ISAYA 64 - AMÜSA BAIBEL (BSI)

¹ Tuepü ning tsü rohphohpü müjüroro? Azongtinü Nüh ngunung ko adrüchonü dhridhrinung.

² Michang adhsa chah kih mülucho kyo arüh dhridhrinung. Rung ko Nü rorüh te Nü zii mishaang, ko Nü jingte yanglihti dhridhrisohng!

³ Nüh ropü ihrünü mülongdicho adrünung nguchi ihrü drüsohnung shikhe khüdu licho; azongtinü Nüh ngu adrüchonü dhridhricho.

⁴ Sünüsü Nüh kyo abi chah longdirü nengdang hitoi nguchiba Tsingrang müngudhing, mahkhang müyuchidhing.

⁵ Atsa nguchirü ko Nühnü khüta lisohnyüro, hütsü lümkehrü Nühnü khyüchore. Nühnü ihrü te rihlong chürocho, ta ihrünü amünyi shitpah du licho.

⁶ Ihrü atümung münyirü thsacho; ihrü nguchi atsa mii apüm athrünyi du kang licho. Ihrü münyi khu ihrü amükucho ko nyübongnü fotsiba singvatpah kyo licho.

⁷ Sünüsü dangkhidangnang Nüh yang müximüla; sünüsü Nüh yang arüku nengdang müro. Ihrü münyi ngang Nühnü ihrü thrüchahchüpehcho, ko ihrü tenü rang licho.

⁸ Ta Abüdongba, Nüh ihrü au. Ihrü lishe ko Nüh füh tangrü.

⁹ Nühnü ihrü thricho, hütsüeko aro zii chürung mahkhang lede ihrü münyi tükhichi. Ihrü Nü müyurü; ihrü te yanglilüm.

¹⁰ Nü Amüsa yangditi lipilih kyo kangko; Jerusalem tsü apehlih kang trümnahko.

¹¹ Ko ihrü jümürünü Nüh sechah, ihrü amübükuh, Amüsa ko atsah atsa tsü michangnü trüp-pehjüko. Ihrünü müiba müdüm apüm thsangnyang lile.

¹² Abüdongba, hiri apüm nengdang dhsa mülümrü do? Nühnü tu münguchipü ihrünü mürangchonungthsa ihrü chongchasohnung do?