arühnü ngunung ko arüh khingchiba tsü Ihnü-epü müdhenung.” “Ta Ihnü arüh khürü rikinung ko I nengkhong müyuchierü I dicho ko I zii nengdang müyuchierü yuchoti ko limih ashulang arüh müthehnung: Spain, Libya ko Lydia lang tbüdeng bichinungla asithsarü zeh ko Tubal ko Greece lang. Hiri yuchoti ko arühnü I dicho sobhonung.

²⁰ Arühnü nührü nyitsarü apüm bürü lih lanü I khyang jiyü roh-i thali noronung. Arühnü Jerusalem la I Amüsa khang yang, Israelrünü amübükuh yang ayahnü müsachehcho loh amüsa lanü tsang mübü hirocho kyo, kuri, kuri atrüh, ut ko kuri akhüluba lanü arüh noronung.

²¹ Ihnü arüh khürü bebürü ko khürü Levirü kangsohnung.

²² “Ning asi ko limih asi I ziinü lisohcho kyo, nü trah ko nü neng Ihnü lisohnung.

²³ Chonu Asi Thsüti mükhu ko Sabath nyümong müipi, yucho apüm la müyurütinü Jerusalem hila Ih mübünung ronungepü Abüdongba-nü yore.

²⁴ Arüh tside, I nyümrü me arühnü ngunung. Hütsüri tsuba müci khodesü müsünung, ko hütsüri trüpba michang khodesü mümehnung. Arüh athrünyinung tsü liküprü nengdang khüdu thsanung.”